ທະນາຄານໂລກ ປັບຫຼຸດການຂຍາຍໂຕ ເສຖກິຈລາວ

ສຸພັດຕາ
2021-10-15
Share
ທະນາຄານໂລກ ປັບຫຼຸດການຂຍາຍໂຕ ເສຖກິຈລາວ ສະພາບການ ຫຼື ບັນຍາກາດ ທີ່ ເຄີຍຊື້ໄດ້ຂາຍດີ ຂອງ ທຸຣະກິຈ ຄ້າຂາຍ, ບໍຣິການ ທຸກຢ່າງຕ້ອງຢຸດສະງັກ ຍ້ອນໂວິດ-19.
ນັກຂ່າວ ພົລເມືອງ

ທະນາຄານໂລກ ປັບຫຼຸດອັດຕຣາການ ຂຍາຍໂຕທາງເສຖກິຈ ຂອງລາວ ຈາກ 4% ມາເປັນ 2.2% ໃນປີ 2021 ຍ້ອນການຣະບາດ ຂອງໂຄວິດ-19 ທີ່ໜັກໜ່ວງ ຈົນເຮັດໃຫ້ຣັຖບານລາວ ຕ້ອງປະກາດລ໊ອກດາວຂັ້ນສູງສຸດ ໃນຫຼາຍແຂວງ ຊຶ່ງສົ່ງຜົລກະທົບ ຕໍ່ພາກທຸຣະກິຈຂນາດໃຫຍ່ ແລະ ທຸຣະກິຈຂນາດນ້ອຍ (Small and Mid-size Enterprise (SME)) ຢຸດການເຄື່ອນໄຫວກິຈການ ຊົ່ວຄາວມາເກືອບ 3 ເດືອນ ສ່ວນທຸຣິກິຈທ່ອງທ່ຽວ ແລະ ບໍຣິການ ແມ່ນຍັງໄດ້ຮັບຜົລກະທົບໜັກທີ່ສຸດ, ດັ່ງເຈົ້າໜ້າທີ່ທະນາຄານໂລກ ປະຈໍາລາວ ທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ 14 ຕຸລາ ນີ້ວ່າ:

“ຂ້ອນຂ້າງຫຍຸ້ງຍາກຫຼາຍ ສ່ວນວ່າພາກຣັຖ ມັນຮັບມືບໍ່ໄດ້ເວົ້າງ່າຍໆເລີຍ ເຂົາເຈົ້າກໍລ໊ອກດາວ ກໍໜັກຢູ່ ຄິດວ່າໜັກ ເປັນໂຮງແຮມຫຼາຍກວ່າ ບໍຣິສັດທົວພວກນີ້ແຫຼະໜັກເລີຍ ໄປເລີຍ ເປັນຮ້າງໄປເລີຍ ເຫງົາໆນ່າ ວຽງຈັນກໍເປັນເຫງົາໆ ແບບເຮືອນຮ້າງຫຼາຍໆ ບ້ານໃຫ້ເຊົ່າກໍເປັນບໍ່ມີນັກທ່ອງທ່ຽວມາເດ້.”

ທ່ານກ່າວຕື່ມອີກວ່າ ການຣະບາດຂອງໂຄວິດ-19 ໃນໄລຍະເຄິ່ງປີຫຼັງມານີ້ ຖືວ່າໜັກໜ່ວງທີ່ສຸດ ເນື່ອງຈາກເປັນການຣະບາດໃນຊຸມຊົນ ເມື່ອຄົນໃນຊຸມຊົນ ບໍ່ສາມາດເຄື່ອນໄຫວວຽກງານ ຫຼືອອກໄປເຮັດວຽກໄດ້ຕາມປົກກະຕິ ຈຶ່ງພາໃຫ້ທຸຣະກິຈຕ່າງໆ ຕ້ອງຢຸດການເຄື່ອນໄຫວໄປນໍາ ເປັນຕົ້ນ ກຸ່ມໂຮງງານຕັດຫຍິບ ໃນນະຄອນຫຼວງວຽງຈັນ ທີ່ຖືກສັ່ງປິດກິຈການ ຈົນກະທົບຕໍ່ການຜລິດສິນຄ້າ ແລະ ການສົ່ງອອກ.

ສ່ວນການຄ້າ ແລະ ການລົງທຶນ ທັງຈາກພາຍໃນ ແລະຕ່າງປະເທດ ແມ່ນຖືວ່າເກືອບຈະບໍ່ມີການເຄື່ອນໄຫວໃດໆ ໂດຍສະເພາະການລົງທຶນ ໃນທຸຣະກິຈຂນາດນ້ອຍ, ໃນຂນະທີ່ ຜູ້ປະກອບການຄົນເກົ່າ ກໍຕ້ອງດິ້ນຮົນດ້ວຍໂຕເອງ ເພື່ອເຮັດໃຫ້ທຸຣະກິຈຢູ່ລອດໄດ້ ໃນສະຖານະການແບບນີ້ ເນື່ອງຈາກພວກເຂົາເຈົ້າ ກໍບໍ່ໄດ້ຮັບການຊ່ອຍເຫຼືອໃດໆ ຈາກພາກຣັຖ.

