ຢາເສພຕິດຣະບາດຢູ່ ລາວ

ຈໍາປາທອງ
2020-10-09
ອີແມວລ໌
ຄໍາເຫັນ
Share
ພິມ
ພີທິຈູດທໍາລາຍ ຢາເສບຕິດ ເມື່ອປີ 2019 ທີ່ ແຂວງຫຼວງນໍ້າທາ
ພີທິຈູດທໍາລາຍ ຢາເສບຕິດ ເມື່ອປີ 2019 ທີ່ ແຂວງຫຼວງນໍ້າທາ
ນັກຂ່າວພົລເມືອງ

ເນື່ອງໃນໂອກາດວັນຕ້ານຢາເສພຕິດ ລາວ ທີ 12 ຕຸລາ ຫລາຍແຂວງຂອງລາວ ໄດ້ມີການຈູດທໍາຣາຍຢາເສບຕິດ ທີ່ຖືກຍຶດໄດ້ຈໍານວນ ຫລວງຫລາຍ ໃນຂນະທີ່ ປະເທດລາວ ຍັງປະເຊີນກັບບັນຫາ ການຣະບາດ ຂອງຢາເສບຕິດ ຢ່າງໜັກໜ່ວງ ໂດຍສະເພາະໃນໄລຍະ ທີ່ເຊື້ອພຍາດໂຄວິດ-19 ແຜ່ຣະບາດຢູ່ນີ້.

ເນື່ອງຈາກບໍ່ມີການລາດຕະເວນ ແລະ ຕັ້ງຈຸດກວດກາ ເພື່ອສະກັດກັ້ນ ແລະປາບປາມ ເຮັດໃຫ້ພວກຄ້າຢາເສບຕິດ ສວຍໂອກາດ ດັ່ງເຈົ້າ ໜ້າທີ່ ກົມຕໍາຣວດປ້ອງກັນຢາເສບຕິດ ກະຊວງປ້ອງກັນຄວາມສງົບ ຜູ້ຂໍສງວນຊື່ ແລະຕໍາແໜ່ງ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 9 ຕຸລາ ນີ້ວ່າ:

“ຄັນສິທຽບໃສ່ກະຍັງໜັກຫັ້ນແຫລະເນາະ ມັນກະຣະບາດຄືວ່າຫັ້ນແຫລະ ມັນດຽວນີ້ເນາະ ບັນຫາຈາກຝີ່ນແທ້ກະບໍ່ປານໃດເນາະ ມັນມາ ໜັກທາງແອັມເຟຕາມີນ ຢາບ້ານີ້.”  

ທ່ານກ່າວວ່າ ຢາເສບຕິດ ທີ່ຣະບາດໜັກທີ່ສຸດໃນລາວ ຄື ແອັມເຟຕາມີນ ແລະຢາບ້າ, ສ່ວນຫຼາຍຈະຣະບາດຢູ່ແຂວງພາກເໜືອເປັນຕົ້ນ ບໍ່ແກ້ວ, ຫົວພັນ, ອຸດົມໄຊ ແລະຫລວງນໍ້າທາ ຍ້ອນຫາຊື້-ຂາຍໄດ້ງ່າຍ ແລະຣາຄາຖືກ ຄືປະມານ 5 ພັນກີບຕໍ່ເມັດ. ຢາເສບຕິດທັງໝົດນັ້ນ ຄາດວ່າຖືກລໍາລຽງມາຈາກແຂວງບໍ່ແກ້ວ ແຕ່ບໍ່ຮູ້ວ່າ ຕົ້ນທາງຂອງຢາເສບຕິດ ມາຈາກໃສແທ້.

ເຈົ້າໜ້າທີ່ຕໍາຣວດປ້ອງກັນຄວາມສງົບ ແຂວງບໍ່ແກ້ວ ທ່ານນຶ່ງ ທີ່ບໍ່ປະສົງອອກຊື່ ແລະຕໍາແໜ່ງ ເວົ້າຕໍ່ວິທຍຸເອເຊັຽເສຣີ ໃນມື້ດຽວກັນ ນັ້ນວ່າໃນໄລຍະທີ່ເກີດການຣະບາດຂອງໂຄວິດ-19 ນີ້ ຢາເສບຕິດ ກໍຣະບາດແທ້ ແລະ ຂ້ອນຂ້າງໜັກຫລາຍສົມຄວນ ຍ້ອນບໍ່ມີການ ລາດຕະເວນ ຂອງເຈົ້າໜ້າທີ່ ແລະວ່າຢາເສບຕິດທີ່ຣະບາດໜັກທີ່ສຸດຄືຢາບ້າ ຊຶ່ງຄາດວ່າຖືກລໍາລຽງມາຈາກເຂດ 3 ຫຼ່ຽມຄໍາປະເທດ ພະມ້າ:

“ແມ່ນແຫຼະ ໂຄວິດໜັກຫລາຍ ເພາະວ່າທາງຝັ່ງແຂວງ ບໍ່ແກ້ວ ຈະໄດ້ຕັ້ງໜ່ອຍ ສະເພາະກິດ ລາດຕະເວນ, ລາດຕະເວນ ມີແຕ່ແຂວງ ບໍ່ແກ້ວ ກັບຫລວງນໍ້າທາ ລາດແຕ່ຊຽງຮຸ້ງລົງມາຈໍາບ້ານມັອມ ເດືອນລະເທື່ອ ງົບປະມານແມ່ນໃຊ້ຈອງຈີນ ຈີນເປັນຜູ້ຂຶ້ນງົບ ອັດຕຣາຢູ່ ອັດຕຣາກິນ ຈີນຮັບຜິດຊອບໝົດ.”

ທ່ານກ່າວຕື່ມວ່າເຈົ້າໜ້າທີ່ຄວບຄຸມ ແລະປ້ອງກັນຢາເສບຕິດ ແຂວງບໍ່ແກ້ວ, ແຂວງຫຼວງນໍ້າທາ ແລະຈີນຈະອອກໄປລາດຕະເວນຕາມລໍາ ແມ່ນໍ້າຂອງຕອນເທິງ ຈາກເມືອງຊຽງຮຸ່ງ ສິບສອງພັນນາ ປະເທດຈີນ ລົງມາຮອດບ້ານມອມ ເມືອງຕົ້ນເຜິ້ງ ຂອງລາວ ເດືອນລະເທື່ອ ອັນຊ່ອຍໃຫ້ມີການຫລຸດຜ່ອນ ການລັກລອບຂົນສົ່ງສານ ທີ່ໃຊ້ໃນການ ຜລິດຢາບ້າ ແລະ ຢາເສບຕິດປະເພດອື່ນໆ ໄດ້ເປັນຢ່າງດີ.

ຊາວລາວຄົນນຶ່ງ ທີ່ຂໍບໍ່ອອກຊື່ ຢູ່ນະຄອນຫລວງວຽງຈັນ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 9 ຕຸລານີ້ວ່າ ຢາກໃຫ້ຣັຖບານລາວ ເອົາໃຈໃສ່ ໃນການແກ້ໄຂບັນຫາຢາເສບຕິດໃນລາວ ໃຫ້ຫຼຸດໜ້ອຍຖອຍລົງ ຍ້ອນມັນເປັນພັຍຕໍ່ ຜູ້ເສບຢາເສບຕິດນັ້ນ ທັງເປັນອັນຕຣາຍຕໍ່ສຸຂພາບ, ຕໍ່ຣະບົບເສັ້ນປະສາດ ຮວມໄປເຖິງອະນາຄົດ ນໍາດ້ວຍ:

“ກ່ຽວກັບຜົລຮ້າຍຂອງຢາເສບຕິດນີ້ ກໍເຫັນວ່າມັນເປັນເຣື່ອງບໍ່ດີ ມັນເຮັດໃຫ້ຜູ້ໃດ ຕົກເຂົ້າໄປຢູ່ໃນຄວາມສ່ຽງເຣື່ອງຢາເສບຕິດມັນຈະເປັນ ຜົລກະທົບ ຕໍ່ອະນາຄົດ ກະໄດ້ເອົາໃຈໃສ່ຊ່ວຍ.”

ໃນໂອກາດວັນຕ້ານຢາເສບຕິດລາວ, ຫລາຍແຂວງໃນລາວ ໄດ້ຈູດທໍາຣາຍຢາເສບຕິດ ທີ່ຖືກຍຶດໄດ້ຈາກຂະບວນການຊື້-ຂາຍຢາເສບຕິດ ຢູ່ພາຍໃນປະເທດ. ແຂວງຫລວງນໍ້າທາ ເປັນແຂວງທໍາອິດ ທີ່ໄດ້ຈູດ ເຜົາທໍາຣາຍຢາບ້າ 57 ພັນປາຍເມັດ, ເຮໂຣອີນ 75 ກຣາມ, ຢາໄອສ 23 ກິໂລ, ຝິ່ນ 1.3 ກິໂລ, ສານເຄມີທີ່ໃຊ້ໃນການ ຜລິດຢາບ້າ 100 ກິໂລປາຍແລະສານ ເຄມີອື່ນໆອີກຈໍານວນ 7.5 ກິໂລ ໃນມື້ວັນທີ 8 ຕຸລານີ້.

