Shinjang uniwérsitétida Uyghur tili ishlitilmeydu

Bu yil 9-ayda Uyghur élidiki eng ali bilim yurti hésablan'ghan shinjang uniwérsitétining qurulghanliqining 80 yilliqi nahayiti daghdughiliq halda tebriklendi.

• Muxbirimiz ümidwarning bu heqtiki programmisini anglang
• Download story audio

Xewerlerge qarighanda bu qétimqi xatirilesh pa'aliyitide Uyghur aptonom rayonining asasiy xizmet tili dep étirap qilin'ghan Uyghur tili ishlitilmigen. Pütün pa'aliyetler toluq xitay tilida élip bérilghan iken. Shinjang uniwérsitétining intérnét sehipiside bu qétimqi xatirilesh pa'aliyitining omumi ehwalining sin alghu plastinkisi qoyulghan bolup, mezkur pilastinkidin melum bolushiche xatirilesh pa'aliyiti qoyuq xitay tili we xitay medeniyiti tüsi alghan . Uyghurlar we Uyghur ali mektep oqutquchi -oqughuchilirining hayatini eks ettüridighan héchqandaq programmilar teyyarlan'ghanmighan. Peqet özbék naxshichisi shamil shakir, Uyghur naxshichisi izzet we bashqa birqancheylenning xitay tilida éytqan naxshiliridin bashqa barliq sen'et nomurliri xitay oqutquchi-oqughuchilar teripidin körsitilgen.

Shinjang uniwérsitétida Uyghur tilida oqutush ishliri emeldin qaldurulghandin kéyin, Uyghurlarning naraziliq keypiyatliri ewji alghan bolup, elwette ,héchkimmu öz naraziliqini ashkara bildürelmeydu. Emma, amérikida yashawatqan shinjang uniwérsitétining sabiq oqutquchiliridin qahar barat, tughluq abdurazzaq we shöhret seydexmet qatarliqlar 60 yillardin buyan Uyghur tilida ders ötüsh en'enisi tiklen'gen bu ali bilim yurtida Uyghur tilining ishlitilishtin toxtap qélishining Uyghur medeniy-ma'aripi üchün zor yoqitish ikenlikini ilgiri sürdi.