ບໍຣິສັດຫ້າງຮ້ານຊ່ອຍ ອາຫານ ຜູູ້ຂາດເຂີນ

ຈໍາປາທອງ
2020-04-17
Share
F-Free ປະຊາຊົນທີ່ອອກມາ ຖ້າເອົາເຄື່ອງກິນ ອາຫານແຫ້ງ ທີ່ມີບໍຣິສັດ ບໍຣິຈາກໃຫ້
ຮູບຈາກ : ນັກຂ່າວພົລເມືອງ

ໃນໄລຍະ ໂຄວິດ-19 ຣະບາດຢູ່ນີ້ ຫລາຍພາກສ່ວນ ຮວມທັງມຸລນິທີຕ່າງໆ ໃນສັງຄົມລາວ ພາກັນຊ່ອຍສິ່ງຂອງທີ່ຈໍາເປັນ ສໍາລັບຊີວິດ ປະຈໍາວັນ ເຊັ່ນເຂົ້າສານ ອາຫານແຫ້ງ ແກ່ປະຊາຊົນທີ່ຂາດເຂີນພໍໄດ້ ບັນເທົາຊົ່ວຄາວ.

ມຸລນິທິຈິດອາສາ ຮ່ວມໃຈພັທນາ ແລະສູນ Master Ruma International Meditation Center ໄດ້ສົມທົບທຶນເປັນຈໍານວນ 30 ລ້ານກີບ ຊື້ເຂົ້າສານ ອາຫານແຫ້ງ ຊ່ອຍເຫລືອປະຊາຊົນ ທີ່ຂາດເຂີນ ໂດຍມອບໃຫ້ອໍານາດການປົກຄອງບ້ານ ໃຫ້ນາຍບ້ານຄັດເລືອກ ວ່າສົມຄວນຈະຊ່ອຍຊາວບ້ານຜູ້ໃດ ຢູ່ໃນບ້ານປັກແຮດ ແລະບ້ານຈໍາປາ ເມືອງນາຊາຍທອງ ນະຄອນຫຼວງວຽງຈັນ ໃນວັນທີ 15 ເມສາ ນີ້, ອີງຕາມຄໍາເວົ້າຂອງເຈົ້າໜ້າທີ່ ມຸລນິທິຈິດອາສາ ຮ່ວມພັທນາ ຕໍ່ວິທຍຸເອເຊັຍເສຣີ ໃນມື້ວັນທີ 16 ເມສາ ນີ້:

”ພວກເຮົາໄປແຈກກໍແມ່ນເຂົ້າ ອຸປກອນບໍຣິໂພກ ຊ່ອຍເຫລືອຄອບຄົວ ທີ່ຂາດເຂີນນໍ ບໍ່ພຽງພໍ ພວກເຮົາໄດ້ໄປມອບໃຫ້ ການຈັດຕັ້ງບ້ານ ຄັດເລືອກ ເບິ່ງວ່າຄອບຄົວໃດທີ່ເຂົາເຈົ້າຂາດເຂີນນໍ ຖ້າຈະໃຫ້ທົ່ວ ຫລັງຄາເຮືອນ ພວກເຮົາກໍບໍ່ມີ ຄວາມສາມາດ ພວກເຮົາກະເລີຍນ້ອຍໆ ໄປກ່ອນຫັ້ນນະ.”

ພ້ອມດຽວກັນນັ້ນ ມຸລນິທິດັ່ງກ່າວ ກໍໄດ້ສົມທົບກັບໜ່ວຍງານຂອງທາງການ ທີ່ກ່ຽວຂ້ອງ ຊ່ອຍບໍຣິຈາກເຄື່ອງອຸປໂພກ ບໍຣິໂພກຕ່າງໆໃຫ້ ປະຊາຊົນ ຜູ້ເດືອດຮ້ອນ ໂດຍສະເພາະຜູ້ຫາເຊົ້າກິນຄໍ່າ ດັ່ງທີ່ທ່ານ ກ່າວວ່າ:

”ຊ່ວງໂຄວິດຣະບາດນີ້ ສ່ວນໃຫຍ່ມັນຈະເດືອດຮ້ອນພະນັກງານ ຜູ້ທີ່ຫ່ເຊົ້າກິນຄໍ່າ ຊາວຄ້າຊາວຂາຍ ບໍ່ມີໂອກາດໄດ້ຄ້າໄດ້ຂາຍມັນກະບໍ່ມີ ເຂົ້າບໍ່ມີນໍ້າກິນ ຕອນເຊົ້າບໍ່ໄດ້ຫາ ຕອນຄໍ່າຈະກິນຫຍັງຈັ່ງຊີ້ນະ ມັນຕ້ອງມີການເຂົ້າມາຊ່່ອຍ ກຸ່ມຄົນເຫລົ່ານັ້ນໃຫ້ໄດ້ ມີຢູ່ມີກິນໃນໄລຍະ ຊົ່ວຄາວ ໃນຊ່ວງຂອງໂຄວິດ.”   

