ເຂື່ອນເຊກະຫມານ 3 ສ້ອມແປງ ອຸມົງ

2019-01-29
ອີແມວລ໌
ຄໍາເຫັນ
Share
ພິມ
ດ້ານໜ້າຂອງໂຕເຂື່ອນ ເຊກະໝານ3 ທີ່ໄດ້ຮັບຄວາມເສັຽຫາຍ, ກ່ຽວກັບກໍຣະນີ ອຸມົງນໍ້າ ຂອງ ເຂື່ອນ ເຊກະໝານ3 ແຕກ ຢູ່ເມືອງດາກຈຶງ ແຂວງເຊກອງ ເມື່ອວັນທີ 16 ທັນວາ ທີ່ຜ່ານມາ ໄດ້ສ້າງ ຄວາມເສັຽຫາຍ ຫຼາຍ ຈົນຕ້ອງໄດ້ຢຸດ ການຜລິດໄຟຟ້າ ແບບ ບໍ່ມີກໍານົດ.
ດ້ານໜ້າຂອງໂຕເຂື່ອນ ເຊກະໝານ3 ທີ່ໄດ້ຮັບຄວາມເສັຽຫາຍ, ກ່ຽວກັບກໍຣະນີ ອຸມົງນໍ້າ ຂອງ ເຂື່ອນ ເຊກະໝານ3 ແຕກ ຢູ່ເມືອງດາກຈຶງ ແຂວງເຊກອງ ເມື່ອວັນທີ 16 ທັນວາ ທີ່ຜ່ານມາ ໄດ້ສ້າງ ຄວາມເສັຽຫາຍ ຫຼາຍ ຈົນຕ້ອງໄດ້ຢຸດ ການຜລິດໄຟຟ້າ ແບບ ບໍ່ມີກໍານົດ.
ຖ່າຍຮູບໂດຍ: ຄຳປົນ

ບໍຣິສັດສ້າງເຂື່ອນເຊກະໝານ 3 ຢູ່ເມືອງດາກຈຶ້ງ ແຂວງເຊກອງ ກໍາລັງສ້ອມແປງອຸມົງນໍ້າ, ຂອງເຂື່ອນທີ່ແຕກເມື່ອປີ 2016 ເພື່ອໃຫ້ແລ້ວ ໃນທ້າຍປີນີ້. ດັ່ງເຈົ້າໜ້າທີ່ຜແນກພລັງງານ ແລະບໍ່ແຮ່ ແຂວງເຊກອງ, ກ່າວຕໍ່ວິທຍຸເອເຊັຍເສຣີ ໃນວັນທີ 29 ມົກຣາ ນີ້ວ່າ:

“ເຂົາກໍາລັງສ້ອມແປງຢູ່ນັ້ນ, ບ່ອນມັນບໍ່ໄດ້ມາຕຖານ ຜ່ານມາຫັ້ນນະ, ຄືວ່າທ້າຍປີນີ້ນະ ທ້າຍປີ 2019 ຕ້ອງໄດ້ເປິດ, ມີແຕ່ຂັ້ນເທິງເພິ່ນ ຫັ້ນແລ້ວ ຢູ່ໃນຂນະປະຈໍາເຂົາລົງໄປ.”

ທ່ານກ່າວຕື່ມວ່າ ຫລັງຈາກອຸມົງແຕກ, ເຈົ້າຂອງໂຄງການແລະຣັຖບານລາວ ໄດ້ສຶບສວນສອບສວນ ເຖິງສາເຫດເມື່ອປີ 2017 ຈົນຮູ້ວ່າ, ຄອນກຣິດ (Concrete) ທີ່ນໍາມາສ້າງອຸມົງນໍ້ານັ້ນບໍ່ໄດ້ມາຕຖານ ແຕ່ຜູ້ຮັບຜິດຊອບການສອບສວນສືບສວນ ບໍ່ໄດ້ຣາຍງານ ສື່ມວນຊົນ ໃຫ້ຮູ້ແຕ່ຢ່າງໃດ.

