ຊາວລາວອະເມຣິກັນ ຮຽກຮ້ອງ ໃຫ້ປ່ອຍຕົວ ນາງໝວຍ

ໄມຊູລີ
2019-09-23
ອີແມວລ໌
ຄໍາເຫັນ
Share
ພິມ
ຊາວລາວ ອະເມຣິກັນ ຮຽກຮ້ອງໃຫ້ທາງການລາວ ປ່ອຍຕົວ ນາງ ໝວຍ
ຊາວລາວ ອະເມຣິກັນ ຮຽກຮ້ອງໃຫ້ທາງການລາວ ປ່ອຍຕົວ ນາງ ໝວຍ
RFA

ຊາວລາວອົພຍົບ ຈຳນວນນຶ່ງ ທີ່ອາໃສຢູ່ຕ່າງປະເທດ ໂດຍສະເພາະ ສະຫະຣັດ ອະເມຣິກາ ໄດ້ພາກັນປະທ້ວງ ຣັຖບານສປປລາວ ໃນ ທ້າຍອາທິດ ທີ່ຜ່ານມາ ໃນເວລາມີກອງປະຊຸມຫຼວງ ອົງການ MOU ຊຶ່ງປະກອບດ້ວຍ 11 ອົງການຈັດຕັ້ງ ຂອງຊາວລາວ ອົພຍົບ ທີ່ ເມືອງ St. Paul, ຣັດ Minnesota ສະຫະຣັດ ອະເມຣິກາ ແຕ່ມຶ້ວັນທີ 21 ຫາ 23 ກັນຍາ 2019, ທ່ານ ວັນລັງ ຄຳສຸກ ນ່ຶງໃນພວກ ປະທ້ວງ ໄດ້ກ່າວຮຽກຮ້ອງ ໃຫ້ທາງການລາວ ໃຫ້ປ່ອຍຕົວນາງໝວຍ ຕອນນຶ່ງວ່າ:

“ໃນຣະຍະມໍ່ໆມານີ້ ເຂົາໄດ້ຈັບກຸມຄົນ ຕົວຢ່າງ ກໍຣະນີສຸດທ້າຍ ນາງໝວຍ ທີ່ຖືກຈັບກຸມຄຸມຂັງ ຢູ່ໃນປັດຈຸບັນນີ້ ມື້ນີ້ຂ້າພະເຈົ້າເອງ ເຮົາທຸກຄົນຊາວລາວ ທຸກຄົນຢູ່ທີ່ນີ້ ມີຄວາມເປັນຫ່ວງເປັນໃຍ ຕໍ່ໂຊກຊະຕາກັມ ຂອງນາງໝວຍ ຂໍໃຊ້ສິດໃນນາມເປັນ ປະຊາຊົນ ລາວ-ອະເມຣິກັນ ຮຽກຮ້ອງໃຫ້ຣັຖບານລາວ ປ່ອຍໂຕບຸກຄົນ ທີ່ຖືກຈັບຄຸມຂັງ ແລະ ຫາຍສາບສູນ ໃຫ້ເຂົາເຈົ້າໄດ້ກັບຄືນມາ ຢູ່ກັບ ຄອບຄົວຂອງເຂົາເຈົ້າ.”

ນອກຈາກນີ້ ທ່ານ ວັນລັງ ຍັງກ່າວອີກວ່າ ປະເທດລາວ ຢູ່ພາຍໃຕ້ການປົກຄອງຜະເດັດການ ພັກປະຊາຊົນລາວ ມາເປັນເວລາ 44 ປີ. ເຂົາບໍ່ໄດ້ນຳຄວາມຈະເຣີນຮຸ່ງເຮືອງ ມາສູ່ປະເທດຊາດບ້ານເມືອງລາວເລີຍ ກົງກັນຂ້າມ ພວກເຂົາຍັງກົດຂີ່ຂົ່ມເຫັງ ປະຊາຊົນລາວ ທຸກ ຊົນເຜົ່າ ໃຫ້ຢູ່ໃນຄວາມທຸກຍາກປາກໝອງ ເຮັດໃຫ້ປະເທດຊາດ ບໍມີຄວາມກ້າວໜ້າ.

