ສສຊ ອະພິປາຍ ການສໍ້ໂກງ

ອຸ່ນແກ້ວ ສຸກສະຫວັນ
2019-11-19
ອີແມວລ໌
ຄໍາເຫັນ
Share
ພິມ
ຫໍສະພາແຫ່ງຊາດ ແຫ່ງ ສປປ ລາວ ທີ່ ສສ ວຽດນາມ ເປັນຜູ້ອອກທຶນ ໃນການກໍ່ສ້າງ
ຫໍສະພາແຫ່ງຊາດ ແຫ່ງ ສປປ ລາວ ທີ່ ສສ ວຽດນາມ ເປັນຜູ້ອອກທຶນ ໃນການກໍ່ສ້າງ
RFA

ສະມາຊິກສະພາແຫ່ງຊາດ ຫຼື ສສຊ ວິຈານວ່າພະນັກງານຣັຖກອນ ຈຳນວນນຶ່ງໄປພົວພັນເຣື່ອງກິນໄມ້, ກິນຣົດ, ກິນດິນ ແລະ ກິນເຮືອນ, ໃນນັ້ນ ໝາຍຄວາມວ່າ ພະນັກງານຣັຖກອນເຫລົ່ານັ້ນ ໄປພົວພັນ ເຣື່ອງການສໍ້ຣາສບັງຫຼວງ ໃນການລັກລອບ ຕັດໄມ້, ການເອົາຣົດປະຈຳ ຕຳແໜ່ງ ມາເປັນຣົດສ່ວນຕົວ ໃນເວລາອອກກິນບຳນານ, ການສຳປະທານທີ່ດິນ, ແລະ ການຂໍງົບປະມານ ມາປຸກເຮືອນ ໃຫ້ພະນັກງານ ການນຳ.

ຍານາງ ແສງຄຳ ຊົ່ງຊະນະ ສະມາຊິກສະພາແຫ່ງຊາດ ເຂດ 9 ແຂວງຊຽງຂວາງ ໄດ້ກ່າວຕໍ່ກອງປະຊຸມ ສະພາສະໄໝສາມັນ ເທື່ອທີ 8 ຂອງສະພາ ແຫ່ງຊາດ ຊຸດທີ 8 ຕອນນຶ່ງ ວ່າ:

"ວິຊາການ [ສັງກັດຣັຖ] ພວກເຮົານີ້ ເຮັດອັນໃດ ລະກິນອັນນັ້ນ ກິນນັ້ນກໍຄື ກິນໄມ້ ກິນເງິນວິຊາການ ກິນຣົດ ກິນເຮືອນ ກິນດິນ ຊັ້ນລະ ເນາະ ບັນດາທ່ານ."

ການນຳອາວຸໂສ ທີ່ອອກບຳນານໄປ ເອົາຣົດໄປເລີຍ ແລະ ບໍ່ມີການສົ່ງຣົດຄືນ, ຍານາງ ບົວຄຳ ທິບພະວົງ ສະມາຊິກສະພາແຫ່ງຊາດ ເຂດ 1 ນະຄອນຫລວງວຽງຈັນ ໄດ້ກ່າວໃນການອະພິປາຍ ໃນມື້ດຽວກັນວ່າ:

"ຄືຂ້າພະເຈົ້າໄດ້ຍົກຂຶ້ນມາເວົ້າ ມື້ວານນີ້ ຄືພາຫະນະຫັ້ນລະເນາະ ພາຫະນະຮັບໃຊ້ ຫລືວ່າ ເປັນນະໂຍບາຍຕ່າງໆ ຫັ້ນ, ຄືຮອງນາຍົກ ເພິ່ນເວົ້າມື້ວານນີ້ ກະຍັງບໍ່ໄດ້ມີຢູ່ໃນລະບຽບແທ້ ກະຍັງບໍ່ທັນໄດ້ຄົ້ນຄວ້າວ່າ ການທີ່ພະນັກງານບຳນານ ອາວຸໂສ ຫລືວ່າ ການນຳທີ່ອອກ ເບັ້ຽບຳນານໄປ ຣົດນີ້ພາຫະນະນີ້ ຜູ້ສາມຄັນ ສີ່ຄັນ ກະມີເດ້ ບັນດາທ່ານ."

