ລາຍໄດ້ຈາກການທ່ອງທ່ຽວ ຫຼຸດລົງ 80%

ສຸພັດຕາ
2021-10-25
Share
ລາຍໄດ້ຈາກການທ່ອງທ່ຽວ ຫຼຸດລົງ 80% ວັດແສນສຸຂາຣາມ ເປັນ 1 ໃນວັດທີ່ມີຊື່ສຽງ ໃນນະຄອນຫຼວງພຣະບາງ ເມືອງມໍຣະດົກໂລກ.
RFA

ການແຜ່ຣະບາດຂອງໂຄວິດ-19 ໃນປີ 2020 ທີ່ຜ່ານມາ ເຮັດໃຫ້ປະເທດລາວ ສູນເສັຽລາຍຮັບຈາກການທ່ອງທ່ຽວ 80%, ດັ່ງເຈົ້າໜ້າທີ່ ກະຊວງຖແລງຂ່າວວັທນະທໍາ ແລະການທ່ອງທ່ຽວ ນະຄອນຫຼວງວຽງຈັນ ຜູ້ບໍ່ປະສົງອອກຊື່ ແລະຕໍາແໜ່ງທ່ານນຶ່ງ ກ່າວຕໍ່ວິເອເຊັຽເສຣີ ໃນວັນທີ 25 ຕຸລາ 2021 ນີ້ວ່າ:“ແຕ່ວ່າ ສ່ວນ 80% ແມ່ນໄດ້ຮັບຜົລກະທົບຮອບດ້ານຫັ້ນແຫຼະ ທັງດ້ານການເງິນ ທາງດ້ານໂຕເລກນັກທ່ອງທ່ຽວ ບໍ່ມີອີຫຍັງຕ່າງໆຫັ້ນເນາະ ຈໍານວນນຶ່ງກໍມີທ່າທີວ່າ ປິດກິຈການ ຫຼືວ່່າປິດໄປແລ້ວຈໍານວນນຶ່ງກໍມີ ແລ້ວກໍແຮງງານໃນຂແນງການ ທ່ອງທ່ຽວເຮົາກໍໄດ້ຮັບຜົລກະທົບ ຈໍານວນນຶ່ງກໍໄປເຮັດອາຊີບອື່ນແລ້ວເນາະ.”

ທ່ານກ່າວຕື່ມວ່າ ປັດຈຸບັນ ກະຊວງຖແລງຂ່າວ ວັທນະທັມ ແລະການທ່ອງທ່ຽວ ໄດ້ເຮັດວຽກຮ່ວມກັບກະຊວງສາທາຣະນະສຸຂ ກ່ຽວກັບການອອກມາຕການ ການເຂົ້າ-ອອກປະເທດຂອງນັກທ່ອງທ່ຽວ ທີ່ກ່ຽວກັບແນວທາງການເປີດຮັບນັກທ່ອງທ່ຽວຈາກຕ່າງປະເທດ. ຢ່າງໃດກໍຕາມ ໃນເບື້ອງຕົ້ນຄາດວ່າ ຈະມີການເປີດຮັບນັກທ່ອງທ່ຽວ ທີ່ເດີນທາງມາແບບເປັນກຸ່ມໃຫຍ່ກ່ອນ ຍ້ອນສາມາດຄວບຄຸມການເດີນທາງຂອງພວກເຂົາເຈົ້າໄດ້ງ່າຍກວ່າ ນັກທ່ອງທ່ຽວທີ່ເດີນທາງມາແບບບຸກຄົນ ຫຼືຄອບຄົວ.

ເມື່ອວັນທີ່ 21 ຕຸລາ ທີ່ຜ່ານມາ ທ່ານອຸ່ນທອງ ຂາວພັນ ຮອງຣັຖມົນຕຣີ ກະຊວງຖແລງຂ່າວ ວັທນະທັມ ແລະການທ່ອງທ່ຽວ ໄດ້ກ່າວໃນກອງປະຊຸມທາງໄກ ທີ່ຈັດຂຶ້ນ ຮ່ວມກັບອົງການສະຫະປະຊາຊາດເພື່ອການພັທນາ ຫຼື (United Nations for Development Program (UNDP)) ວ່າ ພາຍຫຼັງການແຜ່ຣະບາດ ຂອງໂຄວິດ-19 ໃນປີ 2020 ທີ່ຜ່ານມານີ້ ຈໍານວນນັກທ່ອງທ່ຽວ ຕ່າງປະເທດ ທີ່ເດີນທາງມາທ່ອງທ່ຽວ ພາຍໃນປະເທດລາວ ຫຼຸດລົງເຖິງ 75% ຊຶ່ງເຮັດໃຫ້ປະເທດລາວ ສູນເສັຽລາຍຮັບຈາກການທ່ອງທ່ຽວ 80%.

ການແຜ່ຣະບາດຂອງໂຄວິດ-19 ຍັງບໍ່ມີຄວາມເປັນໄປໄດ້ ທີ່ວ່າຈະຫຼຸດຜ່ອນລົງ ໃນໄລຍະມໍ່ໆນີ້ ທາງການລາວ ແລະພາກສ່ວນທີ່ກ່ຽວຂ້ອງ ຈຶ່ງໄດ້ຮ່ວມມືກັນ ໃນການອອກແຜນການ ສົ່ງເສີມການທ່ອງທ່ຽວ ດ້ວຍການຊ່ອຍເຫຼືອ ບັນດາທຸຣະກິຈທ່ອງທ່ຽວຕ່າງໆ ໃຫ້ກັບມາດໍາເນີນກິຈການ ຢ່າງມີມາຕຖານ ເພື່ອສ້າງຄວາມໝັ້ນໃຈ ໃຫ້ແກ່ນັກທ່ອງທ່ຽວ ໂດຍສະເພາະດ້ານສຸຂພາບ ຕລອດຈົນການສນັບສນູນ ພາກທຸຣະກິຈຂນາດນ້ອຍ, ດັ່ງເຈົ້າໜ້າທີ່ ກະຊວງຖແລງຂ່າວ ວັທນະທັມ ແລະການທ່ອງທ່ຽວ ແຂວງສວັນນະເຂດ ຜູ້ບໍ່ປະສົງອອກຊື່ ແລະຕໍາແໜ່ງ ທ່ານນຶ່ງ ກ່າວໃນມື້ດຽວກັນນີ້ວ່າ:

“ແຕ່ວ່າ ເຣື່ອງແຜນນະໂຍບາຍ ໃນການສົ່ງເສີມພາກທຸຣະກິຈ ເຮົາກະຈະມີຫຼາຍອັນຫັ້ນແຫຼະ  ເປັນຕົ້ນ ຕ້ອງໄດ້ຮ່ວມກຸ່ມກັບທຸຣະກິຈ ເບິ່ງເວົ້າເຣື່ອງການ ວຽກງານການບໍຣິການຫັ້ນ ວ່າເຮົາຈະເຮັດແນວໃດ ດຶງດູດນັກທ່ອງທ່ຽວ ຍົກໂຕຢ່າງວ່າ ຫຼຸດລາຄາຫ້ອງນອນບໍ ຫຼືຫຍັງ ອັນນີ້ກໍຍັງເປັນແຜນທີ່ວ່າ ຕ້ອງໄດ້ປຶກສາຫາລື.”

ສໍາລັບນະໂຍບາຍ ໃນການຟື້ນຟູການທ່ອງທ່ຽວ ຂອງປະເທດລາວ ໃນໄລຍະ 5 ປີ ລະຫວ່າງປີ 2021-2025 ນັ້ນ ໜ່ວຍງານທີ່ກ່ຽວຂ້ອງ ມີຈຸດປະສົງໃນການສົ່ງເສີມ ການທ່ອງທ່ຽວພາຍໃນປະເທດ ແລະການສົ່ງເສີມການທ່ອງທ່ຽວ ກັບປະເທດທີ່ມີຄວາມສ່ຽງຕໍ່າ ຫຼືສາມາດຄວບຄຸມການ ແຜ່ຣະບາດຂອງໂຄວິດ-19 ຢູ່ໃນຣະດັບດີ ຫຼື (Travel Bubble) ແບບເປັນມິດກັບສິ່ງແວດລ້ອມ ເຊິ່ງເປັນສ່ວນນຶ່ງຂອງແຜນການ ພັທນາເສຖກິຈ ແລະສັງຄັມແຫ່ງຊາດຄັັ້ງທີ່ 9, ດັ່ງເຈົ້າໜ້າທີ່ ອົງການພັທນສັງຄົມ ທ່ານນຶ່ງ ກ່າວວ່າ:

“ການທ່ອງທ່ຽວແບບສີຂຽວເນາະ ມັນຕ້ອງເວົ້າເຣື່ອງການອະນຸຮັກ ແຕ່ວ່າ ກະຊວງແຜນການແລະການລົງທຶນ ເກນທີ່ມັນໃຫ້ສົ່ງເສີມການລົງທຶນ ແຕ່ວ່າ ຝ່າຍການທ່ອງທ່ຽວ ຮັບຮອງບໍ່ໄດ້ເນາະ ເພາະວ່າການທ່ອງທ່ຽວແບບອະນຸຮັກ ມັນຕ້ອງເຮັດວຽກກັບປ່າສງວນ ມັນຕ້ອງໄປເຊື່ອມຍົງກັບຍຸທສາດປ່າໄມ້ ຂອງຣັຖບານ ເພີ່ມເນື້ອທີ່ປົກຄຸມຂອງຣັຖບານເພິ່ນ.”

ທາງດ້ານຫົວໜ່ວຍທຸຣະກິຈຕ່າງໆ ກໍມີຄວາມເຫັນຄືກັນວ່າ ພາຍຫຼັງການແຜ່ຣະບາດຂອງໂຄວິດ-19 ພາຍໃນປະເທດລາວຫຼຸດຜ່ອນລົງ ແລະທາງການລາວ ມີນະໂຍບາຍເປີດປະເທດແລ້ວ ກໍຢາກໃຫ້ທາງການລາວ ວາງມາຕການກວດຄົນເຂົ້າເມືອງ ຢ່າງເຂັ້ມງວດ ເພື່ອສ້າງຄວາມໝັ້ນໃຈ ດ້ານສຸຂພາບ ໃຫ້ແກ່ນັກທ່ອງທ່ຽວ, ດັ່ງເຈົ້າຂອງໂຮງແຮມ ຢູ່ນະຄອນຫຼວງວຽງຈັນ ທ່ານນຶ່ງ ກ່າວວ່າ:

ຄັນຖ້າວ່າ ຫຼັງໂຄວິດ-19 ພຸ້ນແຫຼະ ທາງດ້ານການຈັດສັນ ກໍໂດຍສະເພາະແມ່ນເຣື່ອງ ມາຕການທີ່ວ່າ ຈະໃຫ້ນັກທ່ອງທ່ຽວເຂົ້າມາຫັ້ນແຫຼະ ໃຫ້ທ່ອງທ່ຽວຮູ້ສຶກປອດໄພ ເພື່ອທີ່ຈະກ້າມາ ກ້າໄປ ເພື່ອທີ່ຈະມາໃຊ້ບໍຣິການ ຢູ່ໃນຂແນງທຸຣະກິຈ ຫຼືວ່າຮ້ານອາຫານທຸກຢ່າງຫັ້ນແຫຼະ ທີ່ໃຫ້ບໍຣິການທຸກຢ່່າງຫັ້ນນະ ຄ່ອຍສະບາຍໃຈ.”

