ລາວຕົກຕໍ່າລົງເຖິງ ອັນດັບ 138 ໃນດ້ານຄວາມໂປ່ງໄສ ຈາກ 180 ປະເທດໃນໂລກ

ໃນປີ 2023 ທີ່ຜ່ານມາ, ອົງການຄວາມໂປ່ງໄສສາກົລ ໄດ້ຈັດອໍາດັບປະເທດລາວ ຢູ່ໃນອັນດັບທີ່ 136​ ຈາກທັງໝົດ 180 ປະເທດ ມີຄະແນກລວມພຽງແຕ່ 28 ຄະແນນ ຈາກຄະແນນສູງສຸດ 100 ຄະແນນ ເຊິ່ງໜ້ອຍກວ່າປີ 2022.

ໃນປີ 2022 ປະເທດລາວຖືກຈັດໃຫ້ຢູ່ໃນອັນດັບທີ 126 ໃນຈໍານວນ 180 ປະເທດທົ່ວໂລກ ໂດຍມີ 31 ຄະແນນ.

ສາເຫດທີ່ປະເທດລາວ ຢູ່ໃນອັນດັບທີ່ຕ່ຳກວ່າເກົ່າ ຍ້ອນວ່າ ບໍ່ສາມາດປາບປາມ ຜູ້ທີ່ສໍ້ຣາສບັງຫລວງລາຍໃຫຍ່ໄດ້, ແຕ່ທີ່ຜ່ານມາຈະມີແຕ່ພະນັກງານ ທັມມະດາເທົ່ານັ້ນ ທີ່ຖືກປະຕິບັດວິໄນ ຍ້ອນການພົວພັນສໍ້ຣາສບັງຫລວງ.      

ການແກ້ໄຂບັນຫາ ການສໍ້ຣາສບັງຫລວງໃນປັດຈຸບັນ ສ່ວນຫຼາຍແລ້ວ ຜູ້ທີ່ມີຖານະຕໍາແໜ່ງສູງຈະລອດ, ແຕ່ ຜູ້ທີ່ມີຕໍາແໜ່ງນ້ອຍນັ້ນ ຈະບໍ່ລອດ ເຂົ້າທໍານ້ອງທີ່ວ່າ ຂີ້ຊ້າງລອດ ຂີ້ມອດຄາ.

ເຈົ້າໜ້າທີ່ທາງການລາວ ທ່ານນຶ່ງ ໄດ້ກ່າວຕໍ່ວິທຍຸ ເອເຊັຽເສຣີ ວ່າ:

“ນອກຈາກເຮັດຜູ້ນ້ອຍ ແກ້ຜູ້ນ້ອຍໄດ້ ແບບບໍ່ມີຊັ້ນໃຫຍ່ເບັ່ງອໍານາດໄດ້ຊໍ່າເຂົາຫັ້ນນ່າD ບາດອໍານາດໃຫຍ່ຈອມແຫເຂົາກໍາໝົດລະເດ້ ຊິໄປແກ້ຈັ່ງໃດຕາມອ້າຍຄຶດ ມັນເຂົ້າກັບຄໍາຂວັນສໄມ ແຕ່ກີ້ປົດປ່ອຍໃໝ່ ຂີ້ຊ້າງລອດ ຂີ້ມອດຄ້າງ.” 

ຜູ້ທີ່ມີຕໍາແໜ່ງໃຫຍ່ ຈະບໍ່ຖືກລົງໂທດ ແຕ່ສ່ວນຫຼາຍຜູ້ທີ່ຕໍາແໜ່ງ ທັມມະດາ ຫຼື ເປັນພະນັກງານທົ່ວໄປຈະຖືກປົດຕໍາແໜ່ງ ແລະ ໄດ້ຮັບໂທດ.

ເຈົ້າໜ້າທີ່ ທາງການລາວ ທ່ານນີ້ ກ່າວຕື່ມອີກວ່າ:

“ມັນຈັ່ງຊີ້ເຣື່ອງຢູ່ລາວເຮົາ ມັນເປັນໂດມິໂນ້ ລະຫວ່າງ ຜູ້ໃຫຍ່ ກັບ ຜູ້ໃຫຍ່ ເນາະ. ລູກຜູ້ນັ້ນ ມາເອົາລູກຜູ້ນີ້ ລະເຂົາກິນນໍາກັນ. ເຂົາຮ່ວມຫົວກັນ ລະມັນຊິແກ້ໄດ້ ໝາກບ່ອນສໍາຄັນເຂົາໄປວາງໄວ້ໝົດ.”

ປະຊາຊົນ ບໍ່ສາມາດມີສ່ວນຮ່ວມໄດ້ຢ່າງເຕັມທີ່ ໃນການຕ້ານການສໍ້ຣາສບັງຫຼວງ ແຕ່ສ່ວນຫຼາຍແລ້ວ ຈະເປັນຄົນຣັຖກວດກາກັນເອງ ເຊິ່ງມັນເປັນໄປໄດ້ຍາກ ຍ້ອນວ່າ ຄົນຣັຖເອງ ຮູ້ຈັກກັນ.

