ຄຣູອາສາຫວັງຈະຖືກ ບັນຈຸເຂົ້າ ເປັນຣັຖກອນ

ຈໍາປາທອງ
2021-05-12
Share
ຄຣູອາສາຫວັງຈະຖືກ ບັນຈຸເຂົ້າ ເປັນຣັຖກອນ ຄຣູອາສາສມັກ ທີ່ ສອນຢູ່ໃນເຂດ ຊົນນະບົດ ແຂວງຫົວພັນ ຕ້ອງໄດ້ກຸ້ມຕົນເອງທຸກຢ່າງ ຈຶ່ງຂໍຮ້ອງຜູ້ໃຈບຸນມາຊ່ອຍເຫຼືອ ເຂົ້າປາອາຫານ ( ຮູບຖ່າຍ ວັນທີ 14 ເດືອນມິຖຸນາ ປີ 2020 )
ນັກຂ່າວພົລເມືອງ

ກະຊວງສຶກສາທິການ ແລະກິລາ ໄດ້ອອກຄໍາແນະນໍາ ເລຂທີ 451/ສສກກ ລົງວັນທີ 10 ພຶສພາ 2021 ເຣື່ອງການຮັບ ແລະບັນຈຸ ຣັຖກອນຄຣູ ແລະ ບໍຣິຫານໃໝ່ ຂອງຂແນງ ສຶກສາທິການ ແລະກິລາ ປະຈໍາປີ 2021 ຊຶ່ງທັງໝົດມີ 535 ຄົນ. ໃນນັ້ນ ຣັຖກອນ ຄຣູ 530 ຄົນ ແລະຜູ້ບໍຣິຫານ 5 ຄົນ ຊຶ່ງຖືວ່າໄດ້ໂຄຕ້າໜ້ອຍລົງ ກວ່າປີກາຍ ທີ່ໄດ້ 1,040 ຄົນ.

ແຕ່ເຖິງຢ່າງໃດກໍຕາມ ຄຣູອາສາສມັກຈໍານວນນຶ່ງ ກໍຍັງມີຄວາມຫວັງ ທີ່ຈະໄດ້ເປັນຣັຖກອນຄຣູຢູ່ ເນື່ອງຈາກຕົນສອນມາໄດ້ຫຼາຍປີ. ຄຣູອາສາສມັກຊົນເຜົ່າລື້ ສອນວິຊາ ພາສາອັງກິດ ຢູ່ເມືອງນາແລ ແຂວງຫຼວງນໍ້າທາ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 12 ພຶສພາ ນີ້ວ່າ ຕົນກໍຮູ້ສຶກມີຄວາມຫວັງ ທີ່ຈະໄດ້ເປັນຣັຖກອນຄຣູ ໃນປີນີ້ ຍ້ອນສູ້ຊົນສອນມາເປັນເວລາ 5 ປີ ໂດຍບໍ່ໄດ້ຮັບເງິນເດືອນ ແລະ ຢາກມີໂອກາດ ຖືກບັນຈຸເຂົ້າເປັນຣັຖກອນຄຣູ ເພື່ອໃຫ້ນັກຮຽນຊົນເຜົ່າ ໃນເຂດທີ່ຕົນສອນຢູ່ ໄດ້ຮຽນຫຼາຍຂຶ້ນ ເນື່ອງຈາກ ຕົນເອງ ແລະນັກຮຽນເວົ້າພາສາດຽວກັນ, ດັ່ງທີ່ທ່ານກ່າວວ່າ:

“ຢາກໃຫ້ເຂົາເຈົ້າບັນຈຸ ເຂົ້າເປັນຄຣູຣັຖກອນ ໄປສອນນໍາຊົນເຜົ່າຂະມຸ ແຕ່ວ່າຂະມຸ ເຂົາກໍຮູ້ພາສາລາວ ພາສາລື້ ເຂົາປາກພາສາລື້ ພາສາລາວໄດ້ຊັດເຈນ. ສ່ວນຫຼາຍ ເຮົາບໍ່ໄດ້ໄປເຮັດວຽກສ່ວນໂຕເນາະ ເພາະວ່າ ເຮົາເປັນຄຣູອາສາ ເຮົາອອກໄປສອນ ຈະບໍ່ມີ ຣາຍຮັບເພີ່ມ ກໍຈະສູ້ຊົນຕໍ່ໄປຫັ້ນແຫຼະ ເພາະວ່າເຮົາມາຮອດຂນາດນີ້ ຈະໃຫ້ຖອຍກໍບໍ່ຖອຍ.”

