ຊາວນະຄອນຫຼວງອາຈໄດ້ ຈ່າຍຄ່າ ໄຟເຍືອງທາງ

ໄຊຍາ
2019-02-12
ອີແມວລ໌
ຄໍາເຫັນ
Share
ພິມ
ໄຟເຍືອງທາງ ຕາມຖນົນຫົນທາງ ໃນນະຄອນຫຼວງວຽງຈັນ
ໄຟເຍືອງທາງ ຕາມຖນົນຫົນທາງ ໃນນະຄອນຫຼວງວຽງຈັນ
ຮູບພາບຈາກ: ນັກຂ່າວພົລເມືອງ

ຣັຖບານລາວ ປະກາດວ່າ, ສາມາດຈຳໜ່າຍກະແສໄຟຟ້າອອກໄປຕ່າງປະເທດ, ມີຣາຍຮັບເຖິງ 1 ຕື້ປາຍໂດລາ ສະຫະຣັຖ, ພ້ອມທັງຕັ້ງ ເປົ້າໝາຍໃຫ້ປະເທດລາວ ກາຍເປັນ Battery Asean. ໃນຂນະທີ່ ຜູ້ຊົມໃຊ້ພາຍໃນປະເທດ ຍັງຈົ່ມວ່າຄ່າໄຟຟ້າ ໃນຄອບຄົວມີຣາຄາ ແພງ, ຖ້າສົມທຽບກັບຣາຍຮັບ, ທັງທີ່ເປັນຜູ້ຜລິດເອງ. ດັ່ງປະຊາຊົນ ຜູ້ທີ່ຊົມໃຊ້ໄຟຟ້າ ໄດ້ກ່າວຕໍ່ RFA ວ່າ:

"ໃນກໍຣະນີທີ່ວ່າເຮືອນຂ້ອຍໃນເດືອນນີ້, ຄ່າໄຟຟ້າມັນສາມແສນປາຍເນາະ, ທຸກເດືອນ, ຂ້ອຍຢູ່ມາບໍ່ຮອດສາມແສນປາຍຈັກເທື່ອ, ແຕ່ນ້ອຍ ຈົນຮອດໃຫຍ່, ຍັງບໍ່ເຄີຍຮອດເນາະຄ່າໄຟຟ້າ, ມາເວົ້າຄ່າໄຟຟ້າແຕ່ກີ້ຂ້ອຍໃຊ້ໄຟນ່າ, ເດືອນນຶ່ງ 40 ພັນ ຂຶ້ນມາ 50 ພັນ ຂຶ້ນມາ 60 ພັນ ເຂົາເວົ້າວ່າກົງເຕີ້ຂ້ອຍຕາຍ, ໄຟບໍ່ປິ່ນ ໄຟຄືຂຶ້ນທຸກເດືອນເນາະ."

ປະຊາຊົນໄດ້ກ່າວຕື່ມວ່າ, ຊຸມເພິ່ນໄດ້ເອົາໝໍ້ແບ່ງມາປ່ຽນໃຫ້ຂ້ອຍໃໝ່, ແຕ່ຄ່າໄຟມັນກາຂຶ້ນແສນປາຍ, ມາເດືອນນີ້ຂຶ້ນຮອດສາມແສນປາຍ, ຂ້ອຍຊິເອົາແຕ່ໃສມາຈ່າຍ, ຂ້ອຍອາສັຍກິນເງິນເດືອນກັບຜົວ, ສາມເດືອນໄດ້ເງິນເດືອນເທື່ອນຶ່ງ.

ເຖິງຈະມີແຫຼ່ງຜລິດພລັງງານຫຼາຍ, ແຕ່ກາຊ່ອຍຫຍັງປະຊາຊົນບໍ່ໄດ້, ແຕ່ພາກຣັຖກັບຈະເອົາພາລະມາໃຫ້ປະຊາຊົນ, ໂດຍສເນີແຜນການໃຫ້ ປະຊາຊົນ, ມີສ່ວນຮ່ວມໃນການຊ່ອຍຈ່າຍ ໜີ້ສິນໄຟເຍືອງທາງ, ທີ່ນະຄອນຫຼວງວຽງຈັນ ມີໜີ້ຄ້າງເຖິງ 42 ຕື້ກີບ. ຕໍ່ເຫດການດັ່ງກ່າວ, ເຈົ້າໜ້າທີ່ໄຟຟ້ານະຄອນຫຼວງວຽງຈັນ ກ່າວວ່າ, ໄຟຟ້າລາວຕ້ອງຫາຜູ້ຮັບຊອບ ເພື່ອຫຼຸດໜີ້ສິນກ້ອນນີ້ລົງ.

