ຍັງພົບການສໍ້ຣາສ ບັງຫຼວງຫຼາຍ ເຖິງຈະມີອົງການກວດສອບ ເຮັດໜ້າທີ

ອົງການກວດສອບແຫ່ງຣັຖ ມີແຜນຈະກວດສອບ ໂຄງການລົງທຶນຂອງຣັຖ ທັງທີ່ໃຊ້ງົບປະມານ ຂອງຣັຖ ແລະເງິນກູ້ຢືມ ທັງໝົດ 103 ເປົ້າໝາຍ ໃນປີ 2023 ນີ້ ເພື່ອຄວາມໂປ່ງໃສ ແລະປາບປາມການສໍ້ຣາສບັງຫຼວງ, ບໍ່ໃຫ້ງົບປະມານ ຂອງຣັຖຮົ່ວໄຫຼ, ປົກປ້ອງຜົລປໂຍດ ຂອງຣັຖ. ກ່ຽວກັບເຣື່ອງທີ່ວ່ານີ້ ປະຊາຊົນລາວຜູ້ນຶ່ງ ຢູ່ແຂວງຈໍາປາສັກ ເວົ້າຕໍ່ວິທຍຸ ເອເຊັຽ ເສຣີ ໃນມື້ວັນທີ 5 ມິຖຸນານີ້ວ່າ ຢາກໃຫ້ອົງການ ກວດສອບ ແຫ່ງຣັຖ ແລະ ຣັຖບານລາວ ເອົາໃຈໃສ່ກວດສອບ ບັນດາໂຄງການລົງທຶນ ຕ່າງໆ ຢ່າງເຂັ້ມງວດ, ຫາກກວດພົບພະນັກງານພັກ-ຣັຖ ກະທໍາຄວາມຜິດ ກໍຄວນລົງໂທດ ຕາມລະບຽບກົດໝາຍຢ່າງເດັດຂາດ.

“ເອີ... ດຽວນີ້ຫັ້ນເຂັ້ມງວດຢູ່ດອກ ເຂົາລົງມາເຮັດລົງມາເຜີຍແຜ່ ເຣື່ອງກົດໝາຍ ເພາະວ່າມີແຕ່ຄົນຫາເງິນ ແບບໃສ່ຖົງໂຕເອງຫັ້ນ ບໍ່ແມ່ນວ່າຊິເຂົ້າຣັຖ ມີແຕ່ກວດກາຄືນ ຕ້ອງໃຫ້ມັນເຂັ້ມງວດແດ່ ບັນຫາໂຕນີ້ຫັ້ນ.”

ທ່ານເວົ້າວ່າ ໄລຍະ 2-3 ປີມານີ້ ເຫັນທາງການເພິ່ນກວດສອບ ໂຄງການລົງທຶນຕ່າງໆຂອງຣັຖ ຢ່າງຕໍ່ເນື່ອງ, ແຕ່ປະຊາຊົນລາວ ກໍບໍ່ເຄີຍໄດ້ຮູ້ຂັ້ນຕອນ ໃນການກວດສອບ ແລະຜົລຂອງການກວດສອບ ຢ່າງລະອຽດ ແລະເມື່ອກວດພົບ ຜູ້ກະທໍາຜິດ ກໍບໍ່ເຄີຍເຫັນເພິ່ນ ປັບໃໝໃສ່ໂທດ ຕາມລະບຽບກົດໝາຍ ແລະປະຊາຊົນ ຢູ່ແຂວງນີ້ອີກຜູ້ນຶ່ງ ກໍເວົ້າເຖິງອົງການ ກວດສອບ ແຫ່ງຣັຖ, ອົງການກວດກາຣັຖບານ ທັງໃນລະດັບແຂວງ ແລະສູນກາງ ວ່າ ພວກເພິ່ນໄດ້ຕິດ ຕາມກວດສອບ ແລະກວດກາ ບັນດາໂຄງການຕ່າງໆເປັນປະຈໍາທຸກປີ ແຕ່ກໍບໍ່ເຫັນແກ້ໄຂບັນຫາ ການຮົ່ວໄຫຼ ຂອງງົບປະມານ ແລະການສໍ້ຣາສ ບັງຫຼວງ ຂອງພະນັກງານ ພັກ-ຣັຖ ໄດ້ຢ່າງເປັນຮູບປະທັມເທື່ອ. ທ່ານເວົ້າວ່າ ຫາກທາງການຍັງບໍ່ເອົາໃຈໃສ່,​ ບໍ່ເຂັ້ມງວດໃນວຽກງານ ການກວດສອບ ແລະການກວດກາ ແລະຍັງໃຫ້ມີການເຫັນຜົລປໂຍດ ສ່ວນຕົວ ຫຼາຍກວ່າ ການພັທນາປະເທດຊາຕ, ບັນຫາງົບປະມານຮົ່ວໄຫຼ, ການປົກປ້ອງຜົລປໂຍດ ຂອງຣັຖ, ການປາບປາມ ການສໍ້ຣາສ ບັງຫຼວງ ແລະຄວາມບໍ່ໂປ່ງໃສ ກໍຈະແກ່ຍາວຕໍ່ໄປເລື້ອຍໆ.