ຍາງ ບົວຄຳ ຍັງສະເໜີໃຫ້ກະຊວງໂຍທາທິການ ແລະ ຂົນສົ່ງ ກວດກາຄືນກ່ຽວກັບເຣື່ອງລະບຽບການຊື້ພາຫະນະ.

"ຊິເອົາຍາມໃດ ຊິເອົາອັນໃດ ໃຫ້ມີການປະຢັດໄດ້ ຊິເອົາເງິນໃສ ມາເປັນການອອມການຖອນ ຊິໄປພັທນາໂຄງການໃໝ່ນີ້ນະ ມັນກະເປັນ ບັນຫານຶ່ງ ອັນນີ້ ຂ້າພະເຈົ້າກະດີໃຈ ໃນການຊີ້ແຈງຂອງທ່ານ ນາຍົກ ມື້ວານນີ້ວ່າ ຈະມີການສືບຕໍ່ບາງກົດໝາຍ ບາງລະບຽບການ ໃນການຊື້ພາຫະນະ ມາເບິ່ງຢູ່ໃນນີ້ ການຊື້ພາຫະນະ ກະມີການລະເມີດຢູ່ໄດ໋ນີ້ ອັນນີ້ ເພິ່ນກະສະເໜີໃຫ້ ກະຊວງໂຍທາ ເບິ່ງຄືນອີກ. ການປະມູນຣົດ ຂອງບັນດາການນຳ ມີຂຶ້ນເດືອນ ເມສາ ປີ 2018 ທີ່ຜານມາ ເພື່ອໃຫ້ເປັນຕົວຢ່າງ ໃຫ້ແກ່ພະນັກງານຣັຖກອນ ການນຳຄົນອື່ນໆ."

ທາງການລາວຈຶ່ງມີການປະມູນຂາຍຣົດ BENZ 16 ຄັນ ຊຶ່ງເປັນຣົດທີ່ເຄີຍໃຊ້ຮັບຮອງແຂກຂອງຣັຖບານ, ມີການເປີດຊອງປະມູນຂາຍ. ຣົດຈຳນວນ 16 ຄັນ ທີ່ນຳມາປະມູນຂາຍອອກນັ້ນ ກໍຈະມີຣົດ BENZ ຣຸ້ນ E. 15 ຄັນ ແລະ ຮຸ້ນ S 1 ຄັນ ມີຣາຄາ ປະມູນເຣີ້ມແຕ່ 500 ລ້ານກີບ ຫລັງກໍໄດ້ປະມູນຂາຍ ຣົດຫລູ 14 ຄັນ ກ່ອນໜ້ານີ້.

ໃນການເຂົ້າຮ່ວມປະມູນຣົດຫລູ ໃນຄັ້ງນີ້ ຈະຕ້ອງໃຫ້ເຈົ້າໜ້າທີ່ກວດກາແຫ່ງຣັຖ ກວດສອບແຫຼ່ງທີ່ມາຂອງເງິນກ່ອນ ເນື່ອງຈາກການປະມູນ ຣົດຫລູ ຄັ້ງທຳອິດ ບໍ່ມີເຈົ້າໜ້າທີ່ ກວດກາແຫ່ງຣັຖເຂົ້າຮ່ວມ.

ອັນນັ້ນແມ່ນການປະມູນຣົດຫຼູ ຊຶ່ງການນຳລະດັບກົມການເມືອງໄດ້ອອກມາປະມູນຂາຍ ເພື່ອເປັນຕົວຢ່າງ ແກ່ພະນັກງານການນຳຄົນອື່ນໆ.

ບັນຫາເຈົ້າໜ້າທີ່ຣັຖ ເຂົ້າໄປຍຶດຄອງທີ່ດິນຂອງປະຊາຊົນ.

