ຄົນງານລາວເສັຽຊີວິດ ຢູ່ ໄທຍ

ຄົນງານລາວຜູ້ນຶ່ງຊື່ ທ້າວ ຈອນນີ ອາຍຸ 24 ປີ ເສັຽຊີວິດ ຢູ່ໃນຫ້ອງພັກ ທີ່ເທສບານເມືອງ ແຂວງຊົນບຸຣີ ປະເທດໄທຍ ໃນມື້ວັນທີ 19 ມົກກະຣາ 2021 ນີ້ ເສັຽຊີວິດ ຍ້ອນຫົວໃຈ ລົ້ມແຫລວ.

ໃນເບື້ອງຕົ້ນ ມີຄົນພົບຮ່າງຜູ້ກ່ຽວ ຢູ່ເທິງຕຽງນອນ ຄືກັນກັບຄົນນອນຫລັບ, ຫລັງຈາກນັ້ນກໍໄດ້ນໍາສົ່ງສົບຊາຍຜູ້ເສັຽຊີວິດໄປໂຮງໝໍ ແຂວງຊົນບຸຣີ ເພື່ອພິສູດຫາສາເຫດ ຂອງ ການເສັຽຊີວິດ, ດັ່ງເຈົ້າໜ້າທີ່ຕໍາຣວດ ແຂວງຊົນບຸຣີ ທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 21 ມົກກະຣາ 2021 ນີ້ວ່າ:

ທ່ານກ່າວວ່າ “ເພິ່ນເປັນຄົນງານ ຢູ່ໂຮງຈັກແຖວນັ້ນ ແລ້ວນອນເສັຽຊີວິດ ກໍໄປສັລສູດພິກສົບ ເໝືອນຄົນນອນໄຫລຕາຍຕໍາຣວດ ໄດ້ຮັບແຈ້ງເຫດ ປະມານ 11 ໂມງ, ເອກສານ ທີ່ ເພິ່ນສົ່ງມາ ມັນກໍອ່ານໄດ້ແບບນັ້ນແຫລະ ເລີກຈາກງານມາກໍນອນ, ເຊົ້າມາ ຍາດພີ່ນ້ອງ ກໍມາພົບສົບ.”

ຄົນງານລາວຜູ້ນຶ່ງ ທີ່ເຮັດວຽກນໍາກັນກັບຜູ້ເສັຽຊີວິດ ຢູ່ໂຮງງານແຫ່ງນຶ່ງ ໃນເທສບານເມືອງ ແຂວງຊົນບຸຣີ ແລະພັກຢູ່ໃກ້ກັນເວົ້າວ່າ ຜູ້ເສັຽຊີວິດ ຊື່ ຈອນນີ ອາຍຸ 24 ປີ. ໃນຕອນເຊົ້າ ວັນອັງຄານ ພົບວ່າ ຜູ້ກ່ຽວເສັຽຊີວິດ ຢູ່ໃນຫ້ອງພັກ, ຕໍ່ມາເຈົ້າໜ້າທີ່ ໄດ້ນໍາສົບ ຜູ້ກ່ຽວໄປສັລສູດ ຢູ່ໂຮງໝໍ ແລະ ໄດ້ຂໍ້ສລຸບວ່າ ເສັຽຊີວິດຍ້ອນຫົວໃຈລົ້ມແຫລວ, ດັ່ງທີ່ທ່ານກ່າວຕໍ່ ວິທຍຸເອເຊັຽເສຣີ ໃນມື້ດຽວກັນ ນັ້ນວ່າ:

“ກໍເອີ້ນ ຈອນນີ ບໍ່ຮູ້ວ່າໃນພາສພັອດ ເພິ່ນຊື່ຫຍັງ 24 ແຫລະ ກໍນ້ອງເຮັດງານໃນໂຮງງານນໍາກັນ ຕາຍວັນອັງຄານ ເພິ່ນເອົາໄປຜ່າ ພິສູດສົບ ຫົວໃຈລົ້ມເຫລວ ສິເຜົາວັນອາທິດນີ້ ເຜົາທີ່ໄທຍ ແລະ ເອົາກະດູກກັບບ້ານ ຮູ້ແລ້ວ, ຍາດພີ່ນ້ອງເພິ່ນຢູ່ນີ໋ກໍມີ ໝູ່ເພິ່ນໂທ ໄປບໍ່ຮັບສາຍ ກໍເລີຍໄປເຄາະຫ້ອງກໍບໍ່ເປີດ ກໍເລີຍພັງເຂົ້າໄປ ກໍເຫັນເປັນສົບແລ້ວ.”

ຊາວລາວອີກທ່ານນຶ່ງ ຢູ່ບ້ານດຽວກັນ ຄືບ້ານພູມສວັນ ເມືອງວາປີ ແຂວງສາລະວັນ ແລະ ຮູ້ຈັກກັນກັບຜູ້ເສັຽຊີວິດຊື່ ທ້າວ ຈອນນີ  ເວົ້າວ່າ ຜູ້ກ່ຽວໄປເຮັດວຽກຢູ່ປະເທດໄທຍ ໄດ້ປະມານປີປາຍສອງປີ, ແລະ ມື້ນີ້ຍາດພີ່ນ້ອງຢູ່ທາງປະເທດລາວ, ກໍໄດ້ຍິນຂ່າວການ ເສັຽຊີວິດນັ້ນແລ້ວ, ດັ່ງ ທີ່ທ່ານກ່າວຕໍ່ວິທຍຸເອເຊັຍເສຣີ ໃນມື້ວັນທີ 21 ມົກກະຣາ 2021 ນີ້ວ່າ:

“ເປັນຄົນບ້ານດຽວກັນ ຊື່ ຈອນນີ້ ບ້ານພູມ ສວັນ ເມືອງວາປີ ແຂວງສາລະວັນ ຄອບຄົວເພິ່ນຮູ້ແລ້ວ ບໍ່ດົນປີປາຍ 2 ປີ.”

