ຄົນງານລາວສ່ວນຫຼາຍ ຍັງບໍ່ຢາກເຮັດວຽກ ໃນເຂດເສດຖະກິດ ພິເສດ ຢູ່ລາວ

ປັດຈຸບັນ ປະເທດລາວ ມີເຂດເສດຖະກິດພິເສດ 21 ແຫ່ງ ທີ່ຕັ້ງຢູ່ 7 ແຂວງ ຄື ນະຄອນຫລວງວຽງຈັນ, ບໍ່ແກ້ວ, ຫຼວງນໍ້າທາ, ອຸດົມໄຊ, ຄໍາມ່ວນ, ສະຫວັນນະເຂດ ແລະຈໍາປາສັກ. ໃນເຂດດັ່ງກ່າວ ມີບໍລິສັດຕ່າງປະເທດ ແລະພາຍໃນ ລົງທຶນແລ້ວ 1,643 ບໍລິສັດ ຄືບໍລິສັດພາຍໃນ 218 ບໍລິສັດ, ບໍລິສັດຕ່າງປະເທດ 1,350 ບໍລິສັດ ແລະບໍລິສັດຫຸ້ນສ່ວນ ຂອງພາຍໃນ ແລະຕ່າງ ປະເທດ 75 ບໍລິສັດ. ເຂດເສດຖະກິດພິເສດທັງໝົດນີ້ ສ້າງວຽກເຮັດ ໃຫ້ຄົນລາວໄດ້ 40 ພັນປາຍຄົນ.

ແຕ່ຄົນງານລາວ ບໍ່ສົນໃຈທີ່ຈະເຮັດວຽກ ນໍາບໍລິສັດນັ້ນຫຼາຍປານໃດ ຍ້ອນຄ່າແຮງງານຕໍ່າຫຼາຍ, ບໍ່ກຸ້ມກິນ, ບໍ່ສາມາດລ້ຽງຄອບຄົວໄດ້. ຫາກທຽບໃສ່ວຽກແມ່ບ້ານ ລະຫວ່າງຢູ່ລາວ ແລະໄທ, ຢູ່ລາວ ຈະໄດ້ເງິນເດືອນປະມານ 2,500,000 ກີບຫາ 3,000,000 ກີບ. ແຕ່ວຽກແມ່ບ້ານຢູ່ປະເທດໄທ ຈະໄດ້ເຖິງ 12,000-13,000 ບາດ ຫຼື 7,000,000 ລ້ານກີບຕໍ່ເດືອນ, ອິງຕາມຄໍາເວົ້າ ຂອງຄົນງານລາວ ຢູ່ນະຄອນ ຫຼວງພະບາງ ແຂວຫຼວງພະບາງນາງນຶ່ງ ຕໍ່ວິທຍຸເອເຊັຽເສຣີ ໃນມື້ວັນທີ 14 ສິງຫານີ້.

“ໄປຝັ່ງໄທ ແມ່ນ ຄ່າຈ້າງມັນຫຫລ່າຍກວ່າຢູ່ນີ້ ມັນບໍ່ກຸ້ມກິນ ລູກແດ່ລູກ 2-3 ຄົນແດ່ ແບບວຽກແມ່ບ້ານອິຫຍັງຈັ່ງຊີ້ນ່າ 3 ລ້ານ 2,500,000 ນີ້ ບໍ່ໄດ້ຫລາຍ ຢູ່ໄທ 12,000-13,000 ບາດ 7 ລ້ານກີບພຸ້ນເນາະ.”

ຢູ່ແຂວງສະຫວັນນະເຂດ ໃນເຂດເສດຖະກິດພິເສດ ສະຫວັນ-ເຊໂນ ກໍຍັງຂາດເຂີນຄົນງານຫຼາຍ ຊຶ່ງສ່ວນນຶ່ງ ກໍຍ້ອນຄົນງານລາວ ຢູ່ແຂວງນີ້ ອອກໄປເຮັດວຽກຢູ່ຕ່າງປະເທດ ເປັນຕົ້ນຢູ່ໄທຢ່າງຫຼວງຫຼາຍ. ສະເພາະເມືອງ ອຸທຸມ ພອນ ເມືອງດຽວ ກໍມີເຖິງ 6,000 ປາຍຄົນ ທີ່ໄປເຮັດວຽກຢູ່ປະເທດໄທ ຂະນະທີ່ຄົນງານອີກຈໍານວນນຶ່ງ ກໍຢາກໄປເຮັດວຽກ ຢູ່ເກົາຫຼີໃຕ້ ແລະຍີ່ປຸ່ນ.