ຕົວຢ່າງບັນຫາຂໍ້ຂັດແຍ່ງທີ່ດິນບ້ານຊຽງດາ ເມືອງໄຊເສດຖາ ນະຄອນຫລວງວຽງຈັນ ເກີດຂຶ້ນຍ້ອນວ່າ ອາດີດເຈົ້າຄອງນະຄອນຫລວງ ວຽງຈັນ ຮ່ວມມືກັບເອກກະຊົນ ເພື່ອເອົາທີ່ດິນ ຈາກຊາວບ້ານ. ປະຊາຊົນ ບ້ານຊຽງດາ ເມືອງໄຊເສດຖາ ນະຄອນຫຼວງວຽງຈັນ ຮຽກຮ້ອງ ຂໍຄວາມເປັນທັມ ຍ້ອນຖືກບໍຣິສັດນໍ້າທາ ກໍ່ສ້າງຂົວທາງ ຈຳກັດຜູ້ດຽວ ບຸກເບີກເອົາທີ່ດິນ ຂອງຕົນ ເພື່ອໄປສ້າງ ໂຄງການບ້ານຈັດສັນ.

ປະຊາຊົນທີ່ເປັນເຈົ້າຂອງທີດິນ ກ່າວວ່າດິນຕ່ອນນີ້ ເປັນດິນ ທີ່ຕົກທອດມາແຕ່ ບັນພະບູຣຸດ ແລະ ມີໃບຕາດິນຖືກຕ້ອງຕາມກົດໝາຍ ແຕ່ກັບຖືກ ບໍຣິສັດນໍ້າທາມາບຸກເບີກທີ່ດິນ ໂດຍທີ່ປະຊາຊົນບໍ່ຍິນຍອມ. ປະຊາຊົນຜູ້ທີ່ເປັນເຈົ້າຂອງທີ່ດິນ ໄດ້ກ່າວຕໍ່ ເອເຊັຽເສຣີ ວ່າ:

"ບໍຣິສັດນ້ຳທາ ທົດແທນໃຫ້ ໜ້ອຍຫລາຍ ແລະ ມັນບໍ່ສົມກັບເນື້ອທີ່ຂອງພວກເຂົາເຈົ້າເສັຽໄປ. ບໍຣິສັດເອົາດິນເຂົາເຈົ້າໄປ ສະເພາະ ຄອບຄົວນີ້ 4 ໄຣ່ [ເທົ່າກັບ 6,400 ແມັດມົນທົນ], ແຕ່ ຈ່າຍຄ່າຊົດເຊີຍ ໃຫ້ພຽງແຕ່ 20,000 ບາດ ເປັນສະກຸນເງິນໄທ."

ຂໍ້ຂັດແຍ່ງທີ່ດິນ ບ້ານຊຽງດາ ເກີດຂຶ້ນນັບແຕ່ປີ 2012 ເປັນຕົ້ນມາ ຫລັງຈາກທີ່ ເຈົ້າຄອງ ນະຄອນຫລວງວຽງຈັນ ຜູ້ເກົ່າ ໄດ້ເຊັນອະນຸມັດ ໃຫ້ບໍຣິສັດ ນ້ຳທາກໍ່ສ້າງ ຂົວທາງຈຳກັດຜູ້ດຽວ ເພື່ອພັທນາທີ່ດິນເຂດບ້ານຊຽງດາ ແລ້ວແບ່ງຂາຍ ໂດຍອ້າງວ່າ ທີ່ດິນເຂດດັ່ງກ່າວ ເປັນ ເຂດສງວນຂອງຣັຖ.

ເຖິງຢ່າງໃດກໍຕາມ ເຈົ້າໜ້າທີ່ ຜູ້ທີ່ຄົ້ນຄວ້າ ແລະວິຈັຍ ເຣື້ອງທີ່ດິນ ໄດ້ກ່າວຕໍ່ວິ ທຍຸເອເຊັຽເສຣີ ກ່ຽວກັບເຣື້ອງນີ້ວ່າ ປັຈຈຸບັນ, ເອກກະຊົນ ແມ່ນຢູ່ເໜືອ ຣັຖແລ້ວ ແລະໃຊ້ຣັຖ ເປັນເຄື່ອງ ມືໃນການຫາຜົນປໂຍດ ຈາກການສຳປະທານທີ່ດິນ.

ກໍຣະນີ ທີ່ມີເຈົ້າໜ້າທີ່ລະດັບສູງ ເຂົ້າໄປພົວພັນເຣື່ອງການຕັດໄມ້.

