Gérmaniyining frankfurt shehiride mehmut qeshqiri yili we noruz bayrimi tebriklendi


2008-03-25
Share

Girmaniye-Noruz-200.jpg
Frankforttiki noruz pa'aliyitide nomur orundawatqan Uyghur ösmüri. http://karakuyash.blogspot.com/

Uyghurlarda noruz 21 - mart dunyaning her qaysi jaylirida her xil shekilde tebriklen'gen bolsimu, emma gérmaniyining frankfurt shehiride 22 - mart élip bérilghan noruz tebriklesh pa'aliyiti, yekke halda noruz bayriminila tebriklesh bolup qalmastin, belki bu alahide kün Uyghurlarning büyük alimi mexmut qeshqirining birleshken döletler teshkilati ma'arip, pen - téxnika we medeniyet jem'iyiti teripidin 2008 - yilida dunyawi xatirilinidighan shexs qilip belgilen'genlikini tebriklesh bilen özgiche mezmun'gha we alahidilikke ige qilin'ghan.

Küresh ataxan :" birer Uyghur teshkilati mexmut qeshqiri üchün alahide tebriklesh murasimi élip barmidi"

Mezkur pa'aliyet gérmaniyining frankfurt shehirige jaylashqan sherqiy türkistan birliki teshkilati teripidin orunlashturulghan bolup, pa'aliyetke Uyghurlarni asas qilghan bir qisim turk we gérmanlarni öz ichige alghan 100 ge yéqin adem qatnashqan.

Sherqi türkistan birlik teshkilatining re'isi küresh ataxan mexmut qeshqirining birleshken döletler teshkilati teripidin 2008 - yilida xatirilinidighan shexs qilip belgilen'genliki Uyghurlar hemde türk dunyasi üchün intayin ehmiyetlik muhim weqe hésablinidighanliqini hemde bu weqening Uyghur ili ichi ‏ - sirtida her xil shekilde tebriklinishi lazimliqini, emma hazirgha kelgiche birer Uyghur teshkilatining bu xeyrlik ish üchün alahide tebriklesh murasimi élip barmighanliqini, shunga bu nöwetlik noruz bayrimini tebriklesh pa'aliyitini mexmut qeshqiri üchün béghishlighanliqini bildürdi.

Tebriklesh pa'aliyiti yene, anilargha we balilargha béghishlan'ghan

Küresh ataxan yene, bu nöwetlik noruz tebriklesh pa'aliyiti yene anilargha we milletning kelgüsi bolghan balilargha béghishlan'ghan bolup, Uyghur siyasiy küreshlirini téximu ghelibilik dawamlashturush üchün, Uyghurlarning alim - hökümalirigha hörmet bildürüsh, milliy medeniyet örneklirini eslep ötüsh, Uyghurche ta'am, Uyghurche örp - adetni mushundaq sorunlarnimu qoldin bermey namayan qilip ewladlargha en'ene terbiyisi, milliy kimlik terbiyisi élip bérish meqset qilghanliqini bildürdi.

"Mexmut qeshqiri dégen bu nam Uyghur tarixi qatarliq nurghun sahelerge bérip taqilidu"

Küresh ataxan yene, mexmut qeshqerning Uyghur tarixi we medeniyitidiki orni heqqide toxtilip: "mexmut qeshqiri dégen bu nam Uyghur tarixi, edebiyati dölet bashqurush we tilshunasliq qatarliq nurghun sahelerge bérip taqilidu" dédi.

Mezkur pa'aliyet dawamida pa'aliyet qatnashquchilirigha Uyghur tarixi, medeniyiti meshhur shexsliri we hazirqi siyasiy ehwali heqqide doklat bérilgen hemde mushu asasta so'al teyyarlinip balilar arisida zéhin sinash élip bérilghan.

Axirida zéhin sinashqa qatnashqan balilarning hemmisige her xil shekildiki xatire buyumliri mukapat qilip tarqitip bérilgen bolup, küresh ataxanning bildürüshiche, mukapat buyumlirini shiwitisiyidin gérmaniyige mexsus ushbu murasim üchün kelgen Uyghur ziyaliysi haji abduréshit kérimi ependi tarqitip bergen.

Noruz bayrimini tebriklesh murasimining béshida sherqiy türkistan birliki teshkilatining re'isi küresh ataxan, dunya Uyghur qurultiyining re'isi Uyghur milliy herikitining rehbiri rabiye qadir xanimning mezkur pa'aliyet üchün yollighan tebrik télégrammisini oqup ötüp pa'aliyet ishtirakchilirