ຊຸດນັກຮຽນ ແລະ ອຸປະກອນການຮຽນ ແພງຂຶ້ນ

ຜູ້ປົກຄອງນັກຮຽນ ຕ້ອງຊື້ຂຸດນັກຮຽນ ແລະ ອຸປະກອນການຮຽນໃນລາຄາທີ່ແພງຂຶ້ນ ສໍາລັບສົກສົກຮຽນໃໝ່ ທີ່ເປີດໃນເດືອນກັນຍານີ້.

ໃນວັນທີ 2 ກັນຍາ ເປັນມື້ເປີດສົກຮຽນໃໝ່ 2024-2025 ທົ່ວປະເທດລາວ, ແຕ່ ລາຄາຊຸດນັກຮຽນ ແລະ ອຸປະກອນການຮຽນກໍແພງຂຶ້ນ ເປັນຕົ້ນ ສິ້ນນັກຮຽນຊັ້ນປະຖົມລາຄາຝືນລະ 89,000 – 100,000​ ກີບ ໃນປີນີ້ ຈາກແຕ່ກ່ອນ ລາຄາ 69,000​ ກີບ.

ສ່ວນວ່າເກີບຜ້າໃບຍີ່ຫໍ້ Tiger ຄູ່ນຶ່ງ ຂຶ້ນຈາກ 80,000​ ກີບ ມາເປັນ 119,000-130,000 ກີບ.

ປື້ມຂະໜາດ 200 ໜ້າ ຫໍ່ນຶ່ງ ມີຫົວ 10 ຫົວ ຂຶ້ນຈາກ 90,000 ກີບ ມາເປັນ 95,000 – 140,000​ ກີບ.

ຊຸດນັກຮຽນ ແລະ ອຸປະກອນການຮຽນ ຈະມີລາຄາທີ່ແຕກຕ່າງກັນ ຂຶ້ນກັບແຕ່ລະພື້ນທີ່, ແຕ່ ຖ້າສັ່ງຊື້ອອນລາຍ ລາຄາຈະຖືກກວ່າ ໄປຊື້ຢູ່ຮ້ານ. 

ພໍ່ ແມ່ ບາງຄົນ ຢູເຂດຊົນນະບົດ ກໍບໍ່ໄດ້ຊື້ຊຸດຮັກຮຽນໃຫ້ລູກຍ້ອນວ່າ ມີຖະນະທຸກຍາກ ແລະ ບໍ່ໄດ້ເຮັດວຽກຫາລາຍໄດ້ຫຍັງ.

ຜູ້ປົກຄອງນັກຮຽນຄົນນຶ່ງ ໄດ້ກ່າວວ່າ: 

“ຍັງບໍ່ໄດ້ຊື້ເລີຍ ອາດຊິບໍ່ໄດ້ຊື້ແຫຼະ ເພາະວ່າ ນ້ອງກໍຍັງໜ້ອຍ ສ່ວນຫຼາຍກໍມີແຕ່ເຂົາໃຫ້ ແລ້ວມັນແພງເດ້ ບາດນີ້ ແລ້ວເງິນເຮົາ ມັນມີບໍ່ຫຼາຍ ມັນກໍໄດ້ເຄື່ອງບໍ່ຄົບ ບໍ່ຄືແຕ່ກີ້ ກໍໍບໍ່ໄດ້ຕີລາຄາວ່າ ຖານະທຸກຍາກ ແຕ່ວ່າ ກໍຂາດເຂີນ ມີວຽກເຮັດ ແຕ່ວ່າ ລາຍໄດ້ບໍ່ຫຼາຍ 30 ພັນ ກີບ ຕໍ່ມື້ ມັນກໍເສັຍເວລາເຮົາເຮັດ.”