ໃນຂນະດຽວກັນ ດຣ. ບຸນທອນ ຈັນທະລາວົງ ປະທານ ພັນທະມິດ ເພື່ອ ປະຊາທິປະໄຕ ໃນລາວ ກໍໄດ້ໄປພົບປະ ເຈົ້າໜ້າທີ່ກະຊວງ ການຕ່າງປະເທດ ເຢັຽຣະມັນ ແລະ ກໍຮຽກຮ້ອງໃຫ້ປ່ອຍໂຕນາງໝວຍ ເຊັ່ນກັນ:

“ອັນທີ່ນຶ່ງ ໄດ້ກ່າວເຖິງບັນຫາ ສິດທິມະນຸດໃນລາວ ເປັນຕົ້ນການຈັບນາງໝວຍ ແລະ ການຫາຍສາບສູນ ຂອງທ້າວອອດ; ອັນທີ່ສອງ ສເນີໃຫ້ທາງເຢັຽຣະມັນ ເອົາບັນຫາຂອງລາວ ເຂົ້າໄປສເນີຕໍ່ສະພາ ຄວາມໝັ້ນຄົງ ສະຫະປະຊາຊາດ ເຣື່ອງບັນຫາ ວຽດນາມ ຄອບຄອງ ລາວ ບັນຫາຄົນຈີນ ຄອບຄຸມລາວ, ຂໍໃຫ້ເພິ່ນຊ່ອຍພັກດັນ ສະພາສິດທິມະນຸດ ແລະ ເວທີສາກົ ນກົດດັນ ສປປລາວ ໃຫ້ປ່ອຍ ນາງໝວຍ ໃຫ້ມີອິສຣະພາບ ເພາະລາວບໍ່ໄດ້ ເຮັດຜິດຫຍັງໝົດ.”

ນອກຈາກນັ້ນ ດຣ. ບຸນທອນ ຍັງໄດ້ຣາຍງານສະພາບການ ລ່ວງລະເມີດສິດທິມະນຸດ ຢູ່ໃນລາວ ໃຫ້ສະຫະປະຊາຊາດຊາບ ຊຶ່ງຈະປະຊຸມ ກັບເຈົ້າໜ້າທີ່ຣັຖບານສປປລາວໃນເດືອນມົກກະຣາ ປີ 2020 ຈະມາເຖິງ

ຄໍາເຫັນ (2)
Share

ສຽງ​ຈາກ​ປະ​ຊາ​ຊົນ​ລາວ

ນາງມວຍ ກໍເປັນຜູ້ນື່ງ ທີ່ອອກມາເວົ້າມາວ່າ ອອກມາຈົ່ມ ຕາມປະສາຄົນທົ່ວໄປ ທີ່ໄດ້ຮັບຜົນກະທົບ ເລື້ອງນ້ຳຖ້ວມ ແຕ່ການຊ່ອຍເຫລືອຊັກຊ້າ ການຊ່ອຍເຫລືອບໍ່ມີປະສິດທິພາບ ແລະ ລາວກໍເວົ້າເລື້ອງຍານພາຫະນະ ທີ່ຈະເອົາມາຊ່ອຍປະຊາຊົນ ເວລານ້ຳຖ້ວມ ມັນບໍ່ຄ່ອຍ ຢ່າງເຊັ່ນ ເຮລີຄັອບເຕີ ເຮືອ ແລະ ອື່ນໆ ຊຶ່ງຫລາຍຄົນ ກໍເຫັນວ່າ ມັນຂາດເຂີນ ມັນບໍ່ທັນການ ປະຊາຊົນຕ້ອງຊ່ອຍຕົນເອງປະຊາຊົນ ຕ້ອງເອົາໂຕລອດດ້ວຍໂຕເອງ ຕ້ອງຖ້າອີກຫລາຍມື້ ພວກພັກລັດ ຈຶ່ງມາຊ່ອຍ. ທຳມະດາແລ້ວ ພີ່ນ້ອງ ຄົນມັນກໍມີຄວາມຄຶດຄວາມຮູ້ສຶກ ມັນໄດ້ຮັບຄວາມເດືອດຮ້ອນ ເພາະວ່າ ໄດ້ຮັບຜົນກະທົບ ຊິບໍ່ໃຫ້ປາກໃຫ້ເວົ້າ ມັນກໍບໍ່ໄດ້. ສິ່ງທີ່ນາງມວຍ ເວົ້ານັ້ນ ຈະບໍ່ມີໃຜເຂົ້າໃຈລາວໄດ້ ບໍ່ວ່າ ຈະເປັນພັກລັດ ສໍ້ໂກງ ຫລື ຕຳຫລວດ ຜູ້ທີ່ຈັບລາວ, ແຕ່ປະຊາຊົນທີ່ໄດ້ຮັບຜົນກະທົບນຳກັນ ຈາກໄພນ້ຳຖ້ວມນັ້ນ ຈະເຂົ້າໃຈ ຄຳເວົ້າ ຂອງລາວ. ແຕ່ພວກພັກລັດ ແລະ ອໍານາດການປົກຄອງ ຢາກຫາເລື້ອງຈັບລາວນັ້ນ ຈຶ່ງໄດ້ຫາເລື້ອງໃສ່ລາວວ່າ ລາວ ໃສ່ຮ້າຍປ້າຍສີ ອໍານາດລັດ ໂຈມຕີພັກລັດ ໂດຍໄດ້ຮັບການສະໜັບສະໜູນ ຈາກພວກພາຍນອກ. ພີ່ນ້ອງເອີຍ ພັກລັດນີ້ ແຕະຕ້ອງບໍ່ໄດ້ເລີຍບໍ່? ເວົ້າບໍ່ໄດ້ເລີຍບໍ່? ໄປເບິ່ງຂໍ້ຫາ ທີ່ພວກພັກລັກ ຕັ້ງຂໍ້ຫາໃສ່ລາວ ເບິ່ງແຫລະ ວ່າ ນາງໝວຍ ໂຄສະນາ ຕໍ່ຕ້ານພັກລັດ ເຮັດໃຫ້ ອຳນາດພັກລັດ ອ່ອນເພຍ ພຸ້ນນະ ພວກທ່ານ ຈັ່ງແມ່ນ ພັກລັດ ມີກຽດອັນສູງສົ່ງ ສະຫລາດສ່ອງໃສ ແຕະຕ້ອງບໍ່ໄດ້. ບໍ່ວ່າ ລະເລື້ອງນາງມວຍ ແມ່ນເຈົ້າຂອງທີ່ດິນ ທີ່ໄດ້ຮັບຜົນກະທົບ ຈາກໂຄງການພັດທະນາ ອອກມາເວົ້າ ພັກລັດ ຍັງຫາເລື້ອງໃສ່ເຂົາ ວ່າ ເຂົາຕໍ່ຕ້ານພັກລັດ ເຂົາເປັນປະຕິການ ຕິດຕໍ່ກັບກຸ່ມຄົນພາຍນອກ. ພີ່ນ້ອງ ໃນເມື່ອຄົນໄດ້ຮັບຜົນກະທົບ ຊິໃຫ້ເຂົາປິດປາກໄວ້ບໍ່ ຊິໃຫ້ເຂົາ ບໍ່ເວົ້າເລີຍ ຈັກນ່ອຍບໍ່ ມັນບໍ່ໄດ້. ນີ້ລະພີ່ນ້ອງ ຄຳສອນ ຂອງພວກລັດ ທີ່ສອດໃຫ້ປະຊາຊົນ ຕ້ອງຈົ່ງຮັກພັກດີເທົ່ານັ້ນ ຕ້ອງປົກຄອງຄຸ້ມຄອງ ພັກລັດ ຫ້າມເວົ້າຫ້າມວ່າ ຫ້າມແຕະຕ້ອງ. ໃຜເວົ້າໃຜວ່າໃຜແຕະຕ້ອງ ແມ່ນປະຕິການ ແມ່ນຄົນບໍ່ດີໂລດ. ພີ່ນ້ອງ ປະເທດອື່ນຫັ້ນນ່າ ດ້າມປະຊາຊົນອອກມາເວົ້າອອກມາວ່າ ອອກມາວິພາກວິຈານ ມັນບໍ່ເປັນອີ່ຫຍັງດອກ ປະເທດເສລີນະ ເພາະວ່າ ນາງມວຍ ບໍ່ໄດ້ໄປເຂັນຂ້າໃຜ ບໍ່ໄດ້ໄປຈູດເຮືອນໃຜ ບໍ່ໄດ້ເຮັດສິ່ງຜິດກົດໝາຍ ບໍ່ໄດ້ຄ້າຢາບ້າ. ດັ່ງນັ້ນພັກລັດ ຄວນຍົກຍ້ອງລາວ ແລະ ປ່ອຍລາວ ເປັນອິດສະຫລະ ແທນທີ່ຈະໄປກັກຂັງລາວ. ຂອບໃຈ



[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Nov 20, 2019 06:53 AM

ຄົນ​ລາວ

ຈາກ ບໍ່​ຖິ້ມ​ກັນ

ຄົນລາວ ບໍ່ຖິ້ມກັນແທ້ໆ ກະເຫັນແຕ່ ຄົນລາວນອກນີ້ແລ້ວ ກະຂໍເພິ່ງແດ່ ເພາະຄົນລາວໃນ ເຮັດຫຍັງບໍ່ໄດ້ແລ້ວ ອ້າປາກຊື່ໆກະຜິດແລ້ວ. ເປັນແນວໃດ ກະໃຫ້ເບິ່ງກັນແດ່ເດີ. ພວກລູກຫລານທຸກມື້ນີ້ ອົດກັ້ນ ບໍ່ໄຫວ ກະຕ້ອງໄດ້ຫລຸດອອກມາ ຄຳເວົ້າຄຳວ່າ ກະຄືພັກລັດເວົ້າໃນຕອນຮຽນການເມືອງນັ້ນແລ້ວວ່າ ບ່ອນໃດ ທີ່ມີການກົດຂີ່ຂົມເຫັງ ບ່ອນນັ້ນ ຈະມີການລຸກຮື້ຂຶ້ນ ບາດຖືກທີ່ເພິ່ນ ປາບເອົາປາບເອົາ. ມາເຖິງຍຸກນີ້ ກະແມ່ນວ່າ ມີການຄໍຣັບຊັນ ຢູ່ບ່ອນໃດ ກໍມີການທ້ວງຕີງ ຢູ່ບ່ອນນັ້ນ. ຈົ່ງ​ຮຽກ​ຮ້ອງ ໃຫ້​ສາ​ກົນ​ຊ່ວຍ​ລາວ​ແດ່ ນາງ​ໝວຍ​ຫັ້ນ​ນາ. ຕາ​ອີ​ຕົນ​ຫລາຍ ຄົນ​ດີ ຂອງ​ສັງ​ຄົມ ກ້າ​ເວົ້າ​ກ້າ​ວ່າ ເພື່ອ​ສັງ​ຄົມ. ທຸກມື້ນີ້ພັກລັກ ຢ້ານຫລາຍລະແມ່ນ ສື່ສັງຄົມອອນລາຍ ຢ້ານການອອກຄຳຄິດຄຳເຫັນ ຢ້ານການເຕົ້າໂຮມກັນ ທາງອອນລາຍ ຢ້ານການເປີດໂປ່ງຄວາມຂີ້ຮ້າຍ ຂອງພັກລັດ. ດຽວນີ້ ຄົນລາວ ພົບປະກັນ ໂອ້ລົມກັນ ແລະ ແລກປ່ຽນຄວາມຄິດຄວາມເຫັນທາງອອນລາຍ. ເຖິງເວລາແລ້ວ ທີ່ຈະຕ້ອງໄດ້ຮັບຄວາມຈິງ. ຖ້າເບິ່ງໄປຄັກໆແລ້ວ ພັກລັດ ກະຮັບຮູ້ ຄວາມຂີ້ຮ້າຍ ຂອງຕົນເອງແລ້ວ ແຕ່ວ່າ ເຮັດແບບຊູຊີຢູ່ ເພື່ອກຳຕຳແໜ່ງ ກອບໂກຍເອົາເງິນ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Oct 09, 2019 08:48 AM

ເຕັມຫນ້າ