ເຈົ້າໜ້າທີ່ ຫ້ອງການແຮງງານ ແລະສະວັດດິການສັງຄົມເມືອງ ຢູ່ແຂວງສະ ຫວັນນະເຂດ ນາງນຶ່ງ ເວົ້າໃນມື້ດຽວກັນນີ້ວ່າ ໂຮງງານຕ່າງໆ ໃນເຂດເສດ ຖະກິດພິເສດ ສະຫວັນ-ເຊໂນ ຊຶ່ງມີທັງໂຮງງານຂອງຈີນ ແລະການາດາ ໄດ້ຂໍໃຫ້ທາງຫ້ອງການ ແຮງງານ ແລະສະວັດດິການສັງຄົມ ຊ່ວຍແກ້ໄຂບັນຫາການຂາດເຂີນຄົນງານ ແຕ່ກໍບໍ່ມີຄົນງານລາວ ສົນໃຈ ເພາະໄດ້ຄ່າແຮງງານໜ້ອຍ. ຍ້ອນເປັນຄືແນວນັ້ນໂຮງງານເຫຼົ່ານີ້ ຈຶ່ງຕ້ອງໄດ້ນໍາເອົາຄົນງານ ມາຈາກປະເທດພະມ້າ ເຂົ້າມາເຮັດວຽກແທນ.

“ລະດັບໂຮງຈັກໂຮງງານ ກໍຍັງຂາດເຂີນແຮງງານເພາະວ່າ ຖ້າທຽບໃສ່ດຽວນີ້ ມັນເວົ້າຄ່າເງິນເນາະ ໄປເຮັດວຽກຝັ່ງໄທ ກໍໝື່ນປາຍ ກໍຕົກຢູ່ 10 ລ້ານຫລືວ່າ 7-8 ລ້ານແລ້ວ ຄືຢູ່ທາງລາວເຮົາ ເງິນເດືອ 3-4 ລ້ານ ບວກເງິນ OT ເງິນນັ້ນເງິນນີ້ໄປ 4 ລ້ານ 5 ລ້ານ ເຂດເສດຖະກິດພະເສດ ເພິ່ນເຄີຍລົງມາໃນເມືອງເນາະ ພວກເຮົາກໍລົງໄປໂຄສະນາແຕ່ລະບ້ານ ສົມມຸດຕ້ອງການເປັນຮ້ອຍ ກໍໄດ້ຢູ່ 4-5 ຄົນຊີ້ນ່າ.”

ສະເພາະຢູ່ແຂວງຫຼວງນໍ້າທາ ຄົນງານລາວຈໍານວນນຶ່ງ ຍັງຕ້ອງການ ໄປເຮັດວຽກຢູ່ໃນເຂດເສດຖະກິດພິເສດ ບໍ່ເຕັນ ຍ້ອນນາຍຈ້າງ ຈະຈ່າຍເງິນຄ່າແຮງງານເປັນເງິນຢວນ ປະມານ 1,000 ຢວນຫາ 1,500 ຢວນຕໍ່ເດືອນ ແລະຍັງມີທີ່ພັກ ແລະຄ່າອາຫານໃຫ້ນໍາ. ແຕ່ກໍຍັງມີຄົນງານອີກຈໍານວນນຶ່ງ ຢາກໄປເຮັດວຽກຢູ່ປະເທດຈີນ ຊຶ່ງຈະເປັນວຽກ ຕາມລະດູການ, ເປັນວຽກເຟີນີເຈີ ແລະວຽກຕາມຮ້ານອາຫານ ຍ້ອນວ່າ ໄປເຮັດວຽກຢູ່ຈີນ ໄດ້ຄ່າແຮງງານ ສູງກວ່າຢູ່ລາວ ຄືໄລ່ເປັນມື້ ຈະໄດ້ປະມານ 100 ຢວນ ດັ່ງເຈົ້າໜ້າທີ່ ຫ້ອງການແຮງງານ ຢູ່ແຂວງຫລວງນໍ້າທາ ທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 14 ສິງຫານີ້ວ່າ:

“ຄັນໄປເຮັດວຽກຢູ່ຈີນ ໄລ່ເປັນມື້ໆປະມານ 100 ຢັວນນີ້ແຫລະ ມີຫລາຍຄົນໄປເຮັດມາ ກໍໄດ້ເງິນເດືອນ ໄດ້ຫລາຍກວ່າເຮັດວຽກຢູ່ບ້ານເຮົາ ຂະເຈົ້າກໍໄປນໍາຜູ້ທີ່ໄປມາກ່ອນຫັ້ນເນາະ ກໍຄ່າແຮງງານຫັ້ນແຫລະ ເປັນສິ່ງຈູງໃຈໃຫ້ຂະເຈົ້າໄປ ເພາະເຮັດຢູ່ບ້ານເຮົາ ບາງເທື່ອກໍມີບ່ອນເຮັດ ບາງເທື່ອກໍບໍ່ມີບ່ອນເຮັດ ຄັນທຽບໃສ່ຄ່າແຮງງານ ໄປເຮັດຢູ່ຈີນມັນກໍໄດ້ຫລາຍກວ່າ ເຮົາກໍເລືອກໄປທາງພຸ້ນຫລາຍກວ່າ.”