ທ່ານກ່າວຕື່ມວ່າ ໃນໄລຍະນີ້ ທາງມຸລນິທິຈິດອາສາ ຮ່ວມໃຈພັທນາ ມີແຜນທີ່ຈະຝຶກອົບຮົມວິຊາຊີບ ໃນດ້ານກະສິກໍາ ໃຫ້ປະຊາຊົນແບບບໍ່ ໄດ້ເສັຍຄ່າ ເຊັ່ນການປູກເຫັດ ຢູ່ບ້ານປາກກວາງ ເມືອງປາກງື່ມ ນະຄອນຫລວງວຽງຈັນ ເພື່ອໃຫ້ຊາວບ້ານໄດ້ກິນ ແລະມີອາຊີບ.

ແລະເຈົ້າຂອງຮ້ານເຂົ້າປຽກໄກ່ຜູ້ໂຊກສາຂາ 5 ທີ່ໄດ້ຮັບການສົມທົບທຶນ ຈາກພາກສ່ວນອື່ນແດ່ ກໍໄດ້ເຮັດເຂົ້າກ່ອງໄປບໍຣິຈາກຕາມໂຮງໝໍ ສູນກັກກັນ ຢູ່ເມືອງສີໂຄດຕະບອງ ນະຄອນຫລວງວຽງຈັນ, ດັ່ງທີ່ ທ່ານກ່າວວ່າ:

ກະຊ່ວຍກັນແຫລະ ເຈົ້າຊ່ວງຍາມວິກິດ ເຮົາກະບໍ່ໄດ້ເອົາກໍາໄລຫຍັງຫລາຍ ເຮົາກະຮັບມາທີ່ເພິ່ນສັ່ງນໍາເຮົາຫັ້ນແຫຼະ ກະແລ້ວແຕ່ມື້ຄັນມີ ຜຸ້ບໍຣະຈາກ ມາຫລາຍ ເຮົາກໍເອົາໄປໃຫ້ໂຮງໝໍ ມີນ້ອງຕໍາຣວດມີ ໜ່ວຍກູ້ໄພ ພວກທີ່ວ່າກັກໂຕຢູ່ຕາມສູນ ເພິ່ນເຮັດກ່ຽວກັບໂຄວິດນີ້ນໍ.”

ສ່ວນຊາວໜຸ່ມລາວກຸ່ມນຶ່ງ ທີ່ນະຄອນຫລວງວຽງຈັນ ກໍໄດ້ລວມເຄື່ອງກິນ ເປັນເຂົ້າ, ປາ, ອາຫານແຫ້ງ ໄປບໍຣິຈາກໃຫ້ແພດໝໍຕາມໂຮງໝໍ ຕ່າງໆ ໃນນະຄອນຫລວງ ເພື່ອໃຫ້ມີກໍາລັງໃຈ ປະຕິບັດໜ້າທີ່ ວຽກງານຕ້ານໂຄວິດ-19:

”ຈຸດປະສົງກໍຢາກໄປຊ່ວຍ ພວກແພດ ພວກໝໍ ທິມງານທີ່ວ່າພວກເພິ່ນບໍ່ຄ່ອຍໄດ້ ພັກຜ່ອນຊ່ວງນີ້ ທີ່ວ່າຕ້ອງຕິດຕາມຄົນເຈັບ ໂຕນີ້ທີ່ເຮົາ ເອົາໄປ, ອາຫານກ່ອງນໍ ອາຫານສໍາເຣັດຮູບ ກະຈະມີພວກ ອາຫານແຫ້ງ ເຄື່ອງດື່ມສໍາເຣັດຮູບ ຈໍານວນນຶ່ງ ນໍ້າດື່ມອີ່ຫຍັງຈັ່ງຊີ້ເຂົ້າໄປ.”

ພ້ອມດຽວກັນນັ້ນ ກໍມີທິມງານນາງສາວສະຫວັນແບ່ງປັນໃຈ ໄດ້ຮ່ວມບໍຣິຈາກຜ້າອັດປາກອັດດັງ, ເຈວລ້າງມື ໃຫ້ແພດ ໝໍ ໜ່ວຍກູ້ພັຍ ແລະເຈົ້າໜ້າທີ່ ຕໍາຣວດ ຢູ່ສູນກັກກັນ ຜູ້ທີ່ມາຈາກປເທດໄທ ຢູ່ນະຄອນ ໄກສອນ ພົມວິຫານ ແຂວງສວັນນະເຂດ ເປັນມູນຄ່າ 4 ລ້ານປາຍກີບ. ແລະພາກສ່ວນອື່ນໆ ກໍບໍຣິຈາກສິ່ງຂອງ ໃຫ້ຜູ້ໄດ້ຮັບຄວາມເດືອດຮ້ອນ ຈາກການຣະບາດຂອງເຊື້ອພຍາດ ໂຄວິດ-19 ຢູ່ປະເທດລາວ ໃນຂນະນີ້ນໍາດ້ວຍ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