ທ່ານເວົ້າຕື່ມວ່າ ຫາກຕົນເອງ ໄດ້ຖືກບັນຈຸ ເປັນຣັຖກອນຄຣູແທ້ ກໍຈະເຮັດໃຫ້ຄອບຄົວ ຂອງຕົນ ມີຣາຍໄດ້ຕື່ມ ເນື່ອງຈາກເປັນ ຄອບຄົວທຸກຍາກ ຢູ່ໃນບ້ານ.

ໃນຂນະດຽວກັນ ຄຣູອາສາສມັກຊົນເຜົ່າ ທີ່ສອນວິຊາພາສາລາວ ຢູ່ໂຮງຮຽນ ໃນເມືອງສະໝ້ວຍ ແຂວງສາຣະວັນ ກໍເວົ້າໃນທໍານອງ ດຽວກັນວ່າ ຕົນເອງກໍຮູ້ ສຶກມີຄວາມຫວັງ ທີ່ຈະໄດ້ເປັນຣັຖກອນຄຣູ ໃນປີນີ້ ຍ້ອນລໍຖ້າມາດົນ ໄດ້ 3 ປີແລ້ວ. ແລະວ່າ ປັດຈຸບັນ ແມ່ນລໍຖ້າຜແນກສຶກສາທິການ ແລະກິລາແຂວງ ຊຶ່ງເປັນຜູ້ກໍານົດ ໂຄຕ້າຣັຖກອນຄຣູ ແລະເງື່ອນໄຂສໍາລັບຄຣູອາສາສມັກນັ້ນ:

“ເຮົາກໍຕັ້ງຄວາມຫວັງຢູ່ ເພາະວ່າທາງຄອບຄົວມິຫຍັງ ກໍຍັງທຸກຍາກ ຂາດເຂີນມິຫຍັງຫຼາຍໆຫັ້ນນ່າ. ຄັນສິໃຫ້ແລ່ນນັ້ນແລ່ນນີ້ ກໍຄົງ ບໍ່ມີໂອກາດອິຫຍັງ. ຕອນນີ້ ຍັງລໍຖ້າເບິ່ງຜແນກຄືກັນນ່າ ເພາະວ່າໄດ້ຖ້າຄໍາສັ່ງຂອງ ຜແນກມິຫຍັງ ອິຫຍັງທຸກຢ່າງ ແມ່ນໄດ້ຂຶ້ນກັບ ຜແນກໝົດ.”

ກ່ຽວກັບເຣື່ອງທີ່ວ່ານີ້ ເຈົ້າໜ້າທີ່ຫ້ອງການສຶກສາທິການ ແລະກິລາເມືອງນາແລ ແຂວງຫຼວງນໍ້າທາ ເວົ້າວ່າ ເມື່ອປີກາຍ ມີຄຣູອາສາ ສມັກ ໄດ້ຖືກບັນຈຸເຂົ້າເປັນຣັຖກອນ 6 ຄົນ ຕາມໂຄຕ້າ ທີ່ແຂວງກໍານົດໃຫ້ ຊຶ່ງຖືວ່າໜ້ອຍ. ປີນີ້ ມີຄຣູອາສາສມັກ ລໍຖ້າບັນຈຸ ເຂົ້າ ເປັນຣັຖກອນ 36 ຄົນ ແລະກໍບໍ່ຮູ້ວ່າທາງແຂວງເພິ່ນຈະແບ່ງໂຄຕ້າ ໃຫ້ເມືອງນີ້ຈັກຄົນ.

ທ່ານເວົ້າວ່າ ຖ້າຫາກບໍ່ມີຄຣູອາສາສມັກຊົນເຜົ່າ ສອນນັກຮຽນຢູ່ເຂດຫ່າງໄກ ກໍອາຈເຮັດໃຫ້ເກີດບັນຫາ ການຂາດຄຣູສອນ, ບໍ່ມີພໍ ສໍາລັບນັກຮຽນໃນແຕ່ລະໂຮງຮຽນ ແລະກໍອາຈເຮັດໃຫ້ນັກຮຽນ ປະລະການຮຽນ:

“ສ່ວນຫຼາຍນີ໋ ເງື່ອນໄຂທີ່ເຂົາຢູ່ເຂດຫ່າງໄກ ເຂົາຈະມາເຂົ້າເປັນຄຣູນີ໋ ມັນກໍບໍ່ມີບາງເທື່ອ ຈົບ ປ.5 ແລ້ວກໍອອກ. ບາງ ເທື່ອຈົບປ.5 ມາຕໍາມ.1 ມ.2 ມ.3 ກໍອອກໄປຈັ່ງຊັ້ນນະ. ບາງບ້ານ ເພິ່ນກໍບໍ່ຄຣູ ຄືຊ່ວງໂຄວິດຂອງພວກເຮົາ ປີແລ້ວຊ່ວງຣະບາດ ໄລຍະທີ 1 ເຮົາພົບບັນຫາ ຄືເຮົາພັກ 2 ເດືອນປາຍຫາ 3 ເດືອນ ນັກຮຽນເຮົາອອກ ປະລະຫຼາຍໆ.”

