ເຂື່ອນໄຟຟ້າອີມູນ ກຳລັງ ປະເມີນຜົລ

ພູວົງສ໌
2019-01-11
ອີແມວລ໌
ຄໍາເຫັນ
Share
ພິມ
ບ້ານຈັດສັນ ເມືອງກະລຶມ ແຂວງເຊກອງ
ບ້ານຈັດສັນ ເມືອງກະລຶມ ແຂວງເຊກອງ
RFA?PN

ໂຄງການກໍ່ສ້າງເຂື່ອນໄຟຟ້າອີມູນ ຕັ້ງຢູ່ຣະຫວ່າງເມືອງກະລຶມ ແລະເມືອງດາກຈຶງ ແຂວງເຊກອງ ກຳລັງປະເມີນຜົລກະທົບ ດ້ານສິ່ງແວດ ລ້ອມແລະສັງຄົມ ຍ້ອນວ່າມີປະຊາຊົນ 7-8 ບ້ານ ໃນປະມານ 100 ປາຍຄອບຄົວ ຈະໄດ້ຮັບຜົລກະທົບຈາກການ ກໍ່ສ້າງເສັ້ນທາງ ຈາກ ຕົວເມືອງກະລຶມ ເຂົ້າໄປຫາພື້ນທີ່ໂຄງການ, ເຊິ່ງຫຼາຍຄອບຄົວ ຈະຕ້ອງໂຍກຍ້າຍອອກຈາກບ້ານເດີມ ໄປຢູ່ບ້ານຈັດສັນໃໝ່. ດັ່ງເຈົ້າໜ້າທີ່ ຜແນກພລັງງານ ແລະບໍ່ແຮ່ ແຂວງເຊກອງທ່ານນຶ່ງ ໄດ້ກ່າວຕໍ່ຜູ້ສື່ຂ່າວ ວິທຍຸເອເຊັຽເສຣີ ໃນມື້ນີ້ວ່າ:

“ຜົລກະທົບປະຊາຊົນມີປະມານ 7-8 ບ້ານນີ້ແຫຼະ, ສ່ວນຫຼາຍຜົລກະທົບມັນກະຂ້ອນຂ້າງໜ້ອຍຢູ່ດອກ, ລົງໄປເບິ່ງ ປະເມີນຄືນ ລົງໄປກວດ ກາໂຕຈິງ ຄນະກັມມະການກວດກາໂຕຈິງ ວ່າມັນຖືກເຮືອນປະຊາຊົນຈັກຫຼັງ ທາງຫັ້ນນ່າ. ຖືກປ່າເລົ່າທໍ່ໃດ ປ່າໄຮ່ ສວນທໍ່ໃດ ຫັ້ນນ່າ. ລະກະຊົດເຊີຍທໍ່ໃດ ອີງຕາມມັນໜ້ອຍມັນຫຼາຍຫັ້ນແຫຼະ."

ທ່ານກ່າວຕື່ມວ່າປະຈຸບັນ ເຂື່ອນໄຟຟ້າອີມູນ ຍັງບໍ່ທັນໄດ້ເຣີ້ມກໍ່ສ້າງໂຕເຂື່ອນເທື່ອ, ແຕ່ໄດ້ສ້າງເສັ້ນທາງ ຈາກຕົວເມືອງກະລຶມ ເຂົ້າໄປຫາ ໂຄງການແລ້ວ ໄລຍະທາງປະມານ 20 ກິໂລແມັດ ພ້ອມກັບປຸກສ້າງອາຄານ ແລະເຮືອນພັກສຳເຣັຈແລ້ວ.

ໃນຂນະທີ່ ບົດຣາຍງານຜົລກະທົບດ້ານສິ່ງແວດລ້ອມ ແລະສັງຄົມນັ້ນ, ຍັງຕ້ອງໄດ້ເຮັດຄືນອີກເທື່ອນຶ່ງ ຍ້ອນປະກົດວ່າ ມີປະຊາຊົນ ທີ່ຢູ່ ໃນເຂດໂຄງການ ກໍ່ສ້າງເຂື່ອນນັ້ນ ໄດ້ຮັບຜົລກະທົບຫຼາຍກວ່າ ທີ່ຄາດໄວ້ໃນເບື້ອງຕົ້ນ.

ສຳລັບຜົລກະທົບຈາກທີ່ດິນ ທີ່ໂຄງການສ້າງທາງໄປທັບດິນ ຂອງປະຊາຊົນ ນັ້ນສ່ວນຫຼາຍເປັນດິນ ທີ່ປະຊາຊົນນຳໃຊ້ລ້ຽງສັດ, ປູກພືດຜັກ ແລະປູກຕົ້ນໄມ້ກິນໝາກ, ເຊິ່ງຈະຕ້ອງໃຊ້ເວລາ 4-5 ເດືອນ ເພື່ອປະເມີນຜົລກະທົບຄືນ.

