ຊັພສິນຂອງຣັຖທີ່ຖືກໂກງ ຈະຖືກ ທວງຄືນ

ຈຳປາທອງ
2016-12-11
ອີແມວລ໌
ຄໍາເຫັນ
Share
ພິມ
ການຣາຍງານຊັພສິນຂອງ ພະນັກງານຣັຖກອນ ໃຫ້ອົງການກວດສອບແຫ່ງຣັດ
ການຣາຍງານຊັພສິນຂອງ ພະນັກງານຣັຖກອນ ໃຫ້ອົງການກວດສອບແຫ່ງຣັດ
RFA/LX

ປັດຈຸບັນ ອົງການ ກວດສອບ ແຫ່ງຣັຖ ສປປລາວ ກຳລັງດຳເນີນ ການທວງເງິນ ຄືນຈາກ ເຈົ້າໜ້າທີ່ ທີ່ສໍ້ຣາສ ບັງຫລວງ ແລະ ຍັກຍອກ ເອົາເງິນຣັຖ ໄປເປັນຂອງ ສ່ວນຕົວ ຫລື ນໍາໄປໃຊ້ ໃນທາງທີ່ ບໍ່ຖືກຕ້ອງ ເຮັດໃຫ້ ງົບປະມານຂອງຣັຖ ສູນເສັຽ ຊຶ່ງຂນະນີ້ ຍັງບໍ່ສາມາດ ເປີດເຜີຍ ຣາຍຊື່ ຜູ້ທີ່ ກະທໍາຜິດ ໄດ້ເທື່ອ. ຕາມຄຳເວົ້າ ຂອງ ເຈົ້າໜ້າທີ່ ຣະດັບສູງ ຜູ້ບໍ່ປະສົງ ອອກຊື່ ຕໍ່ວິທຍຸ ເອເຊັຽເສຣີ ເມື່ີ່ອວັນທີ 8 ທັນວາ ນີ້ວ່າ:

"ພວກອົງການ ກວດສອບ ເຂົາລົງກວດ ແຕ່ລະແຂວງ ໂຕໃດ ທີ່ມັນເສັຽຫາຍ ແນວໃດ ກະຖືກໃຜ ກະຕ້ອງໄດ້ ທົດແທນຄືນ ໃນກໍຣະນີ ວ່າເອົາໄປ ເປັນ ເງິນສ່ວນຕົວ ນະ ຕ້ອງໄດ້ໃຊ້ຄືນ ຜູ້ທີ່ ຖືກຄະດີຫັ້ນ ກະບໍ່ທັນຮູ້ ລະອຽດ ວ່າແມ່ນໃຜ ຫັ້ນນະ ແຕ່ວ່າ ສາເຫດມັນ ກະຮູ້ແລ້ວ".

ພ້ອມດຽວກັນນັ້ນ ທ່ານກໍວ່າ ເຈົ້າໜ້າທີ່ ທີ່ເຮັດຄວາມຜິດນັ້ນ ຈະຖືກຕັດສິນ ລົງໂທດ ນັບຕັ້ງແຕ່ ໃຫ້ພັກການ ຊົ່ວຄາວ, ຖືກຍົກຍ້າຍ, ປົດຕຳແໜ່ງ, ໃຫ້ອອກການ ຈົນໄປເຖິງ ການດຳເນີນ ຄະດີ ຕາມຣະບຽບ ກົດໝາຍ ແລະຕັດສິນ ລົງໂທດ ໜັກເບົາ ຂຶ້ນຢູ່ ກັບຄວາມຜິດ ຂອງແຕ່ລະຄົນ.

ທ່ານກ່າວຕື່ມອີກວ່າ ການທີ່ຈະໃຫ້ ເຈົ້າໜ້າທີ່ ຜູ້ກະທຳຜິດ ໃຊ້ແທນ ເງິນຣັຖຄືນນັ້ນ ກໍມີສິ່ງ ທ້າທາຍ ຫລືວ່າ ຄວາມຫຍຸ້ງຍາກ ຫຼາຍຢ່າງ ຮວມທັງ ບາງຄົນອາຈບໍ່ຍອມ ຮັບຄວາມຜິດຂອງຕົນ. ແຕ່ເຖິງຢ່າງໃດກໍຕາມ ທ່ານກໍວ່າ ພາກສ່ວນ ທີ່ກ່ຽວຂ້ອງ ໃນການແກ້ໄຂ ບັນຫານີ້ ກໍ ຈະພຍາຍາມ ກວດສອບ ຢ່າງລະອຽດ ເພື່ອບໍ່ໃຫ້ ຜູ້ກະທຳຜິດ ລອຍນວນຢູ່ໄດ້.