“ກວດກາແລ້ວບໍ່ມີການແກ້ໄຂ ກະຄືເກົ່າ ເຫັນແລ້ວບໍ່ແກ້ຫັ້ນນ່າ ຄັນເຫັນບັນຫາແລ້ວມີການແກ້ໄຂ ປັບປຸງ ມັນກະຊິມີການຫຼຸດໜ້ອຍ ຖອຍລົງແດ່.”

ຢູ່ແຂວງບໍຣິຄໍາໄຊ ເຈົ້າໜ້າທີ່ ສະພາປະຊາຊົນ ແຂວງທ່ານນຶ່ງ ກ່າວຕໍ່ວິທຍຸ ເອເຊັຽ ເສຣີ ໃນມື້ດຽວກັນນີ້ວ່າ ປັດຈຸບັນ ມີປະຊາຊົນລາວ ຈໍານວນບໍ່ໜ້ອຍ ຮ້ອງຮຽນກ່ຽວກັບ ບັນຫາຕ່າງໆ ທີ່ເກີດຈາກໂຄງການລົງທຶນ ຂອງຣັຖ ເປັນຕົ້ນ ບັນຫາທີ່ດິນ, ບັນຫາການຊົດເຊີຍ ບໍ່ເໝາະສົມ, ໂຄງການບໍ່ໄດ້ມາຕຖານ ແລະບັນຫາອື່ນໆ ຍ້ອນເຈົ້າໜ້າທີ່ ພັກ-ຣັຖ ບໍ່ເອົາໃຈໃສ່ ໃນເຣື່ອງດັ່ງກ່າວເທົ່າທີ່ຄວນ.

ພ້ອມດຽວກັນນັ້ນ ທ່ານກໍເວົ້າເຖິງ ເຣື່ອງການຕິດຕາມ ການກວດສອບ ໂຄງການລົງທຶນ ຂອງຣັຖ ແລະການກວດກາ ເຈົ້າໜ້າທີ່ ພັກ-ຣັຖ ທີ່ຮັບຜິດຊອບໂຄງການ ແລະການລົງໂທດ ຫຼື ການດໍາເນີນຄະດີກັບພະນັກງານ ພັກ-ຣັຖ ທີ່ກະທໍາຜິດວ່າ ເປັນເຣື່ອງຂອງຜແນການທີ່ກ່ຽວຂ້ອງ ພົວພັນກັນເອງ.

ດັ່ງນັ້ນ ຄົນພາຍນອກຈຶ່ງບໍ່ຮູ້.

“ປະຊາຊົນສເນີຮ້ອງທຸກມາຢູ່ ກ່ຽວກັບບັນຫານັ້ນນີ້ ທີ່ວ່າລະເມີດບໍ່ ຫຼື ວ່າ ພະນັກງານຣັຖນັ້ນນີ້ ຫັ້ນນ່າ ກະເຫັນຫຼາຍຢູ່ ແຕ່ວ່າເພິ່ນກະປະສານກັນ ໂດຍກົງ ໂດຍທີ່ບໍ່ໄດ້ຜ່ານເຮົາ.”
ເຈົ້າໜ້າທີ່ ອົງການກວດສອບ ແຫ່ງຣັຖຂັ້ນສູນກາງ ເວົ້າວ່າ ອົງການກວດສອບແຫ່ງ ຣັຖມີໜ້າທີ່ຕິດຕາມ ກວດກາບົດສລຸບ ການຈັດຕັ້ງປະຕິບັດງົບປະມານ ແຫ່ງຣັຖ, ໂຄງການລົງທຶນ ຂອງຣັຖ, ການກູ້ຢືມເງິນ ແລະເງິນຊ່ອຍເຫຼືອ, ວິສາຫະກິຈ ແລະທະນາຄານທຸຣະກິຈຣັຖ ລົງທຶນ. ສ່ວນຜົລການກວດສອບ ຫາກພົບວ່າ ມີງົບປະມານຮົ່ວໄຫຼ, ໂຄງການບໍ່ໄດ້ມາຕຖານ, ເຈົ້າໜ້າທີ່ ພັກ-ຣັຖ ລະເມີດກົດໝາຍ ຫຼື ສໍ້ຣາສບັງຫຼວງ ກໍຈະສົ່ງຂໍ້ມູນ ໃຫ້ອົງການກວດກາ ຣັຖບານ ເປັນຜູ້ພິຈາຣະນາຕໍ່ໄປ.