ຜູ້ປົກຄອງນັກຮຽນ ທີ່ບໍ່ສາມາດຊື້ຊຸດນັກຮຽນໃຫ້ລູກທຸກໆ ປີ ກໍເລືອກທີ່ຈະໃຫ້ລູກນຸ່ງຊຸດເກົ່າຈາກ ປ.1-ປ.3, ຈົນກະວ່າ ລູກຂຶ້ນຮຽນຮອດ ປ.4 ປ.5 ແລ້ວຈຶ່ງຕັດສິນໃຈຊື້.

ຜູ້ປົກຄອງນັກຮຽນຄົນນຶ່ງ ໄດ້ກ່າວວ່າ:

“ບໍ່ມີເງິນຊື້ ເຣດເງິນມັນຂຶ້ນ ແລ້ວກໍມາກົດເງິນເກີບເຮົາ ອ່ອນຄ່າລົງຫັ້ນນ່າແມະ ເຄື່ອງເກົ່າຫັ້ນແຫຼະ ລາວຊື້ດົນແລ້ວເດ້ ລາວກໍຍາກໄດ້ໃໝ່ ມັນກໍເກົ່າຫຼາຍປີແລ້ວ ແຕ່ ປ.1 ເດ້ ປ.2 ປ.3 ກໍໃຊ້ອັນເກົ່າ ຕົວນັ້ນຢູ່ ບາດນີ້ ຊິຂຶ້ນ ປ.4 ປ.5 ຫັ້ນນ່າ ຄັນວ່າ ບໍ່ໄດ້ແທ້ ເພິ່ນກໍຊິຊື້ ຫັ້ນນ່າ ຊິຊອກເງິນຊື້ ຫັ້ນນ່າເນາະ.”

ນັກຮຽນທີ່ມີຖານະທຸກຍາກ ບາງຄັ້ງກໍໄດ້ຮັບເຄື່ອງຊ່ວຍເຫຼືອ ເປັນຊຸດນັກຮຽນ ຫຼື ກະເປົ໋າ, ແລະ ບາງຄັ້ງ ຄູກໍເອົາເຄື່ອງມາແຈກໃຫ້.

ນັກຮຽນຊັ້ນມັດທະຍົມປາຍ ຄົນນຶ່ງ ໄດ້ກ່າວວ່າ:  

“ບາງຄົນກໍບໍ່ມີ ກໍບໍ່ໃສ່ ໃສ່ເຄື່ອງທໍາມະດາໄປ ບາງເທື່ອ ຄູເຂົາເຈົ້າ ກໍເອົາໃຫ້ ທຸກປີ ຄູອາຈານ ກໍຊິແຈກໃຫ້ ຊິແມ່ນຄອບຄົວທຸກຍາກ ຫຼື ແບບບໍ່ມີພໍ່ແມ່ ອີ່ຫຍັງຈັ່ງຊີ້ ເປັນເດັກແບບກໍພ້າ.”

ເຖິງຢ່າງໃດກໍຕາມ ສໍລັບນັກຮຽນທີ່ມີໃບຢັ້ງຢືນ ຈາກທາງການວ່າ ມີຖານະທຸກຍາກ ກໍຈະໄດ້ການສະໜັບສະໜູນ ຈາກພາກລັດ ເປັນຕົ້ນ ບິກ ປຶ້ມຂຽນ ແລະ ຖ້ານັກຮຽນມາມີຖານະທຸກຍາກແທ້ໆ ພາກລັດກໍຈະສະໜັບສະໜູນຊຸດນັກຮຽນ ແລະ ກະເປົ໋ນຮຽນ ນໍາອີກ ສ່ວນວ່າເກີບ ກໍຍັງກຸ້ມຕົນເອງ. ນາຍຄູ ຢູ່ເມືອງເງິນ ແຂວງໄຊຍະບູລີ ໄດ້ກ່າວວ່າ:

