ອິນເດັຽ ຊ່ອຍເຫຼືອ ພົລເມືອງຂອງຕົນ ໃນເຂດເສຖກິຈ ພິເສດ ສາມຫຼ່ຽມຄຳ

ໃນໄລຍະບໍ່ດົນມານີ້ ທາງການອິນເດັຽ ໄດ້ປະສານງານ ໄປຍັງທາງການລາວ ໃນການຊ່ອຍເຫລືອ ພົລເມືອງອິນເດັຽ ທີ່ຖືກຕົວະຍົວະ ໄປເຮັດວຽກເປັນສແກມເມີຣ໌ ຢູ່ພາຍໃນເຂດເສຖກິຈ ພິເສດ ສາມຫລ່ຽມຄຳ ເມືອງຕົ້ນເຜິ້ງ ແຂວງບໍ່ແກ້ວ ຈຳນວນ 11 ຄົນເພື່ອເດີນທາງ ກັບປະເທດ ພ້ອມແຈ້ງເຕືອນ ຜູ້ທີ່ຕ້ອງການ ໄປເຮັດວຽກ ຢູ່ຕ່າງປະເທດ ໃຫ້ລະວັງບໍ່ໃຫ້ຕົກເປັນເຫຍື່ອ ຂອງກຸ່ມນັກຕົ້ມຕຸນ.

ກ່ຽວກັບເຣື່ອງນີ້ ວິທຍຸເອເຊັຽເສຣີ ໄດ້ຕິດຕໍ່ໄປຫາ ສະຖານທູຕ ອິນເດັຽ ປະຈຳປະເທດໄທຍ ແລະສະຖານທູຕ ອິນເດັຽ ປະຈຳປະເທດລາວ ເພື່ອສອບຖາມວ່າ ຍັງມີພົລເມືອງອິນເດັຽ ອີກປະມານຈັກຄົນ ທີ່ລໍຖ້າການຊ່ອຍເຫລືອ ແລະໄດ້ມີການດຳເນີນການ ແນວໃດ ໃນການຕິດຕາມ ແລະປ້ອງກັນ ບໍ່ໃຫ້ຄົນອິນເດັຽ ຕົກເປັນເຫຍື່ອ ຂອງກຸ່ມນັກຕົ້ມຕຸນ ແຕ່ເຈົ້າໜ້າທີ່ ທີ່ກ່ຽວຂ້ອງຍັງບໍ່ສາມາດ ໃຫ້ຂໍ້ມູນໄດ້.

ນອກຈາກນີ້ ວິທຍຸເອເຊັຽເສຣີ ຍັງໄດ້ຕິດຕໍ່ໄປຫາ ຄະນະຄຸ້ມຄອງ ເຂດເສຖກິຈ ພິເສດ ສາມຫລ່ຽມຄຳ ເພື່ອສອບຖາມ ກ່ຽວກັບ ການໃຫ້ການຊ່ອຍເຫລືອ ຄົນຕ່າງປະເທດ ທີ່ຖືກຕົວະຍົວະ ໄປເຮັດວຽກເປັນສແກມເມີຣ໌ວ່າ ປັດຈຸບັນ ຍັງຫລາຍປານໃດ ແລະມີແນວທາງໃດ ໃນການຊ່ອຍເຫລືອ ພວກເຂົາເຈົ້າ ແຕ່ເຈົ້າໜ້າທີ່ ທີ່ກ່ຽວຂ້ອງ ບໍ່ສາມາດໃຫ້ຂໍ້ມູນໄດ້.

ເຖິງແມ່ນວ່າ ຍັງບໍ່ສາມາດເຂົ້າເຖິງຂໍ້ມູນ ທາງການ ແບບທັນທີໄດ້ນັ້ນ ວິທຍຸເອເຊັຽເສຣີ ກໍໄດ້ສອບຖາມ ຊາວລາວ ທີ່ເຮັດວຽກຢູ່ພາຍໃນ ເຂດເສຖກິຈ ພິເສດ ສາມຫລ່ຽມຄຳ ແລະຮັບຮູ້ຂໍ້ມູນ ຢ່າງບໍ່ເປັນທາງການວ່າ ຍັງມີຄົນອິນເດັຽ ບາງຄົນ ກຳລັງຈະເດີນທາງ ເຂົ້າໄປເຮັດວຽກ ດັ່ງກ່າວນີ້ ໃນເຂດເສຖກິຈ ພິເສດ ສາມຫລ່ຽມຄຳ ເພີ່ມຕື່ມ ໃນໄລຍະບໍ່ດົນນີ້.

