Uyghur balilirining mektepke kirish nisbitining örlishi bilen Uyghur ma'arip süpitining munasiwiti
2004.11.01
Yéqinda Uyghur élidin tarqitilidighan tengritagh tor bétide, Uyghur élidiki oqush yéshidiki az sanliq millet balilirining mektepke kirish nisbitining٪ 97.3 Ke yetkenliki xewer qilin'ghan idi.
Xewerde xitay merkizi hökümitining Uyghur élining chet, chégra, namrat yéziliridiki namrat déhqan balilirining oqiyalmasliq mesilisini hel qilish üchün mexsus meblegh ajratqanliqi, nöwette yézidiki balilarning oqushqa kirish nisbitining ٪ 99.5 Tinmu ashqanliqi we buning ichide Uyghur qatarliq az sanliq millet balilirining oqushqa kirish nisbitining ٪ 97.3 Ke yetkenliki körsitilgen.
Mejburi ma'arip siyasitidiki sanliq özgürüshler
Emma radi'omizgha bu heqte Uyghur élide bolupmu Uyghur élining jenubidiki namrat yézilarda Uyghur déhqan balilirining namratliq tüpeyli yenila oqushsiz qéliwatqanliqi heqqide inkaslar kelgen idi. Shu sewebtin biz oqush yéshidiki az sanliq millet balilirining mektepke kirish nisbitining emiliy ehwalini, yerlik orunlardin igilesh üchün, Uyghur yéziliridiki ma'arip we mektep orunlirini télifon arqiliq ziyaret qilduq.
Qeshqerning melum yéziliq ma'arip idarisining bir mes'uli we xotenning melum yézisidiki bir Uyghur oqutquchi bilen Uyghur élidiki mektepke kirish nisbiti we bu jehetlerde mewjut bolup turiwatqan mesililer heqqide so'allirimizgha jawab berdi.