“ທາງໂຮງຮຽນ ກໍບໍ່ມີນະໂຍບາຍຫຍັງ ມີແຕ່ວ່າ ເກັບກໍາຂໍ້ມູນ ແລ້ວໝົດແລ້ວ ແລ້ວຈະສົ່ງຂໍ້ມູນຫັ້ນ ໄປໃຫ້ຫ້ອງການສະຫະພັນແມ່ຍິງ ກໍມີກອງທຶນນຶ່ງ ຊ່ວຍແຕ່ບິກ ແຕ່ປຶ້ມ ນີ້ແຫຼະ ຜູ້ທີ່ອະນາຖາແທ້ໆ ນີ້ ມີແຕ່ເຮົາສົ່ງລາຍຊື່ໄປ ບາງເທື່ອເພິິ່ນຊິມາກວດເບິ່ງໂຕຈິງ ຫຼັງຈາກນັ້ນ ເພິ່ນ ກໍບາງເທື່ອ ເພິ່ນກໍໍຊີໃຫ້ກະເປົ໋າ ບາງເທື່ອເພິ່ນກໍໃຫ້ແຕ່ໂສ້ງ ແຕ່ເສື້ອ ເກີບກໍກຸ້ມຕົນເອງເຈົ້າ.”

ນອກຈານ ນັ້ນ ເຖິງວ່າ ພໍ່ ແມ່ ຜູ້ປົກຄອງນັກຮຽນ ບໍ່ມີເງິນຊື້ ຊຸດນັກຮຽນ ແລະ ອຸປະກອນການຮຽນ ໃຫ້ລູກຫຼາຍ ແຕ່ໃນນັ້ນ ຈໍານວນບໍ່ໜ້ອຍ ກໍຍັງສົ່ງລູກຫຼານ ໄປໂຮງຮຽນ ໂດຍໃຫ້ລູກຫຼານ ໃສ່ຊຸດນັກຮຽນ ແລະ ເກີບຄູ່ເກົ່າໄປກ່ອນ ຫຼື ຖ້າບໍ່ມີແທ້ໆ ກໍຈະໃຫ້ລູກຫຼານ ໃສ່ຊຸດທໍາມະດາ ທີ່ໃສ່ໄປໄຮ່ ໄປສ່ວນ ຫຼື ຊຸດຊົນເຜົ່າໄປໂຮງຮຽນແທນ.

ສ່ວນປຶ້ມຂຽນ ບິກ ແລະ ກະເປົ໋າ ນັກຮຽນ ເປັນສິ່ງຈໍາເປັນ ທີ່ພໍ່ແມ່ຜູ້ປົກຄອງ ຈະຕ້ອງໄດ້ຊອກເງິນຊື້ ໃຫ້ລູກຫຼານ ໂດຍສະເພາະ ປຶ້ມຂຽນ ພໍ່ແມ່ ຈະຊື້ໃຫ້ລູກພຽງແຕ່ ຜູ້ລະ 2-3 ຫົວ ໃນຂະນະທີ່ ວິຊາຮຽນມີຫຼາຍກວ່າ 2-3 ວິຊາ.

ບັນຫາທາງດ້ານເສດຖະກິດ ແລະ ຄວາມທຸກຍາກ ເຮັດໃຫ້ມີນັກຮຽນປະລະການຮຽນເປັນຈໍານວນຫຼາຍ, ໂຕຢ່າງ ຢູ່ໂຮງຮຽນມັດທະຍົມແຫ່ງນຶ່ງ ຢູ່ເມືອງໂຂງແຂວງຈໍາສັກ ໃນສົກຮຽນປີ 2022-2023 ມີນັກຮຽນປະມານ 500 ຄົນ ແຕ່ ສົກຮຽນ 2023-2024 ເຫຼືອນັກຮຽນພຽງແຕ່ 200 ປາຍຄົນ ຍ້ອນວ່າ ນັກຮຽນຫຼາຍຄົນ ພາກັນອອກໂຮງຮຽນ ແລ້ວໄປຫາເຮັດວຽກຢູປະເທດໄທ.