ກໍຣະນີເຈົ້າແຂວງຈຳນວນນຶ່ງ ໄດ້ໄປພົວພັນກັບ ນັກທຸຣະກິດ ເພື່ອໄປຕັດໄມ້ສົ່ງອອກ ໄປຂາຍຕ່າງປະເທດ. ກໍຣະນີ ທີ່ 1, ແມ່ນອາດີດ ເຈົ້າແຂວງອັດຕະປື ທີ່ໄປພົວພັນ ເຣື່ອງການສົ່ງອອກໄມ້ທ່ອນ ແລະ ໄມ້ຕັບໄປປະເທດວຽດນາມ. ໃນເດືອນມິຖຸນາ ປີ 2017, ເຈົ້າໜ້າທີ່ ຂອງອົງການກວດກາຣັຖບານ ໄດ້ຣາຍງານວ່າ ທ່ານ ບຸນທອງ ຈິດມະນີ ປະທານອົງການ ກວດກາຣັຖບານ ໄດ້ມີຄໍາສັ່ງໃຫ້ຍຶດໄມ້ ທັງໝົດໃນຣົດ 27 ຄັນ ຢູ່ດ່ານຊາຍແດນພູເກືອ ແຂວງອັດຕະປື ເປັນຂອງຣັຖ. ຈຳນວນໄມ້ ທີ່ອົງການ ກວດກາຣັຖບານ ສັ່ງຢຶດນັ້ນ ເປັນຂອງເຈົ້າແຂວງອັດຕະປື ໃນເວລານັ້ນ ອີງຕາມການຢືນຢັນ ຂອງເຈົ້າໜ້າທີ່ກວດກາ ທ່ານນຶ່ງ ຢູ່ແຂວງພາກໃຕ້.

ນອກຈາກນີ້, ທ່ານ ເພັດ ພົມພິພັກ ຣັຖມົນຕຣີ ປະຈໍາສໍານັກງານນາຍົກຣັຖມົນຕຣີ ໄດ້ອອກແຈ້ງການສະບັບເລກທີ 729 ລົງ ວັນທີ 16 ພຶສພາ 2017 ໃຫ້ອົງການກວດກາຣັຖບານ ສົ່ງຄນະສະເພາະກິດລົງໄປ ສົມທົບກັບແຂວງອັດຕະປື ແລະ ພາກສ່ວນ ກ່ຽວຂ້ອງກວດກາ ຕົວຈິງ ບັນຫາການສົ່ງອອກໄມ້ ຢູ່ດ່ານພູເກືອ ແຂວງອັດຕະປື, ແລະ ຖ້າພົບວ່າ ບໍ່ຖືກຕ້ອງຕາມຕາມກົດໝາຍ ແມ່ນໃຫ້ຢຶດ.

ອັນນັ້ນແມ່ນກໍຣະນີທີ່ເກີດຂຶ້ນ ຢູ່ແຂວງອັດຕະປື.

ຍັງມີກໍຣະນີ ທີ່ເກີດຂຶ້ນຢູ່ແຂວງຊຽງຂວາງ ເຊັ່ນດຽວກັນ, ໃນປີ 2018 ທີ່ຜ່ານມາ ມີການສັ່ງຍ້າຍອາດີດ ເຈົ້າແຂວງຊຽງຂວາງ ຍ້ອນວ່າໄປ ພົວພັນ ເຣື່ອງການສົ່ງອອກໄມ້ ໄປປະເທດວຽດນາມ ຈຳນວນຫລາຍ 1,000 ແມັດກ້ອນ ຊຶ່ງຂັດຕໍ່ຄຳສັ່ງເລກທີ 15 ຂອງນາຍົກຣັຖມົນຕຣີ ວ່າດ້ວຍການຫ້າມສົ່ງອອກໄມ້ໄປຕ່າງປະເທດ.