ດັ່ງຄົນງານລາວ ທີ່ຮູ້ເຫດການທ່ານນຶ່ງ ກ່າວຕໍ່ວິທຍຸ ເອເຊັຽເສຣີ ໃນວັນທີ 02 ພຶສຈິກາ 2022 ນີ້ວ່າ:

“ຄົນອິນເດັຽ ກໍມາ ປະມານ 3-4 ຄົນນີ້ແຫລະ, ຄົນໄທຍ ກໍປະມານ 10 ປາຍ ຫລືວ່າ 20 ນີ້ແຫລະ.  ເຂົາກໍມາຕອບແຊັດກັນນີ້ແຫລະ ບໍ່ມີບັນຫາດອກ ເຣື່ອງຈີນຊິທຸບຊີຕີ ມັນມີບັນຫາ ຢູ່ບ່ອນວ່າ ຄົນງານເຮັດບໍ່ໄດ້ ແລ້ວເຂົາລັກໂຕນອອກ ແລ້ວຈີນຈັບໄດ້ ອັນນີ້ບັນຫາໜັກ.”

ທ່ານກ່າວຕື່ມວ່າ ມາຮອດປັດຈຸບັນ ຊາວໜຸ່ມຫລາຍຄົນ ທີ່ເຄີຍມີປະສົບການ ເຮັດວຽກເປັນສແກມເມີຣ໌ແລະໄດ້ໂຈະ ການໄປເຮັດວຽກນີ້ ໄປເຣີ່ມທະຍອຍ ກັບໄປເຮັດວຽກ ດັ່ງກ່າວນີ້ອີກຄັ້ງ ຍ້ອນຄ່າຈ້າງແຮງງານ ວຽກງານອື່ນໆ ພາຍໃນປະເທດລາວ ໜ້ອຍ. ການເຮັດວຽກ ເປັນສແກມເມີຣ໌ ໄດ້ເງິນເດືອນ ປະມານ 3,000-5,000 ຢວນ ຫລື ປະມານ 7,500,000-12,500,000 ກີບຕໍ່ເດືອນ ສຳລັບຜແນກພາສາໄທຍ, ສ່ວນຜແນກ ພາສາຈີນ, ວຽດນາມ ແລະ ອັງກິດ ຈະໄດ້ເງິນຄ່າຈ້າງ ຫລາຍກວ່າ.

ດັ່ງທ່ານໄດ້ກ່າວວ່າ:

“ເຮົາກໍເຄີຍເຮັດຢູ່ ແຕ່ວ່າດຽວນີ້ ເຮົາກັບໄປຢູ່ບ້ານ ແລ້ວແຕ່ວ່າອີກ 2-3 ມື້ວ່າຊິໄປເຮັດອີກ ບໍ່ຢ້ານດອກເຮົາເຮັດໄດ້ແລ້ວ ບໍ່ຢ້ານ. ກໍໄປຄັ້ງທຳອິດຫັ້ນ ກໍບໍ່ຮູ້ອີ່ຫຍັງ ກໍຄ່ອຍຮຽນ ຄ່ອຍໄປ ແລ້ວບາດນີ້ ເຂົາຮູ້ມາແລ້ວ ກໍໄປເປີດບີນໄດ້ ແລ້ວກໍເຂົາກໍຮັບ.”