ກ່ຽວກັບບັນຫາຢາເສບຕິດໃນລາວ ທ່ານ ທອງລຸນ ສີສຸລິດ ນາຍົກຣັຖມົນຕຣີ ໄດ້ກ່າວຕໍ່ກອງປະຊຸມສະພາ ແຫ່ງຊາດ ຊຸດທີ 8 ເທື່ອລ່າສຸດ ນີ້ວ່າ ປັດຈຸບັນ ການຜລິດແລະການຄ້າຂາຍ ຢາເສບຕິດ ໄດ້ກາຍເປັນ ຂະບວນການຂ້າມຊາດ ທີ່ ຣັຖບານ ແລະ ປະຊາຊົນໃນທົ່ວໂລກ ພ້ອມກັນຕໍ່ຕ້ານ ຢ່າງແຂງແຮງ. ເຖິງແມ່ນວ່າ ຫລາຍປະເທດ ໄດ້ເພີ່ມມາຕການ ແລະຄວາມພຍາຍາມໃນການສະກັດກັ້ນ, ປາບປາມ ແລະ ແກ້ໄຂ ບັນຫາດັ່ງກ່າວ ຢ່າງຕໍ່ເນື່ອງ ປານໃດກໍຕາມ ແຕ່ການຜລິດ, ການໃຊ້, ການຄ້າຂາຍ ແລະການລໍາລຽງຂົນສົ່ງ ຢາເສບຕິດໃນໂລກ ແລະ ຢູ່ໃນລາວ ກໍຍັງບໍ່ຫລຸດໜ້ອຍຖອຍລົງ ແລະ ມີແນວໂນ້ມ ຂຍາຍໂຕຂຶ້ນ ຢ່າງໜ້າເປັນຫວ່ງ.

ທ່ານກ່າວຕື່ມວ່າ ປະເທດລາວ ບໍ່ພຽງແຕ່ເປັນປະເທດທາງຜ່ານ ໃນການຂົນຍ້າຍ ຢາເສບຕິດ ແຕ່ອາດເປັນປະເທດ ທີ່ຜລິດຢາເສບຕິດ ຢູ່ກໍເປັນໄດ້ ສະນັ້ນຈຶ່ງຂໍໃຫ້ກະຊວງປ້ອງກັນ ຄວາມສງົບ ເອົາໃຈໃສ່ ໃນການກວດກາຢາເສບຕິດ ພາຍໃນປະເທດຢ່າງເຂັ້ມງວດ, ດັ່ງທີ່ ທ່ານກ່າວຕອນນຶ່ງວ່າ:

“ມ້າງໄດ້ຫລາຍຄະດີ ແຕ່ຍັງບໍ່ໝົດ ດຽວນີ້ຍັງຄ້າຂາຍ ຍັງເສບຫລາຍຢູ່ທາງໃນກະມີ ບາງເທື່ອບໍ່ສະເພາະເປັນທາງຜ່ານ ຂ້າພະເຈົ້າໄດ້ ເວົ້າກັບກະຊວງ ກ່ຽວຂ້ອງແລ້ວວ່າ ຍົກດີໆ ບໍ່ແມ່ນແຕ່ສະເພາະເປັນ ທາງຜ່ານຜລິດຢູ່ນີ໋ ກະມີຫຼາຍໃດ໋ ເຂົາວ່າແນວນັ້ນ ອັນນີ້ຣັຖບານ ໄດ້ເອົາໃຈໃສ່ ພາກສ່ວນກ່ຽວຂ້ອງ ໄດ້ເອົາໃຈໃສ່ ຂໍໃຫ້ສະມາຊິກ ສະພາ ເປັນຫູເປັນຕານໍາກັນ ແລ້ວກະຊ່ວຍປາບປາມ ອັນນີ້ໃຫ້ໄດ້.”  

ຢາເສບຕິດສ່ວນໃຫຍ່ ຖືກຜລິດໃນຣັຖຊານ ຂອງພະມ້າ ຊຶ່ງຢູ່ກົງກັນຂ້າມກັບ ລາວແລະໄທຍ ແລະການຜລິດນັ້ນເພິ່ມຂຶ້ນ. ສໍານັກງານ ຄະນະກັມການປ້ອງກັນ ແລະປາບປາມຢາເສບຕິດ ຫຼື ປປສ. ປະເທດໄທຍຣາຍງານເມື່ອວັນທີ 1 ກໍຣະກະດາ ທີ່ຜ່ານມາວ່າ ແຕ່ເດືອນ ຕຸລາ 2019 ຫາ ເດືອນມິຖຸນາ 2020 ກວດພົບການລັກລອບ ຢາເສບຕິດເຂົ້າມາໄທຍ ໃນພື້ນທີ່ 7 ແຂວງຊາຍແດນ ໄທຍ-ລາວ ທັງໝົດ 107 ຄັ້ງ ໂດຍສະເພາະ ໃນໄລຍະການຣະບາດ ຂອງໄວຣັສ ໂຄວິດ-19, ຢຶດຢາບ້າໄດ້ 22 ລ້ານ ປາຍເມັດ, ຢາໄອສ໌ 600 ປາຍກິໂລ ແລະກັນຊາ 6,000 ປາຍກິໂລ.

