ທ່ານຢົ້ງ ຈັນທະລັງສີ ໂຄສົກ ກະຊວງ ການຕ່າງປະເທດ ສປປລາວ ຊີ້ແຈງວ່າ ຊາວມົ້ງລາວ ທີ່ທາງການໄທ ສົ່ງຄືນໃຫ້ ມື້ວັນທີ 20 ພຶດສະຈິກາ 2008, ມີ 103 ຄົນ ໃນ 29 ຄອບຄົວ. ໃນຈໍານວນນີ້ 3 ຄອບຄົວ ເປັນຍາດພີ່ນ້ອງ ຂອງ ຜູ້ນໍາ ຊາວມົ້ງລາວ 8 ຄົນ ທີ່ຮ່ວມ ໃນການ ຈູດສູນມົ້ງລາວ ໃນການປະທ້ວງ ທາງການໄທ ເມື່ອກາງປີນີ້ ຊຶ່ງທາງການໄທ ໄດ້ຂໍຮ້ອງໃຫ້ ທາງການລາວ ເບິ່ງແຍງ ເອົາໃຈໃສ່ ເປັນພິເສດ. ບາດນີ້ ສະມາຊິກ ຄອບຄົວ ກໍໄດ້ກັບມາ ພົບພໍ້ ຢູ່ຮ່ວມກັນແລ້ວ ດັ່ງທ່ານ ຢົ້ງ ໄດ້ກ່າວວ່າ:
“ແມ່ນໃນ 8 ຄົນແກນນໍາ ທີ່ສົ່ງມາໃນເດືອນ ມິຖຸນາ ຖືວ່າ ຂະເຈົ້າ ມາຮັບຄອບຄົວ ຂອງເຂົາ ຢ່າງຄົບຖ້ວນ ບໍລິບູນ ດ້ວຍຕົນເອງ ແລ້ວຕອນນີ້ ກໍພ້ອມພາກັນ ກັບຄືນເມືອ ບ້ານເກີດ ຕົວເອງແລ້ວ.”
ຜູ້ນໍາ ຊາວມົ້ງລາວ 8 ຄົນ ສ່ວນນຶ່ງ ໄດ້ພົບພໍ້ກັບ ຄອບຄົວແລ້ວ ຍັງເຫລືອແຕ່ 3 ຄອບຄົວ ທີ່ກັບມາ ພ້ອມກັບ ຊຸດ 103 ຄົນນີ້. ນອກຈາກນີ້ ທ່ານຢົ້ງ ຍັງໄດ້ເວົ້າ ອີກວ່າ ການກ່າວຫາ ຂອງພວກສິ້ງຊອມ ດ້ານສິດທິມະນຸດ ເມື່ອບໍ່ດົນນີ້ ທີ່ວ່າ ທາງການລາວ ຈັບກຸມຄຸມຂັງ ຜູ້ນໍາຊາວມົ້ງລາວ 8 ຄົນ ນັ້ນ ບໍ່ເປັນ ຄວາມຈິງ ເພາະມື້ນີ້ ພວກເຮົາ ກໍໄດ້ພິສູດ ໃຫ້ເຫັນແລ້ວ ວ່າ ທັງໝົດ ໄດ້ພົບພໍ້ກັນ. ດັ່ງທ່ານ ໄດ້ກ່າວວ່າ:
“ບໍ່ຄືກັບ ຄໍາເວົ້າ ຂອງ Human Right Watch ຂອງສະຫະຣັຖ ອະເມຣິກາ ທີ່ກ່າວຫາວ່າ ພວກນີ້ ຫາຍສາບສູນໄປ ຫລື ຕິດຄຸກຕິດຕລາງຢູ່ ອັດຕະປື ນີ້ ບໍ່ມີມູນຄວາມຈິງ.”
ແລະ ມື້ອື່ນ ທາງການລາວ ກໍຈະ ສົ່ງຜູ້ນໍາ ຊາວມົ້ງລາວ ທັງ 8 ພ້ອມດ້ວຍຄອບຄົວ ກັບຄືນບ້ານ ທີ່ ຈາກມາ ແລະ ໃຫ້ເງິນຄໍາ ຕາມທີ່ ຣັຖບານ ກໍາໜົດໄວ້ ທັງໝົດ ຕາມເງື່ອນໄຂ ທີ່ໄດ້ແຈ້ງ ກັບ ທາງ ການໄທ ຊຶ່ງສ່ວນຫລາຍ ຈະໄປຢູ່ ແຂວງຊຽງຂວາງ ວຽງຈັນ ບໍລິຄໍາໄຊ ຕາມລໍາດັບ. ທ່ານຢົ້ງ ກ່າວໃນຕອນທ້າຍ ວ່າ ຫາກພວກຂະເຈົ້າ ຢາກໄປຢູ່ ບ້ານຈັດສັນ ຜາຫລັກ ທາງການ ກໍຈະຈັດໃຫ້.