ລູກຈ້າງດັບແຄ້ນດ້ວຍມີດ ປິດຊີບ ເຖົ້າແກ່

ອຸ່ນແກ້ວ ສຸກສະຫວັນ
2021-03-18
Share
ລູກຈ້າງດັບແຄ້ນດ້ວຍມີດ ປິດຊີບ ເຖົ້າແກ່ ທ້າວ (ກ) ຜູ້ກໍ່ເຫດ ໃຫ້ການຕໍ່ຕຳຣວດ ແຂວງບໍ່ແກ້ວ ວ່າຖືກນາຍຈ້າງ ທັງຮ້າຍ ທັງດ່າ ທໍາຮ້າຍຮ່າງກາຍ ຈົນວ່າອົດກັ້ນບໍ່ໄຫວ
ປກສ ບໍ່ແກ້ວ

ລູກຈ້າງຊາວລາວ ໃຊ້ມີດຟັນເຈົ້າຂອງຮ້ານ ຂາຍຣົດຈັກທີ່ເປັນຄົນຈີນ ເສັຽຊີວິດ ຢູ່ບ້ານປ່າອ້ອຍ ເມືອງຫ້ວຍຊາຍ ແຂວງບໍ່ແກ້ວ ຍ້ອນວ່າຖືກນາຍຈ້າງຂົ່ມຂູ່ ແລະ ຖືກປ້ອຍດ່າ ເປັນປະຈຳ. ເຈົ້າໜ້າທີ່ກ່ຽວຂ້ອງ ເມືອງຫ້ວຍຊາຍ ໄດ້ກ່າວຕໍ່ເອເຊັຽເສຣີ ໃນວັນທີ 18 ມິນາ ວ່າ:

"ຢູ່ຮ້ານຣົດຈັກ ນາຍຈ້າງກັບລູກຈ້າງ ຜິດຖຽງກັນແລ້ວ ກໍໄດ້ຕີກັນ."

ນາຍຈ້າງທີ່ເປັນຄົນຈີນ ມັກດ່າລູກຈ້າງເປັນປະຈຳ, ຊາວບ້ານທີ່ຢູ່ໃກ້ຮ້ານຂາຍຣົດຄົນຈີນ ໄດ້ກ່າວຕໍ່ເອເຊັຽເສຣີ ໃນວັນທີ 18 ມິນາ ວ່າ:

"ຂາຍຣົດຢູ່ຂ້າງບ້ານ ແລະ ເຂົາເປັນກັມມະກອນຂອງຄົນຈີນ ໄດ້ຍິນວ່າເຮັດໃຫ້ຜິດໃຈ ເໝືອນຄ້າຍໆວ່າທະເລາະ ໄດ້ຍິນວ່າມັນ ມັກດ່າ ຊອບດຸ ກໍເລີຍວ່າແຄ້ນ ວ່າຖືກໃຈ ມັນຫຼາຍຄັ້ງແລ້ວ ບາງທີມັນສະສົມ ເຮັດຫຍັງກໍບໍ່ຖືກໃຈ ແລ້ວກໍເກັບກົດໄງ ແລ້ວ ເພິ່ນກໍໄປທຳຮ້າຍ ຄົນທີ່ໄປທຳຮ້າຍ ຍັງອາຍຸນ້ອຍຢູ່ນະ."

ຊາວບ້ານທ່ານນີ້ ກ່າວຕື່ມອີກວ່າ; ຮ້ານຂາຍຣົດດັ່ງກ່າວ ມີລູກຈ້າງຫຼາຍຄົນ ຊຶ່ງຜ່ານມາກໍໄດ້ຍິນວ່າ ເຈົ້າຂອງຮ້ານຊາວຈີນ ມັກດ່າ ລູກຈ້າງຄົນອື່ນໆນຳ ແລະ ປັດຈຸບັນຮ້ານນີ້ ກໍຕ້ອງໄດ້ປິດໄປ ຍ້ອນເຈົ້າຂອງຮ້ານເສັຽຊີວິດແລ້ວ.

ລູກຈ້າງຄົນທີ່ກໍ່ເຫດ ມາເຮັດວຽກຢູ່ຮ້ານດັ່ງກ່າວບໍ່ດົນ ແຕ່ທີ່ຜ່ານມາ ລາວຖືກນາຍຈ້າງຄົນຈີນ ຂົ່ມຂູ່ ແລະ ທຳຮ້າຍຮ່າງກາຍ. ຊາວບ້ານອີກທ່ານນຶ່ງ ໄດ້ກ່າວຕໍ່ເອເຊັຽເສຣີ ໃນວັນທີ 18 ມິນາ ວ່າ:

"ປະມານເກີດວັນທີ 8 ນີ້ນະແບບວ່າ ຄົນຈີນບໍ່ມີນ້ຳໃຈຕໍ່ລູກຈ້າງຫັ້ນນະ ແລ້ວກໍທຳຮ້າຍລູກຈ້າງ ຈົນບາດເຈັບ ລູກຈ້າງເລີຍເຈັບແຄ້ນ ແລ້ວກໍຖືໂອກາດວ່າ ມາທໍາຮ້າຍໃຫ້ເຈົ້າຂອງ ຄົນຈີນ ດຽວນີ້ກໍຕາຍແລ້ວ ພຶ່ງມາທຳ ບໍ່ດົນດອກ ມາຢູ່ນີ້ ກໍເຂົ້າເດືອນນີ້ແຫຼະ."