ແລະເຈົ້າໜ້າທີ່ ຜແນກສຶກສາທິການ ແລະກິລາ ແຂວງສາຣະວັນ ກໍເວົ້າວ່າ ປີກາຍ ມີຄຣູອາສາສມັກ ຖືກບັນຈຸເຂົ້າເປັນຣັຖກອນ ທົ່ວແຂວງ 77 ຄົນ ຕາມໂຄຕ້າ ທີ່ຣັຖບານກໍານົດໃຫ້ ຊຶ່ງຖືວ່າ ເປັນຈໍານວນໜ້ອຍ.

ສໍາລັບປີນີ້ ມີຄຣູອາສາສມັກ ລໍຖ້າບັນຈຸເຂົ້າເປັນຣັຖກອນ 200 ປາຍຄົນ ແລະບໍ່ຮູ້ວ່າທາງແຂວງ ຈະໃຫ້ໂຄຕ້າແກ່ແຕ່ລະເມືອງ ຈັກ ຄົນ. ຖ້າຫາກບໍ່ມີຄຣູອາສາສມັກ ສອນນັກຮຽນຢູ່ເຂດຫ່າງໄກ ກໍອາຈເຮັດໃຫ້ຄຣູສອນບໍ່ພໍ ກັບຈໍານວນນັກຮຽນ, ດັ່ງນັ້ນຈຶ່ງຢາກໃຫ້ ພາກສ່ວນທີ່ກ່ຽວຂ້ອງ ແກ້ໄຂເຣື່ອງນີ້ ໂດຍໃຫ້ໂອກາດແກ່ຄຣູອາສາສມັກ ໃນເຂດຫ່າງໄກ ໄດ້ຖືກບັນຈຸເຂົ້າເປັນຣັຖກອນ, ດັ່ງທີ່ ທ່ານກ່າວວ່າ:

“ເພາະວ່າໝົດບ້ານຫັ້ນ ມີຄຣູ 2 ຄົນ ໂຕຢ່າງມີ ປ.1 ຫາ ປ.5 ໃນຫັ້ນມີຄຣູຣັຖຜູ້ດຽວ ອາສາສມັກນັ້ນ 3 ຄັນບໍ່ຮັບເຂົາກະສົມມຸດ ເຂົາໜີໝົດ ກໍມີຄຣູຜູ້ດຽວ 5 ຫ້ອງໂຕຢ່າງນະ. ກໍເຫັນໃຈຢູ່ ເຂົາເຈົ້າສອນມາ 6 ປີ 7 ປີ ປີນີ້ເປັນປີທີ 7 ເດ໋ ສໍາລັບອາສາສມັກ ຄັນວ່າລູກວ່າຫຼານໂຕເອງ ຄວາມຍາກນໍ້າຕາ ຢາກຖ້ວມນໍາເຂົາ ບໍ່ເຄີຍໄດ້ເງິນເດືອນຈັກເທື່ອ ຂໍເງິນນໍາພໍ່ນໍາແມ່ຈ້າງຄ່າຣົດໄປ.”

ໃນຄໍາແນະນໍາ ຂອງກະຊວງສຶກສາທິການ ແລະກິລາ ສບັບດັ່ງກ່າວ ຣະບຸວ່າ ໃນຈໍານວນຣັຖກອນຄຣູ 530 ຄົນ ທີ່ຈະໄດ້ຖືກບັນຈຸ ເຂົ້າເປັນຣັຖກອນ ປະຈໍາປີ 2021 ນີ້ ຈະເນັ້ນໃສ່ຄຣູອາສາສມັກ 95% ແລະ ຄຣູຈົບໃໝ່ 5% ແລະວິຊາທີ່ຂາດຄຣູແທ້ ແລະທັງ ເປັນຄຣູ ທີ່ມີຄະແນນສເລັ່ຽ 3.5 ຂຶ້ນໄປ ຫຼືໃບປະກາດສະນິຍະບັດແດງ.

ໂຄຕ້າຣັຖກອນຄຣູ ທີ່ຣັຖບານແບ່ງໃຫ້ກະຊວງດັ່ງກ່າວ ປີ 2021 ນີ້ແມ່ນຫຼຸດລົງກວ່າປີ 2020 ທີ່ໃຫ້ 1,040 ຄົນ ແລະປີ 2019 ໃຫ້ 936 ຄົນ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