Bélgiyidimu Uyghur chémpiyoni bar


2005.05.23
Share on WhatsApp
Share on WhatsApp

Uyghur xelqi özlirining köpligen meshhur siyasiyonliri, alimliri, medeniyet we jama'et erbaplirigha ige bolupla qalmastin belki, yene dunyawi rékortlarni yaratqan ataqliq tenheriketchiliri we chémpiyonlirighimu ige.

Pexirlik tenheriketchilirimiz

Darwazliq Uyghur en-eniwi tenheriket türi bolush süpiti bilen bügünki künde Uyghurlar arisidin yétiship chiqqan adil hoshur, esqer qatarliq yash darwazlar dunya génus rékorti yaritish bilen dunya yüzidiki yigane shexslerge aylinip, Uyghur darwazchiliqini dunyagha tonushturdi.

Qumluq melikisi dep nam alghan gül zöhre teklimakanni yügürep késip ötüshtek dunyawi tengdashsiz netije yaratsa, Uyghur qizi nurgül sawut xitayning chingdaw shehiride ötküzülgen xelqaraliq marafonche yügresh musabiqiside chémpiyon bolush bilen Uyghur qizlirining qehrimanliq en'enisini jari qildurdi.

Uyghur xelqi arisidin yene tenheriketning hemme türliri boyiche dégüdek ataqliq mahirlar yétiship chiqqan bolup, 60- yillarda pütün xitayni zilzilige salghan walibol mahirliridin zöhre we malik, 90-yillardin étibaren meshhur bolup tonulghan waskitbol mahiri we tirinéri adiljan hem chélish mahirliri abliz toqsun, haji shuningdek bashqa yene uzun'gha yügresh, at beygisi, su üzüsh qatarliq türlük sahelerdiki chémpiyonlarni misal qilish mumkin.

Boks Uyghurlar eng yaxshi körgen tenheriket türlirining biri bolup, yéqinqi yillardin buyan bu sahede Uyghur mahirliri pütün xitay boyiche we bezi xelqaraliq musabiqilerde mutleq ghalip kélish bilen Uyghur milliy rohini yene bir qétim namayen qildi. Ene shularning ichide alahide orun'gha igiliridin biri, xitayning boks shahi dep nam alghan abdushükürdur.

Uyghur yigitliridin abdushükür, abduraxman we ekrem qatarliqlarning her qétimliq keskin élishish meydanlirida öz reqiplirini mushtlap yiqitishliri, reqiplirige atqan her bir mushtigha ularning qehriman ejdadliridin miras qalghan milliy rohi yeni mertlik ,baturluq udumi singgenliki körünüp turidu.

Uyghur xelqining mutleq köpchilik öz ana wetinide yashighandin sirt yene éniqsiz melumatlar boyiche nahayiti zor sandiki Uyghurlar ottura asiya jumhuriyetliride yashaydu.

Bularning arisidinmu köpligen dunya chémpiyonliri yétiship chiqqan. Mesilen, chambashchiliq mahiri héytaxunop, amérikida ötküzülgen chambashchiliq musabiqiside özi bilen hel qilghuch musabiqighe chüshken xitay chambashchisini yéngip, dunya chémpiyoni bolghan. Zakir toxtiyéw , exmetjan qatarliqlarmu bir qanche qétim taylandche boks boyiche dunya chémpiyoni atalghan idi.

Uyghurlar xitaylardin burun olimpikta chémpiyon bolghan

70-80-Yillarda bolsa abduraxman isimlik Uyghur uzun mezgil sabiq sowét ittipaqining boks chémpiyoni bolup, köp qétim dunya musabisige qatnashqan hem yawropa chémpiyoni bolghan.

Alahide tilgha élishqa tégishlik kishi 50-yillarda dunya olimpik chémpiyoni bolghan maxmut ömerop bolup, u qarigha étish türi boyiche chémpiyon bolghan idi.

Qazaqistanliq maxmut ömerop Uyghur milliti ichidin birinchi qétim olimpikke qatnashqan hemde altun médal alghan shexs bolush süpiti bilen Uyghur tenheriket tarixidin orun aldi. Tenheriket ishliri mutexessislirining éytishiche, Uyghur yigiti maxmut ömerop olimpik chémpiyoni bolghan chaghlarda téxi xitaylardin olimpik chémpiyoni yétiship chiqmighan iken.

Bélgiyidimu Uyghur chémpiyoni bar

Yéqinqi yillardin buyan bir q isim Uyghurlar yawropa döletliri we shimaliy amérikigha kélip makanlashmaqta. Ularning zor bir qisimi qazaqistan, qirghizistan we özbékistan qatarliq memliketlerdin kelgen. Yawropadiki bélgiye Uyghurlar xéli köp makanlashqan jaylarning biri bolup, bélgiyidiki Uyghur jama'etchiliki medeniyet-sen'et pa'aliyetlirini rawajlandurushtin bashqa yene tenheriket ishlirighimu étibar bermekte.

Bélgiye Uyghurliri teripidin chiqirilidighan "ümid" intérnét toridiki uchurlardin melum bolushiche, yéqinda 17 yashliq Uyghur yigiti rosul ziyawidinop, yashlarning boks musabiqiside pütün bélgiye chémpiyoni bolup atalghan iken.

Qazaqistandin bélgiyige kélip chong bolghan rosul boksqa alahide ishtiyaq baghlap, meshiq élip barghan, uning talantini sezgen bélgiyining meshhur boks chémpiyoni we trinéri jékson oséy bonusning yétekchilikide meshiq élip barghan. 17 Yashliq bu yash yigitining chémpiyon bolghanliqi heqqidiki xewerler hemde u we Uyghurlar heqqidiki uchurlar bélgiye metbu'atliridin orun alghan.

Tenheriket ademning salametliki üchün paydiliq bolupla qalmastin belki, xelqara musabiqilerde altun médallargha érishish bir milletning dunyawi shöhriti we qudritini ashurushta wasitichilik rol oynaydu. (Ümidwar)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.