ອີງຕາມລາຍງານຂອງສື່ມົລຊົນລາວ, ໃນວັນທີ 8 ມີນາ 2021 ຢູ່ບ້ານປ່າອ້ອຍ ເມືອງຫ້ວຍຊາຍ ແຂວງບໍ່ແກ້ວ ລູກຈ້າງຄົນລາວ ທີ່ ທ້າວ ກຸ້ງ ອາຍຸ 18 ປີ ໄດ້ໃຊ້ມີດຟັນນາຍຈ້າງ ຄົນຈີນ ຊື່ ທ້າວ ລີຊ້ຽວ ອາຍຸ 27 ແລະ ເສັຽຊີວິດໃນເວລາຕໍ່ມາ.

ຕໍ່ມາໃນວັນທີ 10 ມີນາ 2021, ເຈົ້າໜ້າທີ່ຕຳຣວດ ແຂວງບໍ່ແກ້ວ ກໍສາມາດຈັບໂຕ ທ້າວ ກຸ້ງ ມາດຳເນີນຄະດີ.

ທ້າວ ກຸ້ງ ຜູ້ກໍ່ເຫດໃຫ້ການ ຕໍ່ຕຳຣວດ ແຂວງບໍ່ແກ້ວ ວ່າຕະຫຼອດໄລຍະເວລາ ທີ່ຕົນເຮັດວຽກຢູ່ຮ້ານນີ້ ນາຍຈ້າງມັກດຸ-ດ່າ ສະເໝີ ແລະ ໃນວັນເກີດເຫດ ຕົນກັບເຈົ້າຂອງຮ້ານ ມີການຜິດຖຽງກັນ ຈົນຕົນອົດບໍ່ໄດ້ ຈຶ່ງຕີເຈົ້າຂອງຮ້າຈົນ ລົ້ມລົງ ແລະ ໃຊ້ມີດປາດຊ້ຳ.

ນອກຈາກນີ້ ໃນກາງປີ 2020 ທີ່ຜ່ານມາ, ມີກໍຣະນີ ນາຍຈ້າງຄົນຈີນ ທຳຮ້າຍຮ່າງກາຍ ລຸກຈ້າງຄົນລາວ ທີ່ເຮັດວຽກຢູ່ສວນກ້ວຍຈີນ ຢູ່ແຂວງພາກເໜືອ. ລູກຈ້າງຄົນລາວ ໄປຂໍລາພັກ ຍ້ອນວ່າເຮັດວຽກໜັກໂພດ ແລະບໍ່ມີມື້ພັກ ແຕ່ຜູ້ເປັນນາຍຈ້າງຄົນຈີນ ບໍ່ຍ້ອມໃຫ້ ພັກ ແລະຍັງມີການທຳຮ້າຍຮ່າງກາຍ ລູກຈ້າງລາວ ນຳອີກ.

ຈັນພອນ ເມືອງຕົ້ນເຜີ້ງ ແຂວງບໍ່ແກ້ວ
ຈັນພອນ ເມືອງຕົ້ນເຜີ້ງ ແຂວງບໍ່ແກ້ວ says:
Mar 22, 2021 04:25 PM

ການຕົບຕີ ປາບຄໍ ຄົນເຈັກຄົນຈີນ ທີ່ ພັກລັດອານຸຍາດໃຫ້ມາຄ້າຂາຍດູ່ປະມາດຄົນລາວເຮົານີ້ເຫັນວ່າເປັນການດີທີ່ເປັນເຈົ້າຂອງປະເທດ, ແຕ່ການນຳກອງທະຫານໄປເຂັນຂ້າພີ່ນ້ອງຊາວເຜົາມົ້ງທີ່ຍັງອາໃສຢູ່ປ່າຢູ່ພູທີ່ທຸກຍາດລຳບາກຄື ທ້າວ ຈື ຢົວວັງ ໃນຄັ້ງວັນທີ່ 09/03/2021ທີ່ແຂວງໄຊສົມບູນທີ່ມີຮູບພາບເປີດໄປທົວໂລກຄືໃນຄັ້ງນີ້ບໍ່ເປັນການດີ, ຈະເຮັດໃຫ້ບັນດາຊົນຊາດມີຄວາມຄຽດແຄ້ນ

Haha
Haha says:
Mar 22, 2021 11:34 PM

Soon or later Lao people will need USA help about Chinese in Laos, mark my words!

ຄົນລາວ ໃນປະເທດລາວ
ຄົນລາວ ໃນປະເທດລາວ says:
Mar 23, 2021 08:39 PM

ຮຽນ ພະນະທ່ານ ສຽງເອເຊຍເສລີ ພາກພາສາລາວ, ຂໍໃຫ້ ເອົາຄຳເຫັນຂອງທຸກຄົນລົງໃນ ໜ້າອອກຄວາມເຫັນນີ້ໃຫ້ທຸກຄົນໄດ້ຮູ້ເຫັນແດ:

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