ຕໍາຣວດບໍ່ແກ້ວຈັບກຸ່ມ ລໍາລຽງ ຜົງຂາວ

ມະນີຈັນ
2019-06-07
ອີແມວລ໌
ຄໍາເຫັນ
Share
ພິມ
ເຮືອ ບໍຣິການ ນັກທ່ອງທ່ຽວ ຢູ່ແຂວງບໍ່ແກ້ວ
ເຮືອ ບໍຣິການ ນັກທ່ອງທ່ຽວ ຢູ່ແຂວງບໍ່ແກ້ວ
RFA

ເຈົ້າໜ້າທີ່ຕໍາຣວດ ກວດຄົນເຂົ້າເມືອງ ປະຈໍາດ່ານສາກົລ ບ້ານມັອມ ເມືອງຕົ້ນເຜິ້ງ ແຂວງບໍ່ແກ້ວ ຈັບຄົນລາວ 3 ຄົນ ແລະພະມ່າ 1 ຄົນ ຢູ່ດ່ານ ແລະ ໄດ້ນໍາເອົາໂຕໄປ ສອບສວນ ເມື່ອວັນທີ 29 ພຶສພາ ທີ່ຜ່ານມາ ຍ້ອນລັກລອບລໍາລຽງ ແປ້ງຝຸ່ນຂາວ ໃສ່ ເຮືອມາແຕ່ຈີນ ຈໍານວນ 10 ຕັນ ກ່ອນຈະສົ່ງໄປບ້ານປຸງ ປະເທດພະມ່າ, ຕາມຄໍາເວົ້າຂອງເຈົ້າໜ້າທີ່ຕໍາຣວດ ແຂວງບໍ່ແກ້ວ ຕໍ່ RFA ໃນມື້ວັນທີ 6 ມິຖຸນານີ້ ທ່ານ ກ່າວວ່າ:

"ສັນຊາດລາວ 3 ມຽນມ່າ 1 ເຂົາຂົນມາໃສ່ເຮືອມາ ມາແຕ່ສົບໂລຍຈີນ ເປັນແປ້ງຝຸ່ນຂາວໆ 10 ໂຕນ ເຂົາກໍວ່າສິເອົາໄປສົ່ງໃຫ້ພະມ້າທີ່ວ່າ ຜູ້ກ່ຽວນີ້ຜິດ ຖືວ່າເອກກະສານ ການເຄື່ອນຍ້າຍແລ້ວ ຕົ້ນຕໍກໍຖືວ່າຜິດ ຫລົບຫລີກການໜີພາສີຫັ້ນແຫຼະ.”

ຄົນລາວທັງ 3 ຄົນໃຫ້ການວ່າ ພວກເຂົາໄດ້ຄ່າຈ້າງຮວມກັນທັງໝົດ 1 ພັນຢວນ ເພື່ອໃຫ້ສົ່ງແປ້ງຝຸ່ນຂາວໄປປະເທດພະມ້າ ແລະບໍ່ຮູ້ວ່າ ແປ້ງຝຸ່ນຂາວເປັນຂອງຜູ້ໃດ ຈະເອົາໄປເປັນສ່ວນປະສົມ ຂອງຢາເສບຕິດ ຫຼືບໍ່ກໍບໍ່ຮູ້ ຍ້ອນວ່າເປັນພຽງຜູ້ຮັບຈ້າງສົ່ງ ແປ້ງຝຸ່ນຂາວໄປພະມ້າ ເທົ່ານັ້ນ. ແຕ່ເຈົ້າໜ້າທີ່ຕໍາຣວດ ບໍ່ເຊື່ອວ່າ ແມ່ນຄວາມຈິງຫຼືບໍ່ ຈະຕ້ອງໄດ້ສືບສວນຕໍ່ໄປ ທ່ານກ່າວ:

"ເຂົາກໍວ່າສິເອົາໄປສົ່ງໃຫ້ພະມ້າ ແຕ່ວ່າສິເອົາໄປເຮັດຫຍັງ ເຂົາກໍບໍ່ຮູ້ແຫຼະເພາະວ່າ ເຂົາເປັນຜູ້ຂົນສົ່ງ ມັນຢູ່ເຮືອນີ້ເດ໊ ເຫັນບໍ່ ເຈົ້າບໍ່ຮັບ ມັນສິແມ່ນບໍ່ ລາວວ່າ ໄດ້ເງິນຄ່າຈ້າງ 1 ພັນຢວນ ໝົດຫັ້ນນະ ແຕ່ວ່າໄທເຮົາຍັງບໍ່ທັນເຊື່ອເທື່ອ 10 ໂຕນນີ໋ 1 ພັນຢວນ ເຮົາກໍບໍ່ທັນ ເຊື່ອເທື່ອ.”

ແລະຄົນພະມ່ານັ້ນ ກໍໃຫ້ການວ່າແປ້ງຝຸ່ນຂາວ ຈາກຈີນ 10 ຕັນ ບໍ່ຮູ້ເປັນແປ້ງອີ່ຫຍັງ ມີແຕ່ຜູ້ນຶ່ງ ບອກໃຫ້ໄປເອົາຢູ່ລາວ ເທົ່ານັ້ນ. ປັດຈຸບັນ ແປ້ງຝຸ່ນຂາວຈໍານວນ ດັ່ງກ່າວ ໄດ້ຖືກສົ່ງໄປກວດສອບ ຢູ່ກົມນິຕິວິທຍາ ຫາກຜົລກວດອອກມາ ບໍ່ພົບສານເສບຕິດ ແຕ່ເປັນທາດແປ້ງທັມມະດາ ຜູ້ກ່ຽວທັງ 4 ຄົນ ກໍຈະບໍ່ມີຄວາມຜິດ ໃນຂໍ້ຫາມີຢາເສບຕິດ ໄວ້ໃນຄອບຄອງ.

ໜັງສືພິມຄວາມສງົບ ຂອງລາວ ກໍໄດ້ຣາຍງານຂ່າວ ເມື່ອວັນທີ 5 ມິຖຸນາ ນີ້ວ່າ ແປ້ງຝຸ່ນຂາວທີ່ພວກກ່ຽວ ລັກລອບຂົນມານັ້ນ ແມ່ນສ່ວນປະສົມຜລິດຢາເສບຕິດ ແຕ່ກໍບໍ່ມີການຢືນຢັນ ຈາກ ເຈົ້າໜ້າທີ່ຕໍາຣວດ ແຕ່ຢ່າງໃດ. ປັດຈຸບັນ ຜູ້ຕ້ອງຫາທັງ 4 ຄົນນັ້ນ ຍັງຖືກຂັງຢູ່ໃນຄຸກ ເພື່ອດໍາເນີນການສອບສວນ ຕໍ່ໄປ.

ເຕັມຫນ້າ