ນັກທຸຣະກິຈ ທ່ານນຶ່ງ ໄດ້ໃຫ້ສໍາພາດຕໍ່ເອເຊັຽເສຣີ ວ່າ:

“ການເປີດໂອກາດໃຫ້ປະຊາຊົນ ມີສ່ວນຮ່ວມມັນຍັງໜ້ອຍໂພດ. ເພິ່ນເວົ້າຢູ່ວ່າ ປະຊາຊົນມີສ່ວນຮ່ວມເປັນຫູເປັນຕາ ແລະ ຊ່ອງທາງລະຢູ່ໃສລະ ໂຕເອງກວດເງິນໃນຖົງໂຕເອງ. ຫຼົບບ່ອນແຂງ ແທງບ່ອນອ່ອນ ມັນກະບໍ່ໄດ້ແຫຼະ.”  

ປະຊາຊົນ ຍັງບໍ່ເຊື່ອໝັ້ນວ່າ ພາກຣັຖຈະສາມາດປາບປາມ ການສໍ້ຣາສບັງຫຼວງໄດ້. ປະຊາຊົນ ລາວ ທ່ານນຶ່ງ ໄດ້ກ່າວຕໍ່ວິທຍຸ ເອເຊັຽເສຣີ ວ່າ:

“ນີ້ແຫຼະທີ່ທ່ານຖາມວ່າ ປາບໄດ້ບໍ່ ມັນຊິປາມໄດ້ຊໍ້າເບາະລະ. ຂ້ອຍຊິເວົ້າໂລດວ່າ ຂ້ອຍບໍ່ເຊື່ອ ຜູ້ໃດກະບໍ່ມີນັ້ນຈັກເທື່ອຫັ້ນນ່າ ຍອມ.”

ເຖິງຢ່າງໃດກໍຕາມ, ເຈົ້າໜ້າທີ່ອົງການອົງການກວດກາ ຣັຖບານ ຢູ່ຂັ້ນແຂວງທ່ານນຶ່ງ ຜູ້ທີ່ບໍ່ປະສົງອອກຊື່ ແລະ ສຽງ ໄດ້ກ່າວຕໍ່ວິທຍຸ ເອເຊັຽເສຣີ ວ່າ:

“ໃນຊ້ວງນີ້ ໜ່ວຍງານ ຂອງອົງການກວດກາຣັຖບານ ກໍຕ້ອງໄດ້ເອົາຈິງ ໃນການກວດສອບ.”

ໃນໂອກາດພິທີ ສເລີມສລອງ ວັນຕ້ານການສໍ້ຣາສບັງຫຼວງສາກົລ ຄົບຮອບ 20 ປີ ເມື່ອວັນທີ 8 ທັນວາ 2023 ທີ່ຜ່ານມາ, ເຈົ້າໜ້າທີ່ຂັ້ນສູງ ຂອງລາວ ໄດ້ຣາຍງານ ວ່າ ພົບການສໍ້ຣາສບັງຫຼວງ ເປັນມູນຄ່າຫຼາຍ 100 ຕື້ກີບ ແລະ ຫຼາຍລ້ານໂດລ້າຣ໌ ພ້ອມທັງກວດພົບຜູ້ທີ່ເຂົ້າໄປພົວພັນຫຼາຍຄົນ.

ອີງຕາມ ທ່ານ ວິໄລວັນ ບຸດດາຄໍາ, ຮອງຫົວໜ້າ ອົງການຕ້ານການສໍ້ຣາສ ບັງຫຼວງຂັ້ນສູງກາງ, ປີ 2023 ນີ້ອົງການກວດກາແຫ່ງຣັຖ ໄດ້ກວດພົບຜົລເສັຍຫາຍ ຈາກການສໍ້ຣາສບັງຫຼວງ ທີ່ເກີດຂຶ້ນໃນໂຄງການລົງທຶນ ຂອງຣັຖມູນຄ່າ ຫຼາຍກ່ວາ 800 ຕື້ກີບ ແລະ 16 ລ້ານໂດລ້າຣ໌ ໂດຍມີການກວດພົບ ຜູ້ມີສ່ວນພົວພັນ 34 ຄົນ. ໃນນັ້ນເປີດການສືບສວນ-ສອບສວນ ແລ້ວ 19 ຄົນ ແລະ ອີກ 15 ຄົນ ຢູ່ໃນລະຫວ່າງການກັກໂຕ ເຊິ່ງຜູ້ກ່ຽວຈຳນວນດັ່ງກ່າວ ໄດ້ກະທຳຜິດ ໃນຫຼາຍຂໍ້ຫາ ທັງການສວຍໃຊ້ຕຳແໜ່ງ-ໜ້າທີ່, ໃຫ້ ແລະ  ຮັບສິນບົນ, ຍັກຍອກ-ສໍ້ໂກງຊັບຂອງຣັຖ, ປອມແປງເອກະສານ ແລະ ອື່ນໆ.

ໃນປີ 2023 ທີ່ຜ່ານມາ, ປະເທດເດັນມາກ ເປັນປະເທດອັນດັບທີ 1 ທີ່ມີຄວາມໂປ່ງໄສ ຫຼາຍທີ່ສຸດ ໂດຍມີຄະແນນລວມ 90 ຄະແນນ ຕໍ່ມາແມ່ນປະເທດຟິນແລນ ເປັນອັນດັບທີ 2 ມີ 87 ຄະແນນ, ແລະ ອັນດັບທີ 3 ແມ່ນປະເທດ ນິວຊີແລນ ມີຄະແນນລວມຢູ່ທີ່ 85 ຄະແນນ.

ໃນປີ 2021 ປະເທດລາວ ຖືກຈັດຢູ່ໃນອັນດັບທີ 128 ໃນຈໍານວນ 180 ປະເທດໃນໂລກ ມີຄະແນນລວມ 30 ຄະແນນ.