ນອກຈາກທາງການລາວ, ໄທຍ, ວຽດນາມ ແລະ ຈີນ ຍັງມີຄົນງານ ຈາກປະເທດອື່ນໆ ໃນພາກພື້ນເອເຊັຽ ແລະເອເຊັຽຕາເວັນອອກສຽງໃຕ້ ຖືກຕົວະຍົວະ ເຂົ້າມາເຮັດວຽກ ດັ່ງກ່າວນີ້ ຢູ່ພາຍໃນເຂດເສຖກິຈ ພິເສດ ສາມຫລ່ຽມຄຳ ໂດຍສະເພາະໃນໄລຍະ 2 ເດືອນຜ່ານມາ ພາຍຫລັງພາກສ່ວນ ທີ່ກ່ຽວຂ້ອງ ໃນປະເທດກັມພູຊາ ແລະພະມ້າ ດຳເນີນການປາບປາມ ກຸ່ມນັກຕົ້ມຕຸນ ດັ່ງກ່າວນີ້ ຢ່າງໜັກ.

ດັ່ງຄົນງານລາວ ທີ່ມີປະສົບການ ຖືກຕົວະຍົວະ ໄປເຮັດວຽກ ສແກມເມີຣ໌ ຢູ່ເຂດເສຖກິຈ ພິເສດ ສາມຫລ່ຽມຄຳ ທ່ານນຶ່ງກ່າວຕໍ່ວິທຍຸ ເອເຊັຍເສຣີ ໃນມື້ດຽວກັນນີ້ວ່າ:

“ໂດຍມີຄົນຕ່າງປະເທດ ຈັ່ງຊິຫວາຫລາຍທີ່ສຸດ ກໍຈີນ ກັບໄທຍ ແລ້ວກໍຄົນລາວນີ້ແຫລະ. ກໍເຫັນຢູ່ ມັນກໍຈະມີພວກອິນໂດ. ຢູ່ນີ້ ສ່ວນຫລາຍ ກໍເປັນພວກອິນໂດ, ແລ້ວກໍວຽດນາມ, ຈີນ. ໂດຍ ມີ! ມີມາເລ ສ່ວນຫລາຍ ອິນເດັຽບໍ່ຄ່ອຍມີ ປົກກະຕິ ຢາກໄດ້ແທ້ໆ ກໍຄົນຈີນ ກັບຄົນວຽດ.”

ທ່ານກ່າວຕື່ມວ່າ ໃນລະຫວ່າງເດືອນ ກໍຣະກະດາ ຫາ ເດືອນສິງຫາ ທີ່ຜ່ານມາ ຊຶ່ງເປັນໄລຍະ ທີ່ເຂດເສຖກິຈ ພິເສດ ສາມຫລ່ຽມຄຳ ປະກາດປິດດ່ານ ຊົ່ວຄາວນັ້ນ ກຸ່ມນັກຕົ້ມຕຸນ ກໍໄດ້ຖືໂອກາດ ດັ່ງກ່າວ ໃນການປ່ຽນແປງ ຂໍ້ຕົກລົງ ກ່ຽວກັບການເຮັດວຽກ ເປັນສແກມເມີຣ໌ ພາຍໃນປະເທດລາວ ເປັນຕົ້ນ. ສຳລັບຜູ້ທີ່ ບໍ່ສາມາດເຮັດວຽກ ດັ່ງກ່າວນີ້ໄດ້ ຈະຖືກໃຫ້ອອກ ຈາກງານ ຊຶ່ງແຕກຕ່າງ ຈາກກ່ອນໜ້ານີ້ ທີ່ວ່າ ຜູ້ໃດບໍ່ສາມາດ ເຮັດວຽກໄດ້ ຈະຖືກສົ່ງໂຕ ໄປຍັງກຸ່ມນັກຕົ້ມຕຸນອື່ນ ຫລືຂາຍຕໍ່.

ສຳລັບວຽກສແກມເມີຣ໌ ຢູ່ປະເທດລາວນັ້ນ ຈະເປັນການຕົວະຍົວະ ໃຫ້ຄົນຕ່າງປະເທດ ໂອນເງິນຜ່ານລະບົບ ອ໋ອນລາຍນ໌ ແຕ່ພັດບໍ່ຖືກດຳເນີນຄະດີ ຕາມກົດໝາຽ ຍ້ອນຜູ້ເສັຽຫາຍ ບໍ່ສາມາດຊອກຫາ ຕົ້ນຕໍນັກຕົ້ມຕຸນ ແລະແຈ້ງຄວາມຕໍ່ ເຈົ້າໜ້າທີ່ຕຳຣວດ ເພື່ອດຳເນີນຄະດີ ຕາມກົດໝາຽໄດ້.