ດັ່ງທີ່ທ່ານກ່າວຕໍ່ ວິທຍຸ ເອເຊັຽ ເສຣີ ໃນມື້ວັນທີ 5 ມິຖຸນານີ້ວ່າ:

“ແມ່ນ ກວດໂຄງການຂອງຣັຖ ທີ່ໄດ້ທຶນຊ່ວຍເຫຼືອ ຈາກຕ່າງປະເທດ ຫຼືວ່າ ທຶນຂອງຣັຖບານ ກວດນີ້ແນ່ນອນ ການກວດສອບ ກວດເນາະ ແຕ່ວ່າການລົງໂທດບໍ່ ຊິເປັນອົງການ ກວດກາ ເປັນຈັດການເຈົ້າ.”
ຕາມແຜນ ການກວດສອບ ໂຄງການລົງທຶນ ຂອງຣັຖໃນປີ 2023 ນີ້ ຈະກວດສອບ ບົດສລຸບຂາດຕົວກ່ຽວກັບ ການຈັດຕັ້ງປະຕິບັດ ງົບປະມານແຫ່ງຣັຖ 36 ເປົ້າໝາຍ, ໂຄງການລົງທຶນ ຂອງຣັຖ 20 ເປົ້າໝາຍ, ໂຄງການເງິນກູ້ຢືມ ແລະເງິນຊ່ອຍເຫຼືອ 22 ເປົ້າໝາຍ, ທະນາຄານຣັຖ ແລະທະນາຄານທີ່ຣັຖຮ່ວມລົງທຶນ 7 ເປົ້າໝາຍ ແລະຣັຖວິສາຫະກິຈ 18 ເປົ້າໝາຍ ຮວມທັງໝົດ 103 ເປົ້າໝາຍ.
ປີ 2022 ຕາມແຜນ ອົງການກວດສອບ ແຫ່ງຣັຖ ຈະກວດສອບໂຄງການ ລົງທຶນຂອງຣັຖ 108 ເປົ້າໝາຍ, ແຕ່ປະຕິບັດໄດ້ 101 ເປົ້າໝາຍ ແລະກວດພົບລາຍຮັບ ທີ່ບໍ່ໄດ້ມອບເງິນ ເຂົ້າງົບປະມານ ຂອງຣັຖ 141.30 ຕື້ກີບ ແລະກວດພົບ ໜ່ວຍງານຂອງຣັຖ ຢູ່ຫຼາຍແຂວງ ທີ່ໃຊ້ຈ່າຍເງິນຄັງ ຂອງແຂວງ ແລະງົບປະມານ ຂອງຣັຖ ແບບບໍ່ຖືກເປົ້າໝາຍ, ເຮັດໃຫ້ຣັຖເສັຍຫາຍ ເປັນເງິນ 78.46 ຕື້ກີບ.
ທ່ານ ວຽງທະວີສອນ ເທບພະຈັນ ກັມມະການສໍາຮອງ ສູນກາງພັກ ປະຊາຊົນປະຕິວັດລາວ ປະທານອົງການ ກວດສອບ ແຫ່ງຣັຖ ໄດ້ກ່າວໃນມື້ເຂົ້າຮັບຕໍາແໜ່ງ ເປັນປະທານອົງການ ກວດສອບແຫ່ງຣັຖ ວັນທີ 20 ມິຖຸນາ 2022 ວ່າ ຈະຮັບ ປະກັນຄຸ້ມຄອງ ງົບປະມານ, ນໍາໃຊ້ງົບປະມານ ໃຫ້ມີປະສິດທິພາບ ແລະໂປ່ງໃສ ຕາມວາຣະແຫ່ງຊາຕ ວ່າດ້ວຍການແກ້ໄຂ ຄວາມຫຍຸ້ງຍາກ ທາງດ້ານເສຖກິຈ-ການເງິນ.