ກຸ່ມຄ້າຢາຣາຍໃຫຽ່ ບໍ່ເຄີຍຖືກຈັບ

ຊາວລາວ ສ່ວນໃຫຍ່ ຍັງບໍ່ເຊື່ອວ່າ ຢາເສພຕິດ ໃນລາວ ຈະຫລຸດລົງໄດ້ ຕາມທີ່ທາງການ ປະກາດອອກມາ ແຕ່ເຊື່ອວ່າ ການຈັບກຸມ ນັກຄ້າຢາເສພຕິດ ສ່ວນໃຫຍ່ ໃນລາວນັ້ນແມ່ນ ພວກຂາຍຍ່ອຍ ຫລາຍກວ່າ ພວກຄ້າຣາຍໃຫຍ່ ນັ້ນບໍ່ເຄີຍຈັບໄດ້ ຈື່ງເຮັດໃຫ້ ຂະເຈົ້າຄິດວ່າ ອາດຈະມີການ ສົມຮູ້ຮ່ວມຄິດ ກັບ ເຈົ້າຫນ້າທີ່ ແຕ່ກໍບໍ່ມີ ຫລັກຖານ ມາອ້າງອິງ. ດັ່ງຄົນລາວ ຜູ້ນື່ງເວົ້າວ່າ:

"ຕາມເຮົາເປັນ ປະຊາຊົນ ເຮົາເບີ່ງນີ້ ມັນກໍແກ້ໄຂຍາກ ທີ່ຜ່ານມາເຮົາ ບໍ່ຄ່ອຍຈັບ ໄດ້ລາຍໃຫຍ່ ຈັກເທື່ອ ໄດ້ແຕ່ນ້ອຍໆ ຂາຍເປັນ 200-300 ເມັດ ແຕ່ວ່າ ພວກ ໃຫຍ່ໆແທ້ໆ ມັນເປັນຫຍັງ ຈັບບໍ່ໄດ້ຈັກເທື່ອ ປະຊາຊົນ ເຂົາກໍຕັ້ງ ຄຳຖາມຢູ່ ແຕ່ວ່າ ມັນກໍບໍ່ສູ້ ວ່າຈະ ພິສູດໄດ້ ເພາະວ່າ ປະຊາຊົນ ເຂົາກໍຂັດຂ້ອງຢູ່ ແຕ່ວ່າເຂົາ ກໍພິສູດ ບໍ່ໄດ້ວ່າ ເປັນຫຍັງ ພວກມືໃຫຍ່ ເຮົາຈັບເຂົາບໍ່ໄດ້ ຈັກເທື່ອ".

ທ່ານກ່າວ ຕໍ່ໄປວ່າ ຢາເສພຕິດ ຢູ່ລາວ ບໍ່ມີທາງ ຈະຫມົດລົງໄດ້ ເນື່ອງຈາກວ່າ ຫລັງຈາກລາວ ກາຍເປັນ ທາງຜ່ານທາງບົກ ການລັກລອບ ຂົນສົ່ງ ຢາເສພຕິດ ຜ່ານລາວ ກໍຈະເພີ້ມຂື້ນ ຮ່ວມດ້ວຍ ຄວາມທຸກຍາກ ໃນລາວ ທັງສອງຢ່າງນີ້ ຈະດືງດູດ ໃຫ້ຄົນລາວ ຈຳນວນນື່ງ ຫັນມາປູກ ຜລິດ ແລະ ສົ່ງຢາເສພຕິດ ຫລາຍຂື້ນ ເພື່ອຫາຣາຍໄດ້ ໃຫ້ຄອບຄົວ. ການປາບປາມ ຂອງເຈົ້າຫນ້າທີ່ ລາວກໍບໍ່ເຂັ້ມແຂງ ປານໃດ ດັ່ງປະຊາຊົນ ແຂວງ ສວັນນະເຂດ ອີກຜູ້ນື່ງ ເວົ້າວ່າ:

"ຄັນຕາມເບີ່ງ ຢູ່ແຂວງ ສວັນນະເຂດ ມັນກໍບໍ່ຄ່ອຍ ເຂັ້ມແຂງ ປານໃດ ເຣື້ອງການປາບປາມ ເຮົາກໍເຫັນຕາມ ຊອກຊອຍ ເດັກເລັກເດັກນ້ອຍ ມັນກໍມີ ຂາຍກັນຢູ່ ຄັນເອົາເຂົ້າໄປຂັງ ຢູ່ໃນຫ້ອງຂັງ ກໍຍັງ ຕິດຢາເສພຕິດ ຄືເກົ່າ ມັນເປັນໄດ້ຢ່າງໃດ ມັນມີຢາເສພຕິດ ໄດ້ຢ່າງໃດ ຂນາດຢູ່ໃນ ຫ້ອງຂັງແລ້່ວ".

ບັນຫາ ຢາເສພຕິດ ໃນລາວ ບໍ່ເຄີຍຫລຸດລົງ ເຖີງແມ່ນວ່າ ເຈົ້າຫນ້າທີ່ ຣະດັບສູງ ຂອງລາວ ໄດ້ໃຫ້ຄຳປາສັຍ ໃນກອງປະຊຸມ ສະພາຄັ້ງທີ 9 ວ່າ ຣັຖບານລາວ ເອົາຈິງເອົາຈັງ ກ່ຽວກັບ ການແກ້ໄຂ ບັນຫາ ຢາເສພຕິດ ປະເພດຕ່າງໆ ກໍຕາມ ແຕ່ສະພາບ ໂຕຈິງແລ້ວ ຢາເສພຕິດ ຍັງແຜ່ລາມ ຫລາຍຢູ່ໃນລາວ ໃນທຸກມື້ນີ້.