ເມື່ອອາທິດທີ່ຜ່ານມາ ອົງການກວດສອບ ແຫ່ງຣັຖ ໄດ້ຣາຍງານວ່າ ກວດພົບ ເງິນ ທີ່ສູນເສັຍໄປ ຈຳນວນ 14 ຕື້ 5 ຮ້ອຍ ລ້ານກີບ ຈາກ ຄ່າທຳນຽມ ການສຳປະທານ ໂຄງການ ທີ່ຣັຖບາລ ໄດ້ອະນຸມັດ ໄປໃນສົກ ປີ 2013-2014. ແຂວງ ທີ່ເສັຽຫາຍ ຫຼາຍ ກວ່າໝູ່ ແມ່ນ ແຂວງ ໄຊຍະບູຣີ ທີ່ເສັຽຫາຍ ເຖິງ 2 ຕື້ 2 ຮ້ອຍ ລ້ານກີບ.

ຄໍາເຫັນ (3)
Share

ລາວ ຜູ້ນ້ອຍ

ການສໍ້ໂກງຫລາຍ ໝາຍເຖິງອຳນາດລັດ ບໍ່ແຂງພໍທີ່ຈະແກ້ໄຂ ມີແຕ່ເວົ້າ 100 ປິ ກະບໍ່ໄດ້ຜົນ, ຫາກທີ່ຜູ້ທີ່ມີອຳນາດ ໃນການຕັດສີນໃຈ ເຫັນແກ່ຜົນປະໂຫຍດຂອງຊາດ ຫລາຍກວ່າຂອງສ່ວນຕົນ ແລະ ພັກພວກຂອງຕົນ, ປະເທດຈະຈະເລີນກວ່ານີ້ຫລາຍ ແລະ ປະຊາຊົນຈະຍີນດີ ທີ່ຈະຈົງຮັກ ພັກດີ ຊ່ວຍພັກລັດ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Dec 15, 2016 05:50 PM

ສະມາຄົມພາກເໜືອ

ຈາກ ເມືອງໄຊຍະ

ຊັບສິນຂອງລັດຖືກໂກງ ມັນມີທົ່ວປະເທດ ໂດຍແມ່ນສະມາຊິກພັກນັ້ນແລ້ວ ເປັນຜູ້ນຳພາໂກງ ແຂວງໄຫ່ຍກ໋ມີກິນຫລາຍ ແຂວງນອ້ຍກ໋່ກິນນອ້ຍ ຜູ້ໃຫ່ຍກິນໃຫຍ່ ຜູ້ນອ້ຍກິນນອ້ຍ ຕາມລຳດັບ ມາຫາວ່າແຂວງໄຊຍະບູລີ ໂກງຫລາຍກວ່າໝູ່ ມັນບ໋່ແມ່ນ ໄຊຍະບູລີເປັນແຂວງນອ້ຍ ມີແຕ່ຜູ້ນອ້ຍ ຈຶ່ງສາມາດຄົ້ນຄວ້າ ສືບສວນເອົາລາຍລະອຽດໄດ້ ແລະເຫັນຫລາຍແຂວງໃຫ່ຍ ທີ່ໂກງຫລາຍ ບ໋່ສາມາດຕິດຕາມສືບຫາໄດ້ ເພາະມີລະດັບຜູ້ໃຫ່ຍ ຢູ່ໃນນັ້ນຢາກໃຫ້ມີຄວາມເປັນທຳ ກັບຜູ້ນອ້ຍແດ່ຢາ່ມາເອົາ ຄວາມຜິດແລະລົງໂທດນຳແຕ່ຜູ້ນອ້ຍ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Dec 13, 2016 03:45 PM

ເດັກລາວ

ຈາກ ເມືອງລັບແລ

ຂ້າພະເຈົ້າ ໄດ້ແຕ່ນັ່ງຄຶດຜູ້ດຽວວ່າ ເປັນຫຍັງ ເຈົ້າຫນ້າທີ ທີ່ກ່ຽວຂ້ອງ ຈຶ່ງອອກມາປະກາດແບບນີ້ ຮູ້ຈັກ ແລະ ເຂົ້າໃຈບໍ່ວ່າພວກຜູ້ກ່ຽວເວົ້າຫຍັງ? ພວກເຫລົ່ານີ້ ໄດ້ຮັບເວຖມົນ ອຳນາດຄາຖາວິເສດ ມາແຕ່ໃສ?


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]



[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Dec 12, 2016 02:19 PM

ເຕັມຫນ້າ