ກ່ຽວກັບກໍຣະນີ ການຊຶ້ື້ບ້ານ, ອີງຕາມຂໍ້ມູນຈາກຫ້ອງວ່າການສູນກາງພັກ ທີ່ຜານມາ, ຣັຖບານຕ້ອງໄດ້ສ້າງເຮືອນຫລັງໃໝ່ ໃຫ້ການນຳ ຂັ້ນສູງ ທີ່ຈະເຂົ້າມາຮັບຕຳແໜ່ງ ແລະ ການນຳທີ່ຈະອອກກິນບຳນານ ເຊັ່ນດຽວກັນ ຊຶ່ງຫລາຍຄົນກໍໃຫ້ທັສນະວ່າມັນ ເປັນການສິ້ນເປືອງ ງົບປະມານ.

ແລະ ນອກຈາກນີ້ ຍັງມີຣາຍງານວ່າ, ອາດີດການນຳລະດັບກົມການເມືອງ 2 ທ່ານ ໄດ້ເອົາດິນຢູ່ຄ້າຍທະຫານ ບ້ານສາຍນ້ຳເງິນ ທາງເຂົ້າ ໂຮງງານຕັດຫຍິບສີວິໄລ ແລະ ບ້ານຄຳຮຸ່ງ ທີ່ຂຶ້ນກັບເມືອງໄຊເສດຖາ ນະຄອນຫຼວງວຽງຈັນ ເພື່ອປຸກເຮືອນໃສ່ ທີ່ດິນຕອນດັ່ງກ່າວ ແລ້ວ ຫລັງຈາກນັ້ນ ຍ້າຍຄ້າຍທະຫານໄປຢູ່ຫລັກ 36 ຢູ່ຕາມເສັ້ນທາງ ເລກທີ 13 ໃຕ້.

ຄໍາເຫັນ (2)
Share

(

ຟັ​ງ​ຄື​ກັບ​ວ່າ ຜູ້​ປະ​ກາດ​ສາ​ລະ​ຄະ​ດີ ອ່ານ ສ​ສຊ ເປັນ ສ​ສ​ສ...


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Nov 20, 2019 06:52 AM

(

ການສໍ້ກົງຂອງພັກຂອງລັດຢູ່ໃນປະເທດລາວນັ້ນ ມັນຮ້າຍແຮງຫຼາຍແລະຫົວໜ້າກົມກອງຕ່າງຂອງລັດ ກໍຍັງມີການຮ່ວມມືກັນກັບພວກທຸລະກິດນໍາອີກ ແລະພວກທຸລະກິດທັງຫຼາຍກໍຍັງເປັນເຊື້ອສາຍຄາລະຍາດ ຂອງແກ່ນການນໍາອີກ, ສະນັ້ນແລ້ວການສໍ້ກົງນີ້ ມັນສິແກ້ໄຂໄຫ້ໝົດໄປໄດ້ແບບໃດ, ສະມາຊິກສະພາລອງພິຈາລະນາເບິ່ງໄຫ້ຄັກໆວ່າແມ່ແທ້ບໍ່, ສະນັ້ນແລ້ວຖ້າພວກທ່ານຢາກໄຫ້ມີການແກ້ໄຂໄຫ້ມັນໝົດໄປຢ່າງແທ້ຈິງແລ້ວ ຄືໄຫ້ແກ່ນນໍາພວກທີ່ມີອໍານາດ ຢູ່ໃນປະຈຸບັນນີ້ຢຸດຕິການ ບໍລິຫານປະເທດ ໃນທັນໄດແບ້ວໄຫ້ປະຊາຊົນ ທົ່ວປະເທດພາກັນອອກມາຮຽກຮ້ອງເອົາສິດຂອງໂຕເອັງ ແລ້ວທຸກຢ່າງມັນກໍຈະມີການຢຸດຕິລົງແນ່ນອນ ແລະຈະບໍ່ໄດ້ຍິນຄໍາວ່າສໍ້ກົງທີ່ດິນ, ສໍ້ກົງງົບປະມານ, ສໍ້ກົງທຸກໆຢ່າງທີ່ພວກເພີ່ນພາກັນສໍ້ກົງມາເປັນເວລາອັນຍາວນານນັ້ນ ອີກຕໍ່ໄປ, ແລະນີ້ລະຄືການຈົບຂອງການສໍ້ກົງອັນແທ້ຈິງ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Nov 20, 2019 06:42 AM

ເຕັມຫນ້າ