"ກ່ຽວກັບເຣື່ອງແສງສວ່າງ ໃນນະຄອນຫຼວງວຽງຈັນນີ້, ໜີ້ສິນ 40 ຕື້ ນີ້ກາແມ່ນໄດ້ຄົ້ນຄວ້າ ຫາວິທີທາງອອກຫຼາຍວິທີ, ເຮັດຈັ່ງໃດໃຫ້ໜີ້ ມັນໜ້ອຍລົງ. ດັ່ງນັ້ນ, ຕໍ່ມາກໍ່ໄດ້ມີຄນະກັມມະການຢູ່ນະຄອນຫຼວງນີ້, ໄດ້ປະຊຸມວິຊາການ ຣະຫວ່າງນະຄອນຫຼວງ ກັບວິຊາການກະຊວງ ການເງິນ, ເພື່ອກຽມໃຫ້ທາງຄນະຂັ້ນເທິງລົມກັນ, ໃນນັ້ນບັນເຣື່ອງໜີ້ສິນນີ້, ຈະເປັນໄປໄດ້ຢູ່ໃນຂໍ້ທີສອງເນາະ, ທີ່ໄດ້ລົມກັນ. ດັ່ງນັ້ນ, ມາຄົ້ນຄວ້ານຳກັນ, ຫາທາງອອກຫຼາຍວິທີ ວ່າຈະເຮັດແນວໃດໃຫ້ໜີ້ສິນຫຼຸດລົງ."

ທ່ານໄດ້ກ່າວຕື່ມວ່າ, ເຣື່ອງການໃຫ້ປະຊາຊົນຈ່າຍຊ່ອຍ, ແມ່ນໄດ້ນໍາສເນີໄປຍັງຂັ້ນເທິງແລ້ວ, ແຕ່ຍັງບໍ່ທັນໄດ້ປະຕິບັດເທື່ອ.

ທັງນີ້, ໜີ້ສິນຄ່າໄຟຟ້າທາງຫຼວງ ຫຼືໄຟເຍືອງທາງ  42 ຕື້ກີບ ຮວມເຖິງ ໜີ້ສວນສາທາຣະນະ 266 ຕື້ກີບ ແລະໜີ້ນໍ້າປະປາສາທາຣະນະ 227 ຕື້ກີບ ທາງນະຄອນຫຼວງວຽງຈັນ ໄດ້ສເນີໃຫ້ຣັຖບານ, ຕັ້ງງົບປະມານສະເພາະ ເພື່ອສຳລະທຸກເດືອນ ແລະ ເພີ່ມຂຶ້ນທຸກປີ ຕາມການ ຂຍາຍຂອງແສງສວ່າງຂອງໂຕເມືອງ.

ຕໍ່ກໍຣະນີດັ່ງກ່າວ, ທ່ານ ສົມດີ ດວງດີ ຮອງນາຍົກຣັຖມົນຕຣີ ຣັຖມົນຕຣີກະຊວງການເງິນ, ກ່າວໃນກອງປະຊຸມ ໂດຍຢືນຢັນວ່າ, ໜີ້ສິນ ຄ່າໄຟຟ້າເຍື່ອງທາງຄ້າງຈ່າຍ, ແມ່ນມອບໃຫ້ນະຄອນຫຼວງວຽງຈັນ ຮັບຜິດຊອບຈ່າຍ, ສ່ວນໜີ້ສິນໂຄງການລົງທຶນ ຂອງຣັຖ 46 ໂຄງການ ໃຫ້ແບ່ງຄວາມຮັບຜິດຊອບ, ໃຫ້ຈະແຈ້ງ ຖ້າຂຶ້ນກັບພາກສ່ວນໃດ, ມອບໃຫ້ພາກສ່ວນນັ້ນຮັບຜິດຊອບ.

ສະເພາະໜີ້ສິນໄຟເຍືອງທາງ, ມາເຖິງປັດຈຸບັນນະຄອນຫຼວງວຽງຈັນ, ຍັງບໍ່ທັນໄດ້ສຳລະເທື່ອ. ເຣີ່ມແຕ່ປີນີ້ເປັນຕົ້ນໄປ, ຣັຖບານຈະຊ່ອຍ ເຫຼືອພຽງຈຳນວນນຶ່ງ: ດັ່ງເຈົ້າໜ້າທີ່ ໄຟຟ້ານະຄອນຫຼວງກ່າວວ່າ:

"ທາງຣັຖບານເພິ່ນວ່າບໍ່ຊ່ອຍໃນເຣື່ອງສຳລະ, ແຕ່ຈະມອບໃຫ້ນະຄອນຫຼວງວຽງຈັນເປັນຜູ້ສຳລະ, ແຕ່ວ່າຊິສຳລະແນວໃດນັ້ນ, ໃຫ້ນະຄອນ ຫຼວງວຽງຈັນຊອກແຫຼ່ງງົບປະມານ, ທາງອື່ນສ່ວນໜີ້ແຕ່ປີ 2019 ເປັນຕົ້ນໄປນັ້ນ, ຣັຖບານຊິເຂົ້າມາຊ່ອຍ.

ທ່ານກ່າວຕື່ມວ່າ, ແຕ່ປີນີ້ເປັນຕົ້ນໄປ, ຣັຖບານຈະຊ່ອຍນະຄອນຫຼວງວຽງຈັນຈ່າຍຄ່າໄຟຟ້າ 5-10 ສ່ວນຮ້ອຍ, ສ່ວນໜີ້ເກົ່າທີ່ຄ້າງນັ້ນ ນະຄອນຫຼວງວຽງຈັນໄດ້ສເນີຕໍ່ກອງປະຊຸມສະພາ, ເມື່ອເດືອນພຶສຈິກາປີກາຍ ໃຫ້ປະຊາຊົນຈ່າຍຊ່ອຍ, 3 ພັນຫາ 5 ພັນກີບ ຕໍ່ຄອບຄົວ ຕໍ່ເດືອນ, ໃນຂອບເຂດ 300 ບ້ານ, ທີ່ໄດ້ຮັບບໍຣິການແສງສວ່າງ, ເພື່ອເປັນການແບ່ງເບົາການຈ່າຍໜີ້, ແຕ່ມາຮອດປັດຈຸບັນ, ສະພາຍັງບໍ່ ອະນຸມັດ. ຕໍ່ກັບຂໍ້ສເນີ ນີ້ປະຊາຊົນໄດ້ສະແດງຄວາມເຫັນວ່າ:

ຄວາມຄິດເຫັນທີ 1 "ສຸດທ້າຍກະປະຊາຊົນລາວເຮົາຕ້ອງຊ່ອຍຈ່າຍຄ່າໄຟຟ້າ, ແທນພາກຣັຖ, ຖ້າບໍຣິຫານປະເທດບໍ່ໄດ້ກະພາກັນລາອອກ ສະ, ສິພາກັນຢຸ່ໃນຕຳແໜ່ງກິນພາສີປະຊາຊົນໄປແຕ່ລະມືິ້ເຮັດຫຍັງ."

ຄວາມຄິດເຫັນທີ 2 "ຖືກແລ້ວໃຫ້ນະຄອນຫຼວງຈ່າຍສາທຸ, ພະນັກງານມີແຕ່ຜູ້ລວຍໆເດີ້, ຂໍໃຫ້ກວດເບິ່ງຄືນແດ່ເຈົ້າຄອງເດ້, ເບິ່ງຊື່ໆວ່າ ມີຫຍັງກະຢາກຂໍແຕ່ນໍາປະຊາຊົນນໍ້, ຈັ່ງໃດເວົ້າໄດ້, ຄວາມເມດຕາຈິດສໍານຶກດີໆບໍ່ມີນໍ້, ທີໃດ້ເກີດມາເປັນຄົນ, ບໍ່ອີ່ຕົນຄົນທຸກຍາກບໍ່, ປະຊາຊົນບາງຄົນບໍ່ມີຮອດເຂົ້າ ສິມ່າແລງໃດ໋ທ່ານເອີຍ."

ອີງຕາມບົດຣາຍງານ ຂອງສື່ທາງການລາວ, ທີ່ໄດ້ຣາຍງານຜົນຂອງກອງປະຊຸມຄົບຄນະນະຄອນຫຼວງວຽງຈັນ, ແລະກະຊວງການເງິນ ເມື່ອທ້າຍປີກາຍນັ້ນປະກົດວ່າ, ນະຄອນຫຼວງວຽງຈັນ ມີໜີ້ຄ້າງຈ່າຍມະຫາສານ, ບໍ່ສະເພາະແຕ່ໜີ້ຄ່າໄຟຟ້າ ເຍື່ອງທາງເທົ່ານັ້ນ, ທາງ ນະຄອນຫຼວງ ຍັງມີໜີ້ສິນໂຄງການໃຫຍ່ຣະດັບຊາດ 46 ໂຄງການ, ມູນຄ່າສະພາຮັບຮອງ 4 ພັນຕື້ກິບ ມູນຄ່າຕາມສັນຍາ 4,510 ຕື້ກີບ, ເຊິ່ງປະຕິບັດໄປແລ້ວ 70,60% ຍັງຄ້າງສຳລະ 3,515 ຕື້ປາຍກີບ, ແລະ ຍັງຄ້າງສຳລະ ຕາມວຽກສຳເຣັດ 2,189 ຕື້ກີບ.

ສ່ວນໂຄງການພັທນາສະເພາະ, ທີ່ນະຄອນຫຼວງຮັບຜິດຊອບມີ 426 ໂຄງການ, ມູນຄ່າສຳລະຕາມສັນຍາ 3,808 ຕື້ກີບ. ນອກຈາກນີ້, ນະຄອນຫຼວງຍັງມີໜີ້ສິນ ຄ່າກະແສໄຟຟ້າຊົລປະທານ ສູງເຖິງ 5 ຕື້ປາຍກີບ ໃນຈຳນວນນີ້ ນະຄອນຫຼວງສຳລະຄືນ ໄດ້ພຽງແຕ່ 321 ລ້ານກີບເທົ່ານັ້ນ.

ເຖິງຈະເປັນໜີ້ຄ່າໄຟເຍືອງທາງ ຫລາຍປານໃດກໍ່ຕາມ, ອີງຕາມການຣາຍງານຂອງ ຜແນກພລັງງານແລະບໍ່ແຮ່ນະຄອນຫຼວງ ເມື່ອປີ ຜ່ານວ່າ, ສະເພາະປີນີ້, ໄດ້ສຳເຣັດການຂຶ້ນແຜນ ປັບປຸງຣະບົບໄຟເຍືອງທາງຖນົນລ້ານຊ້າງ, ເຊິ່ງໂຄງການດັ່ງກ່າວ ມີມູນຄ່າເຖິງ 6 ຕື້ປາຍກີບ. ແຕ່ແຜນດັ່ງກ່າວນີ້ຍັງບໍ່ທັນໄດ້ປະຕິບັດ.

ປັດຈຸບັນ ຫ້ອງວ່າການປົກຄອງ ນະຄອນຫຼວງວຽງຈັນ ກຳລັງຊອກຫາແຫຼ່ງທຶນ, ເພື່ອມາຈ່າຍໜີ້ຄ່າກະແສໄຟຟ້າ ສາທາຣະນະ ຫຼື ໄຟເຍືອງທາງ, ໜີ້ສິນທີ່ກ່ຽວກັບການບໍຣິການ ສາທາຣະນະ ແລະໜີ້ສິນໂຄງການພັທນາໂຕເມືອງ   ດ້ວຍການຂໍຄວາມ ຊ່ອຍເຫຼືອລ້າ, ຈາກຄນະກັມມາທິການຮ່ວມມື ລາວ-ຈີນ. ນອກນີ້, ຍັງຕ້ອງໄດ້ຊອກຫາແຫຼ່ງທຶນອື່ນ, ຈາກທາງພາກເອກກະຊົນ, ທັງພາຍໃນ ແລະ ຕ່າງປະເທດ, ເພື່ອມາສຳລະໜີ້, ແຕ່ຍັງບໍ່ມີຄວາມເຊັດເຈັນ, ເພາະຕອນນີ້ຢູ່ໃນຂັ້ນຕອນການສເນີເທົ່ານັ້ນ.

ຄໍາເຫັນ (1)
Share

ລາວແທ້

ຈາກ Original Lao) 1000% (

the government should retire if they don't have sufficient knowledge and capability to govern/manage the country. Don't waste people's tax money.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Feb 13, 2019 12:24 PM

ເຕັມຫນ້າ