ຜູ້ໄດ້ສັມປະທານ ບໍ່ສົນໃຈ ບັນຫາຊາວບ້ານ

ຊາວບ້ານຢູ່ເມືອງນອງ ແຂວງສວັນນະເຂດ ທີ່ໄດ້ຮັບຜົລກະທົບ ຈາກການສັມປະທານທີ່ດິນ ເພື່ອທໍາການຜລິດກະສິກັມສົ່ງອອກ. ໃນນັ້ນຜູ້ສັມປະທານໄດ້ໄປຖົມເອົາດິນນາດິນສວນ ຂອງປະຊາຊົນຢູ່ເຂດໃກ້ຄຽງ, ໂດຍບໍ່ໄດ້ມີການຈ່າຍຄ່າຊົດເຊີຍໃຫ້ປະຊາຊົນ ມາຕັ້ງແຕ່ປີ 2017.

ນອກຈາກນີ້ຜູ້ສັມປະທານຍັງມີການຂັດແຍ່ງ ກັບປະຊາຊົນໃນພື້ນທີ່, ດັ່ງກໍຣະນີ ຫ້າມບໍ່ໃຫ້ປະຊາຊົນເຂົ້າໃນເຂດສັມປະທານ, ແລະ ຍັງຈັບງົວ ທີ່ເຂົ້າສວນມາປັບໃໝ ເປັນຕົ້ນ.

ຜ່ານມາຊາວບ້ານໃນເຂດນີ້ໄດ້ເຮັດເອກກະສານ ຍື່ນໄປຍັງເມືອງ, ເພື່ອໃຫ້ມາແກ້ໄຂກໍຣະນີ ນີ້ແຕ່ທາງການກໍ່ເມີນເສີຍ. ປັຈຈຸບັນ ທາງຊາວບ້ານເຂດດັ່ງກ່າວ ກໍຍັງທໍາມາຫາກິນຢູ່ເຂດນັ້ນ ເຊິ່ງຫຼາຍຄອບຄົວກໍຍັງລໍຖ້າໃຫ້ທາງການລົງມາຊ່ອຍແກ້ໄຂຂໍ້ຂັດແຍ່ງ ດັ່ງກ່າວ. ດັ່ງ ຊາວບ້ານທີ່ໄດ້ຮັບ ຜົລກະທົບໄດ້ໃຫ້ສັມພາດ ເຖິງເຣື່ອງດັ່ງກ່າວກັບ ເອເຊັຽເສຣີເມື່ອວັນ 29 ມົກຣາ 2021 ວ່າ.

ບົດສັມພາດ ຊາວບ້ານ:

ຕໍ່ກໍຣະນີທີ່ເກີດຂຶ້ນເຈົ້າໜ້າທີ່ ທີ່ກ່ຽວຂ້ອງໄດ້ກ່າວວ່າ: ບັນຫານີ້ເກີດຂຶ້ນມາໄດ້ 3 ປີແລ້ວ ທາງເມືອງນອງ ກໍຍາກທີ່ຈະແກ້ໄຂ, ຕ້ອງແມ່ນຂັ້ນແຂວງ ຫຼື ສະພາແຂວງສວັນນະເຂດ ເປັນຜູ້ເຂົ້າມາໄກ່ເກັ່ຍ ເພາະເອກກະສານຢັ້ງຢືນຍັງບໍ່ຣະອຽດ. ອີກດ້ານນຶ່ງ ກໍຕ້ອງຮ່ວມມື ກັບກອງທືນຫຼຸດຜ່ອນຄວາມທຸກຍາກ.

ສື່ທາງການລາວຣາຍງານວ່າ ສຳລັບບໍຣິສັດ ສຸກຮຸ່ງເຮືອງ ຂອງ ວຽດນາມ ໄດ້ທໍາການປູກໄມ້ກິນໝາກມາແຕ່ກາງປີ 2017 ໃນນັ້ນ ປູກກ້ວຍ 400 ເຮັກຕ້າ, ໝາກມັງກອນ 200 ເຮັກຕ້າ, ໝາກນອດ 50 ເຮັກຕ້າ ແລະ ປູກໝາກມີ້ ໝາກຂຽບ ອິກຈຳນວນນຶ່ງ ຢູ່ຂອບເຂດບ້ານນາລົງ ເມືອງນອງ ແຂວງສວັນນະເຂດ. ມູນຄ່າການລົງທຶນ 38 ລ້ານ ໂດລາ ສະຫະຣັຖ, ໃນນີ້ ສັມປະທານ ທີ່ດິນຢູ່ເຂດເມືອງນອງ 5,500 ເຮັກຕ້າ.