ອີງຕາມການຣາຍງານ ຂອງ ສື່ມວລຊົນໄທຍ ເມື່ອວັນທີ 19 ມົກກະຣາ 2021 ພົບຊາຍລາວຄົນນຶ່ງ ນອນເສັຽຊີວິດຢູ່ໃນຫ້ອງເຊົ່າ, ທີ່ເທສບານເມືອງ ແຂວງຊົນບຸຣີ ປະເທດໄທຍ, ແຕ່ບໍ່ຮູ້ສາເຫດ. ຜູ້ກ່ຽວຊື່ ຈອນນີ ພົມມະສະທິດ, ສັນຊາດລາວ ອາຍຸ 24 ປີ, ເຈົ້າໜ້າທີ່ໄດ້ເຂົ້າໄປກວດສອບ ພົບວ່າ ຈອນນີ ນອນເສັຽຊີວິດຢູ່ກາງຫ້ອງ, ມີຜ້າຫົ່ມຄຸມ ແລະ ຢູ່ໃນສະພາບຄືກັບ ຄົນນອນຫຼັບ ປົກກະຕິ.

ເຈົ້າໜ້າທີ່ຕໍາຣວດ ແຂວງຊົນບຸຣີ ສອບຖາມ ທ້າວ ຕຸ້ຍ ຄົນລາວ ທີ່ເປັນເພື່ອນຜູ້ເສັຍຊີວິດ, ໄດ້ຮູ້ວ່າ ເຂົາມາເຮັດວຽກຢູ່ໂຮງຈັກ ແຕ່ບໍ່ເຫັນ ຈອນນີ ມາເຮັດວຽກ ກໍເລີຍໄປເອີ້ນ, ເຫັນຫ້ອງປິດຢູ່ ກໍເລີຍເອີ້ນ, ແຕ່ບໍ່ມີສຽງຕອບຮັບ. ດັ່ງນັ້ນຈຶ່ງໄດ້ເອີ້ນ ອ້າຍຂອງ ຈອນນີ ມາປຸກ ແຕ່ກໍຍັງມິດງຽບຢູ່, ເລີຍຕັດສິນໃຈງັດປະຕູເຂົ້າໄປ, ພໍເປີດປະຕູ ກໍພົບວ່າ ຜູ້ກ່ຽວນອນຢູ່ເທິງຕຽງ ແລະ ຫົ່ມຜ້າ ຄືກັນກັບຄົນນອນປົກກະຕິ, ແຕ່ເມື່ອເຂົ້າໄປປຸກ ພົບວ່າເສັຽຊີວິດແລ້ວ.

ຕໍ່ມາເຈົ້າໜ້າທີ່ຈາກໂຮງໝໍແຂວງຊົນບຸຣີ ໄດ້ນໍາສົບຂອງຜູ້ເສຽຍຊີວິດ ໄປສັລສູດ ເພື່ອຫາສາເຫດທີ່ແທ້ຈິງ ພ້ອມກັບເກັບຕົວຢ່າງ ສານຄັດເຄັ່ງ ເພື່ອກວດຫາ ໂຄວິດ-19. ໃນທີ່ສຸດພົບວ່າຜູ້ກ່ຽວ ເສັຽຊີວິດຍ້ອນຫົວໃຈລົ້ມແຫລວ.

ກ່ອນໜ້ານີ້ ຢູ່ບາງກອກ ເມື່ອວັນທີ 8 ມົກກະຣາ 2021 ສື່ມວນຊົນໄທຍ ໄດ້ຣາຍງານວ່າ ເຈົ້າໜ້າທີ່ກູ້ພັຍຂອງໄທຍ ໄດ້ຮັບແຈ້ງວ່າ ມີແມ່ຍິງລາວຄົນນຶ່ງ ຊື່ ພາວະດີ ພົງສາ ອາຍຸ 20 ປີ ຄົນບ້ານໜອງທາ ເມືອງສີໂຄດຕະບອງ ນະຄອນຫລວງວຽງຈັນ ທີ່ຢູ່ບ້ານເຊົ່າ ໃນເມືອງບາງຄໍແຫຼມ ບາງກອກ ເສັຽຊີວິດ ແລະ ໄດ້ນໍາສົບຜູ້ກ່ຽວໄປສັລສູດ ຫາສາເຫດຂອງການ ເສັຽຊີວິດຢູ່ໂຮງໝໍຈຸລາ, ແຕ່ຍັງ ບໍ່ມີຂ່າວກ່ຽວກັບ ຜົນອອກມາວ່າ ເສັຍຊີວິດຍ້ອນຫຍັງກັນແທ້.