ການຄ້າຈີນຂຍາຍຕົວ ການຄ້າທ້ອງຖິ່ນຖືກບີບ

ທຸຣະກິດ ການຄ້າ ຂອງຈີນ ໃນລາວ ເພີ້ມຂື້ນ ຢ່າງຫລວງຫລາຍ ໃນຣະຍະ ຜ່ານມານີ້ ຈົນເກີດມີ ຊຸມຊົນ ຊາວຈີນ ແພ່ຂຍາຍ ໃຫຍ່ຂື້ນໃນ ນະຄອນຫລວງ ວຽງຈັນ ເຊັ່ນທີ່ ຕລາດຊັງຈຽງ ຫລື ທີ່ເອີ້ນກັນວ່າ ຕລາດ ຈີນ. ການທີ່ ທຸຣະກິດ ຂອງຈີນ ເພີ້ມຂື້ນ ໃນລາວ ໄດ້ສ້າງຄວາມ ບໍ່ພໍໃຈ ໃຫ້ແກ່ ພໍ່ຄ້າແມ່ຄ້າ ຊາວລາວ ໃນທ້ອງຖີ່ນ ຢ່າງໜັກ ເພາະ ຈີນ ເອົາປຽບ ຄົນລາວ ຈົນເກີດຄວາມ ຂັດແຍ່ງກັນ ໃນຫຼາຍ ກໍຣະນີ. ດັ່ງເຈົ້າຫນ້າທີ່ ລາວເວົ້າວ່າ:

"ທຸກມື້ນີ້ ບໍ່ແມ່ນຝຣັ່ງ ມີແຕ່ຈີນ ຫລັກໆ ທີ່ມາລົງທືນ ໃນລາວ ຫລາຍ ມີຫລາຍ ກໍຣະນີ ທີ່ບໍຣິສັດ ເຂົ້າມາແລ້ວ ນັກຜລິດ ທ້ອງຖີ່ນ ໃນລາວ ບໍ່ສາມາດ ສູ້ໄດ້".

ນາງກ່າວເພີ້ມ ອີກວ່າ ຜ່ານມາ ທຸຣະກິດ ຊາວຈີນ ໃນນະຄອນຫລວງ ວຽງຈັນ ຕັ້ງຢູ່ໃກ້ໆ ສູນການຄ້າ ມິຕພາບ ຫົງຍຸ້ຍ ລາວ-ຈີນ ຖນົນ ຫນອງດ້ວງ ບ້ານ ຂົວຫລວງ ເມື່ອຂຍາຍໂຕ ເພີ້ມຂື້ນ ຣັຖບານ ຈື່ງໄດ້ ອະນຸມັດ ພື້ນທີ່ໃຫ້ ສ້າງເປັນຕລາດ ຊັງຈຽງ ທາງສີໄຄ ແລະ ຕລາດຫົງຍຸ້ຍ ກໍກາຍເປັນ ຕລາດຈີນເກົ່າ. ການເຂົ້າມາ ຂອງຄົນຈີນ ເຮັດໃຫ້ ຄົນລາວ ດັ້ງເດີມ ຕ້ອງໄດ້ ຍ້າຍອອກຈາກ ພື້ນທີ່. ແມ່ຄ້າ ຄົນນື່ງ ເວົ້າວ່າ:

"ດຽວນີ້ ໂຄງການ ມັນມີແຕ່ ໂຄງການຂອງ ພວກຈີນ  ເປັນຫຍັງ ຂະເຈົ້າມາຕັ້ງ ຫຍັງ ເຮັດອັນຫຍັງ ຕາມບໍຣິສັດ ໃຫຍ່ໆ ມັນມີແຕ່ ຄົນຈີນ ບາງເທື່ອ ຄົນຈີນ ເຂົ້າມາມີ ຫຸ້ນສ່ວນນຳ ຫລອກລວງ ແບບຄົນຈີນ ແລະ ຄົນວຽດນາມ ບາງຄົນກໍ ສົກກະປົກ".

ນາງວ່າ ຄົນຈີນ ກັບຄົນລາວ ຈະຢູ່ຮ່ວມກັນ ໄດ້ແບບສັນຕິ ຖ້າຄົນຈີນ ບໍ່ເອົາປຽບ ຄົນລາວ ຫລາຍເກີນໄປ ຫລືວ່າ ຖ້າ ຣັຖບານລາວ ບໍ່ອະນຸຍາດ ໃຫ້ຄົນຈີນ ເຂົ້າມາລາວ ຫລາຍກວ່ານີ້ ບັນຫາ ຄວາມຂັດແຍ່ງ ກໍຈະບໍ່ ເກີດຂື້ນ.