ປະຊາຊົນວ່ານໍ້າປະປາ ໄຫຼຊ້າ ມາຂຸ່ນ

ສຸພັດຕາ
2019-05-02
ອີແມວລ໌
ຄໍາເຫັນ
Share
ພິມ
ປະຊາຊົນ ປ່ອຍນໍ້າໃສ່ອ່າງໄວ້ ລໍຖ້າໃຫ້ເຕັມ ຍ້ອນວ່າ ນໍ້າປະປາ ທັງມາຊ້າ ໄຫລຄ່ອຍ ມາຂຸ່ນ
ປະຊາຊົນ ປ່ອຍນໍ້າໃສ່ອ່າງໄວ້ ລໍຖ້າໃຫ້ເຕັມ ຍ້ອນວ່າ ນໍ້າປະປາ ທັງມາຊ້າ ໄຫລຄ່ອຍ ມາຂຸ່ນ
ຮູບພາບຈາກ : ນັກຂ່າວພົລເມືອງ

ນໍ້າປະປາ ໃນນະຄອນຫຼວງ ວຽງຈັນ ໄຫຼຊ້າ ແລະຂຸ່ນ ໄດ້ເກືອບສອງອາທິດແລ້ວ ກະທົບຕໍ່ປະຊາຊົນ ຫຼາຍບ້ານ ແລະຫຼາຍເມືອງ. ໂດຍສະເພາະ ເມືອງໄຊທານີ, ນາຊາຍທອງ, ຈັນທະບູລີ ແລະເມືອງ ໄຊເສດຖາ. ປະຊາຊົນຕ່າງກໍຈົ່ມ ແລະຮຽກຮ້ອງ ໃຫ້ພາກສ່ວນ ກ່ຽວຂ້ອງແກ້ໄຂ ບັນຫານີ້ໂດຍດ່ວນ.

ປະຊາຊົນບ້ານດອນໜູນ ເມືອງໄຊທານີ ທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ 30 ເມສາ ຜ່ານມາວ່າ ຕັ້ງແຕ່ປີໃໝ່ລາວ ເປັນຕົ້ນມາ ນໍ້າປະປາ ບໍ່ໄຫຼເລີຍ ແລະຕ້ອງເສັຽເງິນຊື້ນໍ້າຈາກບ່ອນອື່ນມາໃຊ້, ດັ່ງທ່ານກ່າວວ່າ:

“ຍັງໆ ກໍທັມມະດາ ເພາະຂ້ອຍຊື້ຄັນນຶ່ງ ຖັງລະ 3 ແສນ. ໂອ້ຍ!ຕາຍລະຕິເບາະ ມັນບໍ່ມີເຮົາກໍຊື້ນໍາປະຊາຊົນ ນໍາຣົດນໍ້າປະປາ ນະຄອນຫຼວງເລີຍ ປັນຫາເພາະວ່າຕັ້ງແຕ່ ກ່ອນສົງການມັນບໍ່ມາເລີຍ ໃຊ້ກໍບໍ່ໄດ້ເລີຍ ປະຊາຊົນຫຼາຍບ່ອນ, ຫຼາຍເຂດ ເຂົາເຈົ້າກະຈົ່ມ ນໍ້າບໍ່ພໍໃຊ້.”

ທ່ານເວົ້າວ່າ ນອກຈາກນໍ້າປະປາ ທີ່ໄຫຼຊ້າ ແລະບໍ່ພຽງພໍ ຕໍ່ຄວາມຕ້ອງການແລ້ວ ນໍ້າປະປາ ໃນຫຼາຍບ້ານ ກໍຂຸ່ນເປັນສີສົ້ມ ອອກແດງ ຄ້າຍຄືກັບ ບໍ່ໄດ້ກັ່ນຕອງ. ແລະ ໃນຂນະດຽວກັນ ປະຊາຊົນ ເມືອງຈັນທະບູລີ ກໍຈົ່ມວ່າ ນໍ້າບໍ່ມາ, ບໍ່ມີນໍ້າລ້າງຖ້ວຍ ລ້າງຈານ ເລີຍ:

“ເອີ່...ມັນນໍ້າປະປາບໍ່ມາແຕ່ເຊົ້າພຸ້ນ ແຕ່ເຊົ້າພຸ້ນມັນບໍ່ມາ ບໍ່ທັນມາຫາກໍຢາດໆ ເປັນໝົດຫັ້ນແຫຼ້ວ ສົງໄສເປັນນໍາໝໍ້ແປງ ເຂົາແປງບໍ່ ຫຼືເປັນແນວໃດ.”

ກ່ຽວກັບເຣື້ອງນີ້ ວິທຍຸເອເຊັຽເສຣີ ໄດ້ຕິດໄປຫາເຈົ້າໜ້າທີ່ ຣັຖວິສາຫະກິຈ ນໍ້າປະປາ ນະຄອນຫຼວງວຽງຈັນ ເພື່ອສອບຖາມ ເຖິງບັນຫານີ້ ແລະແນວທາງ ການແກ້ໄຂ ເຈົ້າໜ້າທີ່ ຣັຖວິສາຫະກິຈ ນໍ້າປະປາ ນະຄອນຫຼວງວຽງຈັນ ກ່າວວ່າ ການຜລິດນໍ້າປະປາ ໃຫ້ໄດ້ເຕັມເມັດ ເຕັມໜ່ວຍ ແລະມີຄຸນນະພາບນັ້ນ ຍັງເປັນເຣື່ອງຍາກຫຼາຍ, ຍ້ອນບັນຫາ ດ້ານບຸຄລາກອນມີໜ້ອຍ, ງົປມານມີຈໍາກັດ ແລະ ໂຮງງານຜລິດ ນໍ້າປະປາ ກໍມີພຽງແຕ່ 5 ແຫ່ງ ເຮັດໃຫ້ ການຜລິດນໍ້າ ໃນແຕ່ລະມື້ ບໍ່ທ່ວງທັນ ຕໍ່ການຊົມໃຊ້ ຂອງປະຊາຊົນ, ດັ່ງທ່ານກ່າວວ່າ:

“ມັນກໍຍາກຢູ່ດຽວນີ້ຫັ້ນ ບາງເທື່ອກໍຂາດບາງເທື່ອກໍປົກກະຕິ, ບາງເທື່ອກໍແຕກແມ່ນຫຍັງຕ່າງໆຢູ່ ມາກໍຄ່ອຍວ່າຊັ້ນຊະ, ປັດຈຸບັນດຽວນີ້ ທາງນະຄອນຫຼວງໄທເຮົາ ກໍຕັ້ງຢູ່ເມືອງນາຊາຍທອງຈຸດນຶ່ງ ແກ້ປັນຫາກັນໄປ.”

ທ່ານວ່າ ເມືອງໄຊທານີ ຖືວ່າ ເປັນເມືອງ ທີ່ມີບັນຫາ ນໍ້າປະປາບໍ່ພໍໃຊ້ ແລະນໍ້າຂຸ່ນ ທາງພາກສ່ວນກ່ຽວຂ້ອງ ກໍໄດ້ຕັ້ງເຄື່ອງຜລິດນໍ້າ ປະປາສຸກເສີນ ເພີ້ມໃຫ້ແລ້ວ 1 ເຄື່ອງ ເພື່ອໃຫ້ປະຊາຊົນ ໄດ້ມີນໍ້າໃຊ້ ໃນຊ່ວງຣະດູແລ້ງນີ້.

ໃນວັນທີ່ 25 ເມສາ ທີ່ຜ່ານມາ ຣັຖວິສາຫະກິຈ ນໍ້າປະປາ ນະຄອນຫຼວງວຽງຈັນ ໄດ້ອອກແຈ້ງການ ຣະບຸວ່າ ໃນສະພາບ ປັດຈຸບັນ ດິນຟ້າອາກາດ ແຫ້ງແລ້ງ, ເຮັດໃຫ້ນໍ້າຂອງ ແລະນໍ້າງື່ມ ບົກແຫ້ງຫຼາຍ ດັ່ງນັ້ນ, ຈຶ່ງສົ່ງຜົນສະທ້ອນ ໃຫ້ແກ່ບັນດາໂຮງງານ ທີ່ຜລິດນໍ້າ ສູບ-ສົ່ງນໍ້າ ບໍ່ໄດ້ເຕັມສ່ວນ ແລະ ອາດສນອງ ນໍ້າປະປາ ບໍ່ເປັນປົກກະຕິ ໃນໄລຍະຣະດູຝົນນີ້.

ແລະເມື່ອວັນທີ່ 23 ເມສາ ຜ່ານມານັ້ນ ຣັຖວິສາຫະກິຈ ນໍ້າປະປາ ນະຄອນຫຼວງ ວຽງຈັນ ໄດ້ມີການປ່ຽນທໍ່ນໍ້າເກົ່າ ທີ່ມັກແຕກ, ມັກຮົ່ວ ອອກ ແລ້ວວາງທໍ່ໃໝ່ ແລະແລ່ນນໍ້າປະປາ ສາຂາດົງບັງ ເພື່ອສນອງນໍ້າ ໃຫ້ປະຊາຊົນ ເຂດເມືອງໄຊທານີ ແລະ ເມືອງ ໄຊເສດຖາ ໄດ້ຊົມໃຊ້, ຊຶ່ງເປັນສາເຫດ ເຮັດໃຫ້ນໍ້າຂຸ່ນ ອາຈໃຊ້ເວລາອີກ 3-7 ມື້ ນໍ້າປະປາ ຈຶ່ງຈະກັບມາໃສ ຄືນຄືເກົ່າ.

ປັດຈຸບັນ ຢູ່ນະຄອນຫຼວງວຽງຈັນ ມີໂຮງງານຜລິດນໍ້າປະປາທັງໝົດ 5 ໂຮງງານ ສາມາດສນອງນໍ້າປະປາ ໄດ້ 2 ແສນ 80 ພັນແມັດກ້ອນ ຕໍ່ມື້, ແຕ່ປະຊາຊົນ ມີຄວາມຕ້ອງການ 3 ແສນ 50 ພັນແມັດກ້ອນ ຕໍ່ມື້ ນັ້ນໝາຍຄວາມວ່າ ໃນບາງພື້ນທີ່ ນໍ້າປະປາຈະໄຫຼຊ້າ ແລະ ໃນບາງເຂດ ນໍ້າຈະບໍ່ພຽງພໍ ໃນການຊົມໃຊ້.

ຄໍາເຫັນ (1)
Share

KHOI KOR LAOTIAN

ຈາກ Anywhere

Forget bout other issues that may or may not be the culprits of why there is not enough water or dirty water for uses and consumption. One way to get water run sufficient and clean is to let the leaders and their facilities have the same problem then I'm pretty sure that the situation will be resolved quickly.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

May 08, 2019 09:13 AM

ເຕັມຫນ້າ