ທາງດ້ານຜູ້ປະກອບການ ດ້ານການທ່ອງທ່ຽວ ແລະບໍຣິການໃນລາວ ຊຶ່ງເປັນທຸຣະກິຈ ທີ່ໄດ້ຮັບຜົລກະທົບໜັກທີ່ສຸດ ເພາະຕ້ອງເພິ່ງພານັກທ່ອງທ່ຽວ ຈາກຕ່າງປະເທດ ເມື່ອບໍ່ສາມາດເປີດ ການທ່ອງທ່ຽວໄດ້ ຈຶ່ງເຮັດໃຫ້ບໍຣິສັດທ່ອງທ່ຽວ ແລະທຸຣະກິຈ ການບໍຣິການຕ່າງໆ ຕ້ອງປິດກິຈການໄປ ຢ່າງຖາວອນ ແລະບາງແຫ່ງ ກໍໄດ້ປິດກິຈການ ຊົ່ວຄາວໄປເປັນຈໍານວນຫຼາຍ.

ເຈົ້າຂອງບໍຣິສັດ ທ່ອງທ່ຽວແຫ່ງນຶ່ງ ໃນນະຄອນຫຼວງພຣະບາງ ເວົ້າວ່າ ຄວາມຫວັງດຽວທີ່ຈະລອດ ຄືການເປີດປະເທດ ເພື່ອຮັບນັກທ່ອງທ່ຽວ ຕ່າງປະເທດເຂົ້າມາທ່ອງທ່ຽວ ເພາະບໍ່ຢາກປິດທຸຣະກິຈ ໄປແບບຖາວອນ ແຕ່ເມື່ອບໍ່ມີລາຍໄດ້ມາເກືອບ 1 ປີແລ້ວ ກໍຕັດສິນໃຈກູ້ຢືມເງິນ ຈາກທະນາຄານ ເພື່ອນໍາມາເປັນຄ່າໃຊ້ຈ່າຍ ແລະ ປະຄອງທຸຣະກິຈ ໃຫ້ໄດ້ດົນທີ່ສຸດ, ດັ່ງເຈົ້າຂອງບໍຣິສັດ ທ່ອງທ່ຽວແຫ່ງນຶ່ງ ໃນນະຄອນຫຼວງພຣະບາງ ແຂວງຫຼວງພຣະບາງ ກ່າວຕໍ່ ວິທຍຸເອເຊັຽເສຣີ ໃນວັນທີ 14 ຕຸລາ ນີ້ວ່າ:

“ທຸຣະກິຈນີ້ ກໍມີແຕ່ວ່າ ບໍ່ໄດ້ທ່ຽວເລີຍນ່າ ປິດປະເທດ ປິດເມືອງມານີ້ ແຕ່ກີ້ພໍມີແຂກ ວັນເສົາວັນອາທິດກໍພໍມີຢູ່ ໂອ້ຂາດທຶນຫຼາຍ ຕ້ອງໄດ້ຢືມແບ້ງ (ທະນາຄານ) ມາປະຄອງທຸຣະກິຈ ໃຫ້ມັນໂຄວິດ ບັນຍາກາດກະງຽບເຫງົາຫຼາຍໂອ້.”

ເຈົ້າຂອງໂຮງແຮມແຫ່ງນຶ່ງ ໃນນະຄອນຫຼວງວຽງຈັນ ກໍເວົ້າວ່າ ດຽວນີ້ ເປັນຊ່ວງເວລາອັນຮ້າຍແຮງທີ່ສຸດ ມີທັງຂໍ້ຫຍຸ້ງຍາກ ແລະ ຄວາມລໍາບາກໃນການປະຄັບປະຄອງທຸຣິກິຈ ບໍ່ໃຫ້ປິດໄປຢ່າງຖາວອນ ແລະ ສິ່ງສໍາຄັນ ຜົລກະທົບທີ່ເກີດຂຶ້ນ ບໍ່ມີໜ່ວຍງານຈາກຣັຖບານລາວມາຊ່ອຍແກ້ໄຂແຕ່ຢ່າງໃດ. ຫົນທາງດຽວ ທີ່ຈະເຮັດໃຫ້ທຸຣະກິຈກັບມາຟື້ນໂຕໄດ້ ຄືຕ້ອງເປີດປະເທດເທົ່ານັ້ນ, ດັ່ງເຈົ້າຂອງໂຮງແຮມແຫ່ງນຶ່ງ ໃນນະຄອນຫຼວງວຽງຈັນ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ອັນນີ້ມັນຮ້າຍແຮງກວ່າ ຮອດສົງຄາມແລ້ວ ມັນຍາກ ມັນບໍ່ຮູ້ວ່າເວລາໃດຈະຢຸດ ບໍ່ກ້າລົງທຶນ ບໍ່ກ້າຈະຈົກນີ້ແຫຼ້ວ ຂະແນມໃຫ້ມັນເປີດປະເທດຫັ້ນນ່າ ກໍຍັງຊິໃຄແນ່ໜ້ອຍນຶ່ງ ວ່າຊັ້ນສ່າໄປ ພໍຈະລອດຕາຍໄດ້ໜ້ອຍນຶ່ງວ່າຊັ້ນສ່າ.”