ດັ່ງນັກກົດໝາຽ ທີ່ຕິດຕາມຂ່າວສານ ກ່ຽວກັບຂະບວນການ ຕົວະຕົ້ມ ໃຫ້ມາເຮັດວຽກ ເປັນສແກມເມີຣ໌ ຢູ່ປະເທດລາວ ທ່ານນຶ່ງກ່າວວ່າ:

“ແຕ່ວ່າ ແມ່ນໃຜຊິໄປເອົາໂທດບາດນີ້ ເອົາໃສ ໄປເອົາໂທດ ສຳຄັນແມ່ນໃຜ ຊິໄປເອົາໂທດ ເຂົາມັນບໍ່ມີຜູ້ເສັຽຫາຍ ຊິໄປເອົາຜິດເຂົາໄດ້ ກໍສາມາດຟ້ອງໄດ້ ຖ້າມີຜູ້ຟ້ອງເນາະ ຖ້າມີຜູ້ຟ້ອງ ເອີ້ນວ່າ ມີຜູ້ເສັຽຫາຍຫັ້ນນ່າ ແຕ່ມັນບໍ່ເຫັນ ຜູ້ເສັຽຫາຍຄົນໃດ ຊິມາຟ້ອງ ຫັ້ນເດ.”

ອີງຕາມການແຈ້ງການ ຂອງສະຖານທູຕ ອິນເດັຽ ປະຈຳນະຄອນຫລວງວຽງຈັນ ລະບຸວ່າ ໃນໄລຍະບໍ່ດົນມານີ້ ມີຄົນອິນເດັຽ ຈຳນວນນຶ່ງ ຖືກນາຍໜ້າ ທີ່ຢູ່ເມືອງດູໄບ, ນະຄອນຫລວງບາງກອກ, ສິງກະໂປ ແລະ ອິນເດັຽ ຊັກຊວນ ໃຫ້ໄປເຮັດວຽກ ໃນຕຳແໜ່ງ ພະນັກງານຂາຍ, ພະນັກງານ ການຕະຫຼາດ ດິຈິທັລ (Digital Sales, Marketing Executive) ແລະ ພະນັກງານ ບໍຣິການ ລູກຄ້າ (Customer Support Service) ຂອງບໍຣິສັດ ທີ່ເຮັດທຸຣະກິຈ ດ້ານເທັກໂນໂລຢີ ຊຶ່ງມີຄວາມກ່ຽວຂ້ອງ ກັບແກ້ງຄອລເຊັນເຕີຣ໌ ແລະກຸ່ມສໍ້ໂກງເງິນ ຜ່ານລະບົບອ໋ອນລາຍນ໌ ຢູ່ເຂດເສຖກິຈ ພິເສດ ສາມຫລ່ຽມຄຳ ດ້ວຍການສັມພາດງານແບບງ່າຍໆ ທົດສອບຄວາມສາມາດ ໃນການພີມເບື້ອງຕົ້ນ ສເນີລາຍໄດ້ ທີ່ຂ້ອນຂ້າງສູງ ຈອງທີ່ພັກ, ປີ້ຍົນ ແລະ ເຮັດວີຊ້າ ໃຫ້ໂດຍຄົນອິນເດັຽ ບໍ່ຕ້ອງເສັຽຄ່າໃຊ້ຈ່າຍໃດໆ. ກ່ຽວກັບເຣື່ອງນີ້ ທາງການອິນເດັຽ ຈຶ່ງອອກແຈ້ງເຕືອນ ໄປຍັງພົລເມືອງ ອິນເດັຽ ທີ່ຕ້ອງການເດີນທາງ ໄປເຮັດວຽກ ຢູ່ຕ່າງປະເທດ ໃຫ້ລະວັງ ບໍ່ໃຫ້ຕົກເປັນເຫຍື່ອ ຂອງກຸ່ມນັກຕົ້ມຕຸນ ດັ່ງກ່າວ.