ຖນົນຕານມີໄຊ-ສີເກີດ ບໍ່ມີ ງົບປະມານ

ອຸ່ນແກ້ວ ສຸກສະຫວັນ
2019-02-13
ອີແມວລ໌
ຄໍາເຫັນ
Share
ພິມ
ເສັ້ນທາງ ຕານມີໄຊ-ສີເກີດ ນະຄອນຫຼວງວຽງຈັນ
ເສັ້ນທາງ ຕານມີໄຊ-ສີເກີດ ນະຄອນຫຼວງວຽງຈັນ
RFA

ການກໍ່ສ້າງເສັ້ນທາງແຕ່ສີ່ແຍກໄຟແດງ ຕານມີໄຊ ໄປຫາ ສາມແຍກສີເກີດ ມີຄວາມຊັກຊ້າ, ຍ້ອນມີບັນຫາທາງດ້ານການເງິນ, ແລະການຮື້ ສິ່ງກີດຂວາງ ໂດຍສະເພາະເຮືອນ ຂອງປະຊາຊົນທີ່ຢູ່ຕາມແລວເສັ້ນທາງ. ຫຼ້າສຸດ ເຈົ້າໜ້າທີ່ບໍຣິສັດຕັງຈະເລີນ ກໍ່ສ້າງຈຳກັດຜູ້ດຽວ, ທີ່ຮັບ ຜິດຊອບກໍ່ສ້າງເສັ້ນທາງດັ່ງກ່າວ, ໄດ້ເປີດເຜີຍເຖີງສາເຫດ ທີ່ເຮັດໃຫ້ການກໍ່ສ້າງຊັກຊ້າ. ທ່ານ ຄອງ ເຈົ້າໜ້າທີ່ບໍຣິສັດຕັງຈະເລີນ, ຜູ້ຮັບ ຜິດຊອບການກໍ່ສ້າງ ໄດ້ກ່າວ ຕໍ່ເອເຊັຽເສຣີ ໃນວັນທີ 11 ກຸມພາ ວ່າ:

"ສາເຫດທີ່ຊັກຊ້າ ແມ່ນມີຫລາຍກໍຣະນີ; 1.ລາຄາສິ່ງກີດຂວາງ ຕົກລົງກັນບໍ່ໄດ້ມີບາງຈຸດ [ຊາວບ້ານ] ຍັງບໍ່ທັນຍ້າຍອອກ, ແລະ 2.ຊັກຊ້າ ອີກອັນນຶ່ງ ກໍຄືງົບປະມານ, ຣັຖບານເພິ່ນຕອບສະໜອງໃຫ້ບໍ່ທັນ."

ທ່ານ ຄອງ ກ່າວຕື່ມອີກວ່າ:

"ໃນເບື້ອງຕົ້ນ, ການກໍ່ສ້າງເສັ້ນທາງ, ມີກຳນົດໃຫ້ສຳເຣັດໃນທ້າຍປີ 2018, ແຕ່ຫລັງຈາກມີບັນຫາທາງດ້ານງົບປະມານ ແລະ ການຮື້ສິ່ງ ກີດຂວາງ, ຣັຖບານ ຈຶ່ງໄດ້ຕໍ່ສັນຍາໃຫ້ບໍຣິສັດ, ໃຫ້ສ້າງໃຫ້ສຳເຣັດໃນເດືອນສິງຫາ ປີ 2019."