ນອກຈາກນັ້ນ, ກໍຍັງມີບັນຫາເຣື້ອງ ການໂຍກຍ້າຍ ປະຊາຊົນບ້ານດາກຈຶ້ງ 100 ປາຍຄອບຄົວທີ່ອາສັຍຢູ່ໃຕ້ເຂື່ອນເຊກະໝານ 3 ພຽງ 3 ກິໂລແມດ, ທີ່ບໍ່ຍອມຍ້າຍອອກ ຍ້ອນພວກເຂົາເຈົ້າກັງວົນວ່າ ຫາກຍ້າຍໄປບ່ອນອື່ນ ຈະບໍ່ມີບ່ອນທໍາມາຫາກິນ ຄືຢູ່ບ້ານເດິມ:

“ເຣື້ອງໂຍກຍ້າຍ, ຄືຊິແມ່ນປະຊາຊົນບໍ່ຍອມໂຍກຍ້າຍຫັ້ນແຫລະ, ຢູ່ກະຢູ່ບໍ່ໄດ້ ຄັນບໍ່ຍ້າຍ ຖ້າວ່າມັນເກີດເດ້, ຊັບສິນເຈົ້າວ່າທໍ່ໃດ ຊີວິດ ອີກເດ້, ຊັບສິນອື່ນໆ ບາດນີ້ເຈົ້າວ່າເສັຍຫາຍ ທໍ່ໃດຫັ້ນ, ຈັກວ່າພາກຣັຖ ບໍ່ຮັບຜິດຊອບຫັ້ນນະ.”

ທ່ານວ່າຫາກຍ້າຍປະຊາຊົນ ໄປຢູ່ບ່ອນໃໝ່, ທາງໂຄງການຈະຕ້ອງສ້າງບ້ານ, ຈັດສັນທີ່ດິນ ແລະພັທນາໂຄງຮ່າງພື້ນຖານ ໃຫ້ພ້ອມ ເສັຍກ່ອນ, ແຕ່ມາຮອດທຸກມື້ນີ້ ຍັງບໍ່ມີຫຍັງເກິດຂຶ້ນເທື່ອ, ແລະວ່າຫາກຊາວບ້ານ ຍັງຢູ່ບ້ານເດີມ ກໍຈະມີຄວາມສ່ຽງສູງ ທີ່ຈະໄດ້ຮັບ ຜົນກະທົບ ຈາກ ເຂື່ອນເຊກະໝານ 3 ເມື່ອໂຄງການເປິດຜລິດໄຟຟ້າ ຊຶ່ງອາດຈະເຮັດໃຫ້ການຂຶ້ນລົງຂອງນໍ້າ ເຊກະຫມານ ຜິດປົກຕິ ການປູກພຶດ, ລ້ຽງສັດ, ຫາປູຫາປາ ຈະບໍ່ຄືເກົ່າ.

ອີກປັດໃຈນຶ່ງ, ທີ່ຈໍາເປັນຕ້ອງໂຍກຍ້າຍຊາວບ້ານ ອອກຈາກພື້ນທີ່, ກໍຍ້ອນວ່າຢູ່ເໜືອເຂື່ອນເຊກະຫມານ 3 ຂຶ້ນໄປບໍ່ຮອດ 30 ກິໂລແມັດ, ຈະມີການສ້າງເຂື່ອນຕື່ມອີກ 3 ແຫ່ງ ໂດຍເປັນໂຄງການລົງທຶນຂອງຈີນ.

ເຖິງຢ່າງໃດກໍຕາມ, ເຂື່ອນເຊກະໝານ 3 ເປັນເຂື່ອນຂນາດ 250 ເມກາວັດ, ມູນຄ່າການລົງທຶນ 173 ລ້ານດອນລ່າ ສະຫະຣັຖ, ໂດຍ ບໍຣິສັດໄຟຟ້າລາວ ຫຸ້ນສ່ວນ 15% ແລະ ບໍຣິສັດລົງທຶນ ພລັງງານວຽດນາມ-ລາວ 85%, ເຈົ້າຂອງຜູ້ດຽວກັບເຂື່ອນ ເຊກະຫມານ 1 ແຂວງອັຕຕະປື. ຮັບເຫມົາກໍ່ສ້າງໂດຍ ບໍຣິສັດສົງດາຂອງວຽດນາມ, ແລະພລັງໄຟ້ຟ້າ ທີ່ຜລິດໄດ້ນັ້ນ 90% ຈະສົ່ງໄປຂາຍໃຫ້ວຽດນາມ, ສ່ວນອີກ 10% ທີ່ເຫລືອນັ້ນ ຈະໃຊ້ພາຍໃນປະເທດ.

ເຕັມຫນ້າ