ໄທ ກຽມສົ່ງ ຊາວເຜົ່າມົ້ງ ກັບລາວ ຕື່ມອີກ
2008.10.30
ຊາວເຜົ່າມົ້ງລາວ ບ້ານຫ້ວຍນໍ້າຂາວ ພວມຖືກສົ່ງກັບ ສປປລາວ
ແຫລ່ງຂ່າວ ຈາກສູນຮອງຮັບ ຊາວລາວເຜົ່າມົ້ງ ທີ່ບ້ານຫ້ວຍນ້ຳຂາວ ຂອງໄທ ທີ່ບໍ່ປະສົງ ອອກຊື່ ເຜິຍໃຫ້ຮູ້ວ່າ ໃນຕອນເຊົ້າ ຂອງວັນທີ 29 ຕຸລາ ນີ້ ໄດ້ພົບເຫັນ ທະຫານໄທ ຜູ້ຮັບຜິດຊອບ ໄດ້ເຄື່ອນຍ້າຍ ຊາວລາວ ເຜົ່າມົ້ງ 3 ຄອບຄົວ ອອກຈາກບ້ານຫ້ວຍນ້ຳຂາວ ໄປຢູ່ ກົມທະຫານ ໃນແຂວງເພັດສະບູນ ຊຶ່ງມີການຄາດກັນ ວ່າ ທັງ 3 ຄອບຄົວ ນັ້ນ ຈະຖືກສົ່ງກັບ ສ.ປ.ປ.ລາວ ໃນວັນທີ 31 ຕຸລາ ທີ່ຈະມາເຖິງນີ້ ຕາມຂໍ້ຕົກລົງ ລະຫວ່າງ ລາວ ກັບ ໄທ:
“ຫລ້າສຸດນີ້ ຄືວັນທີ 29 ຕຸລາ ມີປະມານ 3–4 ຄອບຄົວ ຖືກສົ່ງອອກ ຈາກສູນນີ້ ໄປທີ່ ມໍ ພັນ 28 ເພື່ອລໍສະຖານະການ ເມື່ອໃດພ້ອມ ກໍຈະສົ່ງກັບລາວ”
ສ່ວນ ທາງການລາວ ນັ້ນ ນາຍພົນ ຈັດຕະວາ ບົວຊຽງ ຈຳປາພັນ ປະທານ ອະນຸກຳມະການ ຮ່ວມ ລາວ-ໄທ ກ່າວວ່າ ຕາມຂໍ້ຕົກລົງ ລາວ-ໄທ ວ່າດ້ວຍ ການສົ່ງຊາວລາວເຜົ່າມົ້ງ ທີ່ຫລົບໜີ ເຂົ້າໄທ ກັບຄືນລາວນັ້ນ ຈະປະຕິບັດ ການສົ່ງກັບ ໃຫ້ໄດ້ ເດືອນລະປະມານ 200 ຫາ 500 ຄົນ.
“ຝ່າຍໄທວ່າ ວັນທີ 31 ເດືອນ 10 ຈະສົ່ງມາ ແຕ່ສົ່ງມາ ນ້ອຍດຽວ ຄື ມີແຕ່ 20 ປາຍຄົນ ຂ້າພະເຈົ້າ ຍັງໂທໃຫ້ທ່ານ ພົນໂທນິພັດ ວ່າ ເປັນຫຍັງ ຈຶ່ງສົ່ງມານ້ອຍແທ້ ເວົ້າກັນວ່າ ຈະສົ່ງ ເດືອນລະ 500 ຄົນ ແຕ່ວ່າ ຂໍ້ຫຍຸງຍາກ ຂອງໄທແນວໃດ ຂ້າພະເຈົ້າບໍ່ຮູ້.”
ການສົ່ງຊາວລາວ ເຜົ່າມົ້ງ ທີ່ບ້ານຫ້ວຍນ້ຳຂາວ ຂອງໄທ ເປັນໄປຕາມ ການຕົກລົງ ຂອງຄະນະ ອະນຸກຳມະການ ຮ່ວມມື ຮັກສາ ຄວາມສະຫງົບ ຮຽບຮ້ອຍ ລາວ-ໄທ ວ່າດ້ວຍ ການສົ່ງ ຜູ້ລັກລອບເຂົ້າເມືອງ ຜິດກົດໝາຍ ກັບລາວ ປີ 2007.
ຖ້າຫາກວ່າ ໄທ ສົ່ງກັບ ໃນວັນທີ 31 ຕຸລາ ນີ້ ກໍຖືວ່າ ເປັນການສົ່ງກັບ ຄັ້ງທີ 8. ຕາມຕົວເລກ ຫລ້າສຸດ ຊາວລາວເຜົ່າມົ້ງ ທີ່ຍັງອາໃສ ຢູ່ບ້ານຫ້ວຍນ້ຳຂາວນັ້ນ ມີປະມານ 6 ພັນຄົນ.