ຊາວບ້ານທ່ານນຶ່ງ ທີ່ເມືອງກະລຶມ ແຂວງເຊກອງ ໄດ້ກ່າວຕໍ່ຜູ້ສື່ຂ່າວ ວິທຍຸເອເຊັຽເສຣີ ໃນມື້ນີ້ວ່າ ພວກຕົນຮູ້ຂ່າວວ່າຈະມີການສ້າງເຂື່ອນ ໄຟຟ້າ, ແຕ່ພັດຍັງບໍ່ຮູ້ວ່າ ເປັນການສ້າງເຂື່ອນໂຕໃດ ແລະໃຫຍ່ປານໃດ ແຕ່ເມື່ອບໍ່ດົນຜ່ານມາ, ກໍໄດ້ຍິນຂ່າວ ຈາກຊາວບ້ານນຳກັນວ່າ ຈຳນວນນຶ່ງຍ້າຍອອກແລ້ວ ແຕ່ກໍບໍ່ຮູ້ວ່າ ຈະເປັນປະຊາຊົນ ໃນເຂດອີມູນ ຫຼືບໍ່:

“ໄດ້ຍິນຢູ່ເຂົາເຮັດເຂື່ອນ, ແຕ່ວ່າບໍ່ຮູ້ຊື່ ຈັກຊິແມ່ນເຂື່ອນທີ່ເຈົ້າຖາມນັ້ນບໍ່, ຕາມທີ່ໄດ້ຍິນເດີ້, ເຂົາກະຄືຈັ່ງວ່າໂຍກຍ້າຍ ປະຊາຊົນອອກຈາກ ແຖວນັ້ນລະເດ, ມັນບໍ່ແມ່ນເມືອງໃຫຍ່ ລະກະບໍ່ແມ່ນບ້ານໃຫຍ່. ບໍ່ຮູ້ວ່າຊິແມ່ນຜົລກະທົບຈາກເຂື່ອນບໍ່, ຫຼືວ່າເຂົາຊິເຮັດເຂື່ອນບໍ່, ກະບໍ່ຮູ້."

ປະຈຸບັນ, ໂຄງການກໍ່ສ້າງເຂື່ອນໄຟຟ້າອີມູນ ສ້າງໂຮງຈັກຜລິດໄຟຟ້າ, ຫ້ອງການສຳນັກງານ ສຳເຣັຈໄປແລ້ວ 100%, ເຫຼືອພຽງການເຈາະ ອຸໂມງ ຂ້າມພູ ແລະໂຕເຂື່ອນຫຼັກ, ເຊິ່ງບໍຣິສັດຈະເຣີນເຊກອງ ຈະດຳເນີນການ ໃຫ້ສຳເຣັຈພາຍໃນ 2 ປີ ນັບແຕ່ປີ 2019 ເປັນຕົ້ນໄປ.

ໂຄງການກໍ່ສ້າງເຂື່ອນໄຟຟ້າອີມູນມີຂນາດ 130 ເມກາວັດ ເປັນໂຄງການຮ່ວມທຶນຣະຫວ່າງ ບໍຣິສັດເກົາຫຼີໃຕ້ຖືຫຸ້ນ 70% ແລະ ບໍຣິສັດ ຈະເຣີນເຊກອງຂອງລາວຖືຫຸ້ນ 30%. ສ່ວນມູລຄ່າການລົງທຶນໃນໂຄງການເຂື່ອນໄຟຟ້າອີມູນ, ຜົລວິເຄາະ ການສຶກສາ ດ້ານສິ່ງແວດລ້ອມ EIA, ຣາຍລະອຽດຕ່າງໆ ຂອງໂຄງການ ບໍຣິສັດຜູ້ຮັບເໝົາບໍ່ໄດ້ເປີດເຜີຍ ແຕ່ຢ່າງໃດ. ໂຄງການນີ້, ໄດ້ຮັບອະນຸຍາດກໍ່ສ້າງໃນປີ 2016, ໂດຍທ່ານ ຄຳມະນີ ອິນທິຣາສ, ຣັຖມົນຕຣີກະຊວງພລັງງານ ແລະບໍ່ແຮ່, ມີບໍຣິສັດ Poyry Energy GmbH ປະເທສ Austria ເປັນທີ່ ປຶກສາໂຄງການ.

ເຕັມຫນ້າ