ປັດຈຸບັນບໍຣິສັດຍັງຄົງລໍຖ້າງົບປະມານ, ທີ່ຣັຖບານຊຳລະໃຫ້, ສ່ວນທີ່ສ້າງສຳເຣັດໄປກ່ອນແລ້ວ, ແລະ ການຮື້ສິ່ງກີດຂວາງ ອອກຈາກ ແລວທາງ ແມ່ນໜ້າທີ່ຮັບຜິດຊອບຂອງໜ່ວຍງານຂອງຣັຖບານ, ອີງຕາມ ທ່ານ ຄອງ. ບໍຣິສັດຕັງຈະເລີນຈະໄດ້ໃຊ້ຈ່າຍ ເງິນກໍ່ສ້າງກ່ອນ, ແລະຣັຖບານຈຶ່ງຈະຈ່າຍເງິນໃຫ້ຕາມພາຍຫລັງ, ໄລຍະການຈ່າຍຊຳລະແມ່ນ 7 ປີ ໃນອັດຕຣາດອກເບັ້ຽ 3.5 ເປີເຊັນ, ຊຶ່ງການຈ່າຍ ຊຳລະຈະເລີ້ມແຕ່ປີ 2017 ເປັນຕົ້ນມາ, ອີງຕາມໃບມອບສິດຂອງ ທ່ານ ທອງລຸນ ສີສຸລິດ ນາຍົກ ຣັຖມົນຕຣີ ໃນວັນທີ 29 ສິງຫາ 2016 ທີ່ເອເຊັຽເສຣີ ໄດ້ມາ.

ປະຊາຊົນຜູ້ທີ່ອາສັຍຢູ່ເຂດໃກ້ເສັ້ນທາງດັ່ງກ່າວ, ກໍໄດ້ຮັບຄວາມເດືອນຮ້ອນຈາກຂີ້ຝຸ່ນ, ຢ່າງຫລີກລ້ຽງບໍ່ໄດ້, ດັ່ງປະຊາຊົນທ່ານນຶ່ງໄດ້ກ່າວ ຕໍ່ເອເຊັຽເສຣີ ໃນວັນທີ 12 ກຸມພາ ວ່າ:

"ສຳລັບປັດຈຸບັນນີ້, ກະຫລາຍຢູ່ຂີ້ຝຸ່ນ, ແຕ່ຣົດຫົດນ້ຳເພິ່ນກະມາຫົດຢູ່, ແລະ ກະຕອນນີ້ ກຳລັງເຫັນເພິ່ນ ກະລັງກະກຽມ ກຳລັງຊິເທ ຄອນກຣີດ ແມ່ນຫຍັງຕື່ມຢູ່ໄດ໋, ເລື້ອງເດືອດຮ້ອນ ກະເວົ້າເລື້ອງການສັນຈອນບໍ່ສະດວກ ຫັ້ນແຫລະ ລະກະການຢູ່ ການຫຍັງຂອງ ພໍ່ແມ່ປະຊາຊົນ, ກະຊິບໍ່ສະບາຍ ກະຊິເປັນຫວັດ ກະຊິປະມານນັ້ນເນາະອ້າຍ."

ກ່ຽວກັບບັນຫາຂີ້ຝຸ່ນ, ບໍຣິສັດ ຜູ້ຮັບເໝົາກໍ່ສ້າງໄດ້ເລີ້ມຫົດນ້ຳປະມານ 3-4 ຄັ້ງຕໍ່ມື້ ເພື່ອຫລຸດຜ່ອນຂີ້ຝຸ່ນ ທີ່ສ້າງຄວາມລຳບາກໃຫ້ແກ່ ປະຊາຊົນທີ່ເດີນທາງ ແລະປະຊາຊົນຜູ້ທີ່ອາໃສຢູ່ໃກ້ແຄມທາງ, ອີງຕາມ ທ່ານ ຄອງ.

ການກໍ່ສ້າງເສັ້ນທາງແຕ່ສີ່ແຍກໄຟແດງ ຕານມີໄຊ ໄປຫາ ສາມແຍກສີເກີດ, ມີຄວາມຍາວ 9 ກິໂລແມັດ, ເລີ້ມມາແຕ່ເດືອນຕຸລາ 2016 ໃນມູນຄ່າການກໍ່ສ້າງ 45 ລ້ານໂດລາ ສະຫະຣັດ ແລະ ການກໍ່ສ້າງໄດ້ຢຸດສະງັກ ມາແຕ່ປີ 2018 ທີ່ຜ່ານມາ.

ຄໍາເຫັນ (1)
Share

(

Shame on you Lao party-state. How can you sleep at night ? How long are you going to exploit your people and your country? Don't you have enough money ? You can stop now and think of running properly your country or you can start running away from all the mess you've created.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Feb 14, 2019 06:06 AM

ເຕັມຫນ້າ