ເພື່ອແກ້ໄຂບັນຫາຢາເສບຕິດ ຢ່າງຍືນຍົງ ຣັຖບານ ທີ່ເປັນໜ່ວຍງານຫລັກໃນການຄວບຄຸມ ແລະປ້ອງກັນຢາເສບຕິດ ມີຄວາມຈໍາເປັນ ໃນການເຮັດໃຫ້ປະຊາຊົນທັງ 2 ປະເທດໄທຍ-ລາວ ເຂົ້າໃຈເຖິງ ຜົລກະທົບ ແລະຄວາມສ່ຽງຕ່າງໆ ທີ່ອາຈເກີດຂຶ້ນຈາກຢາເສບຕິດ, ດັ່ງ ພັນຕໍາຣວດຕຣີ ສຸລິຍາ ສິງຫະກະມົນ ຮອງເລຂາທິການຄະນະ ກັມການປ້ອງກັນ ແລະປາບປາມຢາເສບຕິດ ປະເທດໄທຍ ກ່າວຕໍ່ວິທຍຸ ເອເຊັຍເສຣີ ໃນມື້ວັນທີ 9 ຕຸລາ ນີ້ວ່າ:

ທ່ານກ່າວວ່າ “ເຮົາພຍາຍາມທຸກວິທີທາງ ແຕ່ວ່າດ້ວຍຊາຍແດນການໄປມາຫາສູ່ ແລະພາສາທີ່ເຮົາໃຊ້ກັນເຮົາຄຸ້ນເຄີຍກັນ ມັນກໍຍັງມີ ການລັກລອບຢູ່ຕລອດ ໃນຊາຍແດນໄທຍກັບທາງ ສປປລາວ, ການທີ່ປະຊາຊົນທັງ 2 ປະເທດເຂົ້າໃຈ ແລະໃຫ້ຄວາມສໍາຄັນຈະເປັນຜົລ ໃຫ້ການປ້ອງກັນ ປາບປາມຢາເສບຕິດນີ້ ບັນລຸຜົລ.”

ເພື່ອແກ້ໄຂບັນຫາຢາເສບຕິດ ທີ່ກໍາລັງແພ່ລາມເພິ່ມຂຶ້ນ ໃນປະເທດລຸ່ມແມ່ນໍ້າຂອງ ຮວມທັງລາວ, ສໍານັກງານປ້ອງກັນຢາເສບຕິດ ແລະ ອາຊຍາກັມ UNODC ຂອງ ສະຫະປະຊາຊາດ ໄດ້ຈັດຕັ້ງໂຄງການ Global SWART ແລະ Mekong MOU ກ່ຽວກັບການຄວບຄຸມ ຢາເສບຕິດ ໃນເຂດລຸ່ມແມ່ນໍ້າຂອງ, ເຝົ້າຕິດຕາມສະຖານະການ ຢາເສບຕິດ ແລະ ໃຫ້ຄໍາແນະນໍາກ່ຽວກັບ ການຮ່ວມມື ໃນການກວດຫາ ສານທີ່ໃຊ້ໃນການຜລິດຢາບ້າ.

ໃນຣາຍງນຂອງ UNODC ຣະບຸວ່າ ໄທຍ ແລະລາວ ມີການຜລິດຢາເສບຕິດ ແລະຄ້າມະນຸດ ທີ່ຂຍາຍໂຕຢ່າງຕໍ່ເນື່ອງ. ເມື່ອປີ 2019 ຢຶດ ຢາເສບຕິດປະເພດ amphetamine ຢູ່ໃນຂົງເຂດເອເຊັຽ ຕາເວັນອອກ ແລະ ເອເຊັຍຕາເວັນອອກສ່ຽງໃຕ້ ໄດ້ຫລາຍເຖິງ 140 ຕັນ ຊຶ່ງສ່ວນໃຫຍ່ຜລິດຢູ່ຣັຖຊານ ປະເທດພະມ້າ ທີ່ມີຊາຍແດນຕິດກັບໄທຍ ແລະລາວ. ແລະຍ້ອນມີການຜລິດເພິ່ມຂຶ້ນ ຈຶ່ງເຮັດໃຫ້ໄທຍ ແລະ ລາວ ກາຍເປັນຈຸດຄ້າຢາເສບຕິດ ທີ່ສໍາຄັນແຫ່ງນຶ່ງ ຂອງໂລກ.

ເຕັມຫນ້າ