ທີ່ສະຖານເອກອັກຄະຣາຊທູດ ສາທາຣະນະຣັຖປະຊາຊົນຈີນ ໃນບາງກອກວັນທີ 11 ມິນານີ້ມີການຖແລງຂ່າວກ່ຽວກັບສຖານະການພັຍແຫ້ງແລ້ງ ໃນແມ່ນໍ້າຂອງໂດຍທ່ານ ເຈີ້ນເຕິະໄຫ່ທີ່ປຶກສາທາງການເມືອງ ແລະ ໂຄສົກປະຈໍາສະຖານທູດຈີນ ໄດ້ກ່າວວ່າຈີນຍຶດຖືຫລັກການພັທນາ ຢ່າງຍັ້ງຍືນ ແລະ ຄໍານຶງເຖິງຜົລປະໂຫຍດຂອງປະເທດ ທີ່ຢູ່ໃຕ້ລົງມາເປັນຫລັກ. ພ້ອມດຽວກັນທ່ານກໍໄດ້ກ່າວເຖິງກະແສຂ່າວທີ່ໂຈມຕີ ວ່າຈີນ ເປັນຕົ້ນເຫດຂອງພັຍແຫ້ງແລ້ງວ່າ:
”ຊ່ວງນີ້ ພັຍແຫ້ງແລ້ງໃນພາກອິສານແລະ ພາກເໜືອຂອງໄທແລະ ການກໍ່ສ້າງເຂື່ອນໃນປະເທດຈີນກໍາລັງເປັນປະເດັນທີ່ໄດ້ຮັບຄວາມສົນໃຈຈາກຫລາຍໆຝ່າຍຕົວທ່ານເອງກໍໄດ້ຮັບຊາບຂ່າວຈາກສື່ບາງຂແນງວ່າພັຍແຫ້ງແລ້ງທີ່ເກີດຂຶ້ນນັ້ນມີສ່ວນກ່ຽວຂ້ອງກັບການສ້າງເຂື່ອນໃນຈີນແລະ ເປັນສາເຫດຫລັກທີ່ເຮັດໃຫ້ເກີດສພາບພັຍແຫ້ງແລ້ງ ຢ່າງຮ້າຍແຮງໃນພາກເໜືອພາກອິສານແລະ ພື້ນທີ່ບາງແຫ່ງ ຊຶ່ງທ່ານຂໍຢໍ້າວ່າການກ່າວຫາ ເຊັ່ນນັ້ນຂາດຫລັກຖານແລະ ເປັນການກ່າວຫາທີ່ບໍ່ຖືກຕ້ອງ.”
ເພາະບໍ່ພຽງແຕ່ ປະເທດທ້າຍນໍ້າ ເທົ່ານັ້ນທີ່ໄດ້ຮັບຜົລກະທົບຈາກພັຍແຫ້ງແລ້ງ ໃນພາກຕາເວັນຕົກສ່ຽງໃຕ້ ຂອງຈີນ ເຊັ່ນຍຸນນ່ານ ເສວົນ ແລະ ກຸ້ຍໂຈວກໍໄດ້ຮັບຜົລກະທົບ ເຊັ່ນກັນ. ທ່ານ ເຈີ້ນກ່າວຣະບຸ ຕື່ມວ່າສອງຝັ່ງແມ່ນໍ້າຂອງສ່ວນໃຫຍ່ ເປັນເທືອບເຂົາ ແລະ ເຫວ ດັ່ງນັ້ນການໃຊ້ນໍ້າສ່ວນໃຫຍ່ກໍເພື່ອການຜລິດໄຟຟ້າ ເປັນຫລັກ ແຕ່ສໍາລັບ ການກະເສດນັ້ນມີໜ້ອຍເຕັມທີ່ ເຮັດໃຫ້ການໃຊ້ນໍ້າບໍ່ຫລາຍແລະ ກໍຢືນຢັນວ່າພັຍແຫ້ງແລ້ງ ໃນແມ່ນໍ້າຂອງນັ້ນບໍ່ໄດ້ເກີດຈາກ ກິຈຈະກັມ ຂອງຈີນ ເປັນສໍາຄັນ. ສ່ວນການເຂົ້າຮ່ວມກອງປະຊຸມສຸດຍອດຄະນະກັມມາທິການ ແມ່ນໍ້າຂອງ MRC ໃນຕົ້ນເດືອນໜ້າທີ່ປະເທດໄທນັ້ນທ່ານເຈີ້ນບອກວ່າຣັຖບານຈີນ ໄດ້ແຕ່ງຕັ້ງຄະນະທີມງານທີ່ຈະເຂົ້າຮ່ວມປະຊຸມແລ້ວ ແລະ ໄດ້ຮັບຄໍາເຊີນຈາກຄະນະMRC ແລ້ວ ແຕ່ຍັງບໍ່ໄດ້ຮັບ ເອກກະສານ ເຊີນຢ່າງເປັນທາງການຈາກນາຍົກຣັຖມົນຕຣີໄທອະພິສິດ ເວດຊາຊີວະ ເທື່ອ.