ຂະນະດຽວກັນ ຜູ້ປະກອບການພາຍໃນປະເທດ ອີກຈໍານວນນຶ່ງ ກໍຢາກໃຫ້ພາກສ່ວນທີ່ກ່ຽວຂ້ອງ ໃຫ້ຄວາມສໍາຄັນ ກັບຣະບົບການຂົນສົ່ງພາຍໃນປະເທດ ແລະລະຫວ່າງປະເທດ ເພື່ອອໍານວຍຄວາມສະດວກໃຫ້ແກ່ນັກທ່ອງທ່ຽວ ທີ່ຕ້ອງການເດີນທາງມາປະເທດລາວ ໃຫ້ມີຄວາມຫຼາກຫຼາຍຂຶ້ນ, ດັ່ງຜູ້ປະກອບການຮ້ານອາຫານ ຢູ່ແຂວງຫຼວງພຣະບາງ ນາງນຶ່ງກ່າວວ່າ:

“ລາວເຮົາ ສ່ວນຫຼາຍກໍມາ ລາຍໄດ້ກໍມາຈາກນັກທ່ອງທ່ຽວເນາະ ຄັນບໍ່ມີເປີດສາຍການບິນ ບໍ່ມີນັກທ່ອງທ່ຽວມາ ກິຈການຕ່າງໆກໍຊິຟື້ນຟູລໍາບາກ ເພາະສະນັ້ນຖ້າວ່າ ທຸກຢ່າງປົກກະຕິແລ້ວ ຖ້າເພິ່ນເປີດສາຍການບິນເນາະ ມີນັກທ່ອງທ່ຽວເຂົ້າມາ ປະເທດລາວໄດ້ ກໍຊິດີຂຶ້ນ.”

ນະໂຍບາຍການການຟື້ນຟູ ການທ່ອງທ່ຽວຂອງປະເທດລາວ ໄລຍະ 5 ປີດັ່ງກ່າວນີ້ ມີຈຸດປະສົງ ເພື່ອປົກປ້ອງວຽກເຮັດງານທໍາ ແລະການຊ່ອຍເຫຼືອ ເພື່ອຟື້ນຟູ ຂແນງການທ່ອງທ່ຽວ ສ້າງຄວາມເຊື່ອໝັ້ນ ແລະສ້າງຄວາມເຂັ້ມແຂງໃຫ້ ຂແນງການດ້ານການທ່ອງທ່ຽວ ຮວມເຖິງການນໍາໄປໃຊ້ ໃຫ້ເປັນແນວທາງ ເພີ່ມຄວາມຫຼາກຫຼາຍ ຂອງຜລິດ ການບໍຣິການ ແລະຕລາດການທ່ອງທ່ຽວ, ອີງຕາມຄໍາກ່າວ ຂອງຍານາງ ຣິຄາດາ ຣີເກີ້ ຜູ້ຕາງໜ້າອົງການ UNDP ປະຈໍາປະເທດລາວ ໃນກອງປະຊຸມທາງໄກ ວ່າດ້ວຍແນວທາງການຟື້ນຟູການທ່ອງທ່ຽວ ພາຍຫຼັງການແຜ່ຣະບາດຂອງໂຄວິດ-19.

ອົງການອາຫານ ແລະ ການກະເສດຂອງສະຫະປະຊາຊາດ ຫຼື (Food and Agriculture Organization (FAO)) ໄດ້ປະເມີນໃນປີ 2020 ວ່າມີຄົນງານລາວປະມານ 50 ພັນຄົນ ຢູ່ໃນຂແນງການທ່ອງທ່ຽວຂອງລາວ ຫວ່າງງານ ຍ້ອນການແຜ່ຣະບາດຂອງໂຄວິດ-19.

ຄໍາເຫັນ (1)

ເບິ່ງຄວາມເຫັນທັງໝົດ.

ຄຳຕູ່ ໂພນໝີ
ຄຳຕູ່ ໂພນໝີ says:
Oct 26, 2021 08:35 PM

ຊິບໍ່ໃຫ້ຫຼຸດຈັ່ງໃດ ແນວບໍ່ເປີດປະເທກ ນັກທ່ອງທ່ຽວກະບໍ່ມາ. ຫາເງິນກະບໍ່ໄດ້ ທຸກຈົນພາກັນກິນແຕ່ເກືອແລ້ວ ແລ້ວອີກສອງເດືອນຂ້າງໜ້າ ຄົງໄດ້ກິນດິນກິນຫຍ້າພໍດີ

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