ຢູ່ນະຄອນຫຼວງວຽງຈັນ ພະນັກງານຝ່າຍບຸກຄົນ ຢູ່ໂຮງງານຜະລິດເກີບ ນາງນຶ່ງເວົ້າວ່າ ຫຼາຍໂຮງງານ ໃນເຂດເມືອງນາຊາຍທອງ ກໍປະກາດຫາຄົນງານຫຼາຍບ່ອນ. ສະເພາະບໍລິສັດ ທີ່ນາງເຮັດວຽກຢູ່ນັ້ນ ຄົນງານຈະຂາດເຂີນໜ້ອຍນຶ່ງ ໃນໄລຍະເປີດສົກຮຽນ ຍ້ອນຕອນນີ້ ບໍລິສັດ ຫັນມາຈ້າງນັກຮຽນ ເປັນໄລຍະເວລາສັ້ນໆ ແລະຍ້ອນມີຄົນງານ ພາກັນທຽວເຂົ້າ-ທຽວອອກຫຼາຍ ຂະ ນະທີ່ຄົນງານຈໍານວນນຶ່ງ ກໍໄປເຮັດວຽກຢູ່ເກົາຫລີໃຕ້ ເປັນໄລຍະເວລາ 5 ເດືອນ.

“ຫລາຍໂຮງຈັກໂຮງງານກໍຍັງ ຂາດຢູ່ສ່ວນຫລາຍ ເຂົາເຈົ້ນໄປເກົາຫລີຫັ້ນນ່າ ສໍາລັບໂຮງງານເຮົາເນາະ ປັດຈຸບັນຄົນງານຫັ້ນ ມັນກໍເປັນປົກກະຕິຫັ້ນນ່າ ແຕ່ວ່າໃຂນໄລຍະເປີດສົກຮຽນ ອາດຈະມີຂາດເຂີນໜ້ອຍນຶ່ງ ຄັນວ່າບໍ່ຂາດແຄນ ມັນກໍບໍ່ຄົງທີ່ຫັ້ນນ່າ ຄົນເຮົາມັນກໍທຽວເຂົ້າທຽວອອກ. ສ່ວນຫລາຍເຂົາເຈົ້າໄປເກົາຫລີ ເຂົາເຈົ້າກໍໄປ  5 ເດືອນຊີ້ເນາະ ແລ້ວເຂົາເຈົ້າກໍກັບມາ.”

ເມື່ອກ່ອນໜ້ານີ້ ໃນເດືອນກໍລະກົດ ທີ່ຜ່ານມາ ຍານາງ ໃບຄໍາ ຂັດທິຍະ ລັດຖະມົນຕີ ກະຊວງແຮງງານ ແລະສະຫວັດດີການສັງຄົມ, ປະທານຄະນະກໍາມະການ ແຮງງານແຫ່ງຊາດ ໄດ້ກ່າວໃນກອງປະຊຸມ ຄະນະກໍາມະການ ແຮງງານແຫ່ງຊາດ ເພື່ອປືກສາຫາລື ເລື່ອງການປັບປຸງຄ່າແຮງງານຂັ້ນຕ່ໍາວ່າ ຄ່າແຮງງານຂັ້ນຕ່ໍາ 1,600,000 ກີບຕໍ່ເດືອນ ທີ່ໄດ້ກໍານົດໄວ້ນັ້ນ ແມ່ນບໍ່ສອດ ຄ່ອງ ກັບຄ່າຄອງຊີບໃນປັດຈຸບັນ, ເຮັດໃຫ້ຄົນງານລາວ ປະເຊີນກັບຄວາມຫຍຸ້ງຍາກ ແລະບໍ່ສົນໃຈເຮັດວຽກ ຢູ່ພາຍໃນປະເທດ.

ກະຊວງແຮງງານ ແລະສະຫວັດດີການສັງຄົມ ໄດ້ເຮັດວຽກຮ່ວມກັບ ສະຫະພັນ ກໍາມະບານລາວ ແລະພາກເອກກະຊົນ ຊຶ່ງໄດ້ມີຄວາມເຫັນຮ່ວມກັນວ່າ ຈໍາເປັນທີ່ຈະຕ້ອງໄດ້ເພີ່ມຄ່າແຮງງານຂັ້ນຕ່ໍາຂື້ນອີກ 600,000 ກີບຫາ 900,000 ກີບຕໍ່ເດືອນ ໃນໄລຍະມໍ່ໆນີ້ ເພື່ອໃຫ້ສອດຄ່ອງ ກັບຄ່າຄ່ອງຊີບໃນປັດຈຸບັນ ແລະເພື່ອດຶງດູດ ໃຫ້ຄົນງານລາວ ຫັນມາເຮັດວຽກຢູ່ພາຍໃນປະເທດຫຼາຍຂຶ້ນ.