ຂນະທີ່ ເຈົ້າຂອງເຮືອນພັກ ແລະຮ້ານອາຫານອີກແຫ່ງນຶ່ງ ໃນເມືອງໂຂງ ແຂວງຈໍາປາສັກ ກ່າວຕໍ່ ວິທຍຸເອເຊັຽເສຣີ ໃນມື້ດຽວກັນນີ້ວ່າ ອຸກໃຈທີ່ສຸດ ກັບສະພາບການ ຣະບາດຂອງໂຄວິດ-19 ໃນປັດຈຸບັນ ເພາະໄດ້ສົ່ງຜົລກະທົບ ໄປທຸກຂແນງການ ໂດຍສະເພາະ ການທ່ຽວທ່ອງພາຍໃນເມືອງ ທີ່ບໍ່ມີການເຄື່ອນໄຫວຫຍັງເລີຍ ເມື່ອບໍ່ມີນັກທ່ອງທ່ຽວ ທັງຈາກພາຍໃນ ແລະ ຕ່າງປະເທດກໍເຮັດໃຫ້ລາຍໄດ້ບໍ່ມີເລີຍ:

“ງຽບຫຼາຍດຽວນີ້ ປິດແລ້ວ ປິດເປັນປີແລ້ວເດ້ ຕາຍແລ້ວຄັນເປັນແນວນີ້ອີກ 2 ປີແລ້ວເດ້ເປັນຈັ່ງຊີ້ ອຸກຢູ່ຈັກຊິເຮັດແນວໃດ ຄັນວ່າເປີດປະເທດແລ້ວ ຊິໃຄຕິ ບໍ່ມີເງິນ ງົບປະມານບໍ່ມີເລີຍໂລດ ຕ້ອງອາສັຍເງິນເຂົ້ານໍານັກທ່່ອງທ່ຽວ.”

ກ່ຽວກັບເຣື່ອງນີ້ ຕາງໜ້າ ສະມາຄົມທຸຣະກິຈທ່ອງທ່ຽວລາວ ເວົ້າວ່າ ໄລຍະຜ່ານມາ ກໍເຄີຍມີແຜນການ ທີ່ ຈະເປີດຮັບນັກທ່ອງທ່ຽວຕ່າງປະເທດ ຈາກປະເທດຄວາມສ່ຽງຕໍ່າ ໄດ້ເຂົ້າມາທ່ຽວລາວ ແຕ່ສະພາບການຣະບາດຂອງໂຄວິດ-19 ໃນລາວ ກໍບໍ່ມີຄວາມແນ່ນອນ ແລະ ສ້າງຄວາມປອດພັຍ ໃຫ້ກັບນັກທ່ອງທ່ຽວບໍ່ໄດ້ ຢ່າງມີປະສິດທິພາບ ຈຶ່ງເຮັດໃຫ້ແຜນການດັ່ງກ່າວມິດງຽບໄປເລີຍ.

ປັດຈຸບັນ ກໍເປັນເຣື່ອງທີ່ຫຍຸ້ງຍາກຫຼາຍ ທີ່ຈະເຮັດໃຫ້ ທຸຣະກິຈການທ່ອງທ່ຽວ ແລະບໍຣິການໃນລາວ ກັບມາເຄື່ອນໄຫວ ກິຈການໄດ້ຕາມປົກກະຕິ ແລະເປີດການທ່ອງທ່ຽວໄດ້ອີກຄັ້ງ. ສ່ວນການເປີດປະເທດ ເພື່ອຮັບ ນັກທ່ອງທ່ຽວຕ່າງປະເທດ ເຂົ້າມາທ່ຽວໃນລາວ ແທບຈະເປັນໄປບໍ່ໄດ້ເລີຍ ໃນປີ 2021 ນີ້, ດັ່ງຕາງໜ້າ ສະມາຄົມທຸຣະກິຈ ທ່ອງທ່ຽວລາວ ພາຍໃນສະພາການຄ້າ ແລະ ອຸດສາຫະກັມແຫ່ງຊາດ ທ່ານນຶ່ງ ກ່າວຕໍ່ ວິທຍຸເອເຊັຽເສຣີ ໃນວັນທີ 14 ຕຸລາ ນີ້ວ່າ:

“ແຕ່ວ່າຢູ່ລາວເຮົານີ້ກໍ ຄືສໍາລັບຂແນງທ່ອງທ່ຽວ ກໍໂຕດ່ານນີ້ ກໍເພິ່ນຊິເປີດມື້ໃດນິ່ ຄືຊິຍັງດົນຢູ່ໄດ໋ນິ່ ທີ່ແລກເຂົາເຈົ້າກໍຊິເປີດໄດ໋ ປະເທດໃດທີ່ເຂົ້າມາໄດ້ເລີຍ ໂດຍທີ່ບໍ່ກັກໂຕ ແລ້ວມີເງື່ອນໄຂຫຍັງຕ່າງໆ ທີ່ຊິເຂົ້າມາທ່ຽວຢູ່ດອກ ແຕ່ດຽວນີ້ເພິ່ນມິດໄປແລ້ວ.”

ທ່ານ Aaditya Mattoo ຫົວໜ້ານັກເສຖສາດທະນາຄານໂລກ ປະຈໍາພາກພື້ນເອເຊັຽຕາເວັນອອກ ແລະປາຊິຟິກ ກ່າວໃນບົດຣາຍງານຂອງທະນາຄານໂລກ ໃນເດືອນຕຸລາ 2021 ນີ້ ຣະບຸວ່າ ການເລັ່ງສັກວັກຊິນ ແລະ ການກວດຫາເຊື້ອ ເພື່ອຄວບຄຸມການແຜ່ຣະບາດຂອງໂຄວິດ-19 ຈະສາມາດຟື້ນຟູກິຈກັມທາງເສຖກິຈໃຫ້ແກ່ບັນດາປະເທດ ທີ່ກໍາລັງພົບກັບ ສະພາບຄວາມຫຍຸ້ງຍາກທາງດ້ານເສຖກິຈໄດ້ໄວທີ່ສຸດ ພາຍໃນ 6 ເດືອນຕົ້ນປີ ຂອງປີ 2022.

ເມື່ອເດືອນກັນຍາທີ່ຜ່ານມານີ້ ທະນາຄານພັທນາເອເຊັຽ (Asian Development Bank (ADB)) ໄດ້ປັບອັດຕຣາການຂຍາຍໂຕ ທາງເສຖກິຈລາວ ເຫຼືອ 2.3% ໃນປີ 2021, ເນື່ອງຈາກສະພາບເສຖກິຈໃນລາວ ຂຍາຍໂຕຊ້າ ຣັຖບານບໍ່ສາມາດຈັດເກັບລາຍຮັບຕ່າງໆໄດ້ ຕາມແຜນ ເປັນຕົ້ນ ພາສີ ເງິນລົງທຶນຈາກຕ່າງປະເທດ ແລະລາຍຮັບອື່ນໆ ຫຼຸດລົງຕາມໄປນໍາ ເຊັ່ນ: ຄ່າທໍານຽມ, ອາກອນ ຊຶ່ງອາຈສົ່ງຜົລກະທົບຕໍ່ ການຊໍາຣະເງິນຕົ້ນ ແລະດອກເບັ້ຽ ໃຫ້ກັບຕ່າງປະເທດ ແລະ ບໍຣິສັດເອກຊົນລາວ ທີ່ຣັຖບານລາວກູ້ຢືມມາເພື່ອລົງທຶນ ໃນໂຄງການທພັທນາ ໂຄງຮ່າງພື້ນຖານຂອງປະເທດ.

ແນວໃດກໍຕາມ ຫາກທຽບໃສ່ອັດຕຣາການຂຍາຍໂຕ ທາງເສຖກິຈລາວ ໃນປີ 2020 ທີ່ຜ່ານມາ ຄື ຢູ່ທີ່ 0.55% ຍັງຖືວ່າ ໃນປີ 2021 ນີ້ ຣັຖບານລາວ ສາມາດປັບໂຕ ແລະສົ່ງເສີມທຸຣະກິຈຂນາດໃຫຍ່ ໃຫ້ກັບມາເຄື່ອນໄຫວໄດ້ ຈໍານວນນຶ່ງ ເປັນຕົ້ນ ໂຄງການກໍ່ສ້າງທາງຣົດໄຟ ລາວ-ຈີນ, ໂຄງການຂຸດຄົ້ນບໍ່ແຮ່ ແລະ ໂຄງການສ້າງເຂື່ອນ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