ເຂື່ອນນໍ້າອູ 7 ຈ່າຍຊົດເຊີຍ ສອງບ້ານ

ສຸພັດຕາ
2019-01-10
ອີແມວລ໌
ຄໍາເຫັນ
Share
ພິມ
ຊາວລາວ ທີ່ຫາປາ ຕາມລໍານໍ້າອູ ໃນເຂດແຂວງຜົ້ງສາລີ
ຊາວລາວ ທີ່ຫາປາ ຕາມລໍານໍ້າອູ ໃນເຂດແຂວງຜົ້ງສາລີ
RFA

ປະຊາຊົນ 2 ບ້ານ ເກືອບຮອດ 200 ຄອບຄົວ ທີ່ໄດ້ຮັບຜົນກະທົບ ຈາກເຂື່ອນນໍ້າອູ 7 ຢູ່ເມືອງແລະແຂວງ ຜົ້ງສາລີ ທີ່ຍັງລໍຖ້າໂຍກຍ້າຍ ນັ້ນໄດ້ຮັບຄ່າຊົດເຊີຍ ຄ່າທີ່ດິນທຳການຜລິດ ແລະຄ່າຜົລປູກຂອງຂະເຈົ້າແລ້ວ, ດັ່ງຄຳເວົ້າຂອງ ເຈົ້າໜ້າທີ່ທ້ອງຖິ່ນ ທ່ານນຶ່ງ ຜູ້ບໍ່ສົງອອກ ຊື່ແລະສຽງ ຕໍ່ວິທຍຸເອເຊັຍເສຣີ ໃນວັນທີ່ 10 ມົກກະຣາ ນີ້ວ່າ:

ອ່ານເອົາ "ເຂົາຊົດເຊີຍແລ້ວ ເຂົ້າກໍຈ່າຍເງິນສົດແລ້ວ ເຂົາກໍ່ເບິ່ງຕາມຜົລປູກ ຂອງພໍ່ແມ່ປະຊາຊົນ ແລ້ວຜູ້ໃດ ທີ່ວ່າປູກຫຼາຍ ກໍ່ໄດ້ຫຼາຍ ຜູ້ທີ່ມີ ສວນຫຼາຍກໍ່ໄດ້ຫຼາຍ ຜູ້ໃດມີສວນໜ້ອຍກໍ່ໄດ້ໜ້ອຍ ຜູ້ໄດ້ຫຼາຍກໍ່ໄດ້ 200-300 ລ້ານກີບ ຜູ້ໄດ້ໜ້ອຍກໍຮ້ອຍປາຍ ລ້ານ ຫຼື 50-60 ລ້ານກີບ ແນວນັ້ນແຫຼະ.”

ທາງຄນະຈັດສັນໄດ້ລົງມາເວົ້າ ເຣື່ອງການຊົດເຊີຍ ໃຫ້ຊາວບ້ານເມື່ອທ້າຍເດືອນ ຕຸລາ ປີກາຍ ແລະຈ່າຍຊົດເຊີຍເປັນເງິນສົດໃນວັນທີ 20 ຫາ 25 ທັນວາ ຜ່ານມາ ຊຶ່ງຈຳນວນເງິນນັ້ນ ຊາວບ້ານກໍເຫັນວ່າ ເໝາະສົມດີ ຍ້ອນຮວມທັງຄ່າຜົລປູກ ແລະຄ່າທີ່ດິນ ທຳການຜລິດ ພ້ອມກັນ ຄອບຄົວນຶ່ງໄດ້ຢ່າງໜ້ອຍ 50 ລ້ານກີບ.

ທ່ານກ່າວຕື່ມວ່າ ການຊົດເຊີຍນີ້ ເປັນພຽງການຊົດເຊີຍຣະຍະທຳອິດ ທາງບໍຣິສັດເວົ້າວ່າ ຈະມີການຊົດເຊີຍຕື່ມອີກ ເປັນດິນທຳການຜລິດ ຈຳນວນນຶ່ງ ຢູ່ເຂດບ້ານໃໝ່່ ຫຼັງຈາກໂຍກຍ້າຍໄປແລ້ວ ແຕ່ກໍຍັງສະຫຼຸບບໍ່ໄດ້ເທື່ອ ວ່າຈະໄດ້ຫຼາຍໜ້ອຍປານໃດ.

ຢ່າງໃດກໍຕາມເຖິງແມ່ນວ່າ ການຊົດເຊີຍຜູ້ໄດ້ຮັບຜົນກະທົບ ຢູ່ບ້ານຕາຕຸງ ແລະບ້ານສົບກັ້ງ ຈະສຳເຣັດແລ້ວ ແຕ່ປັດຈຸບັນ ຂະເຈົ້າກໍຍັງບໍ່ ສາມາດໄດ້ຍ້າຍເທື່ອ ຍ້ອນວ່າ ຄນະຈັດສັນເຂື່ອນ ຈັດສັນງົບປະມານດ້ານ ການໂຍກຍ້າຍໃຫ້ບໍ່ທັນ ຊຶ່ງຊາວບ້ານ ກໍຢາກຮ້ອງຂໍໃຫ້ບໍຣິສັດ ໂຍກຍ້າຍຂະເຈົ້າຢ່າງຮີບດ່ວນ ກ່ອນທີ່ນໍ້າອູເຂດບ້ານຂະເຈົ້າ ມັນຈະແຫ້ງ ຊຶ່ງຈະເຮັດໃຫ້ໂຍກຍ້າຍນັ້ນລຳບາກ.

ໂຄງການເຂື່ອນນໍ້າອູ 7 ເປັນເຂື່ອນໄຟຟ້າຂນາດ 210 ເມກາວັດ ເຣີ່ມກໍ່ສ້າງໃນປີ 2016 ຕາມແຜນຈະເຣີ້ມຕັນນໍ້າໃນປີ 2020 ແລະຫາກ ໃຊ້ການ ໄດ້ດີກໍຈະເຣີ້ມຜລິດໄຟຂາຍໃນປີ 2021 ອາຍຸການສັມປະທານ 29 ປີ ເຈົ້າຂອງໂຄງການ ແມ່ນບໍຣິສັດ ຊິໂນໄຮໂດຣ ຂອງຈີນ ຖືຫຸ້ນຮ່ວມກັບ ຣັຖວິສາຫະກິຈໄຟຟ້າລາວ ສ່ວນບ້ານທີ່ໄດ້ຮັບຜົນກະທົບ ມີທັງໝົດ 4 ບ້ານ ຈຳນວນເກືອບ 500 ຄອບຄົວ ໃນນັ້ນມີ ບ້ານສົບກັ້ງ ແລະບ້ານຕາຕຸງ ຮວມຢູ່ນຳ.

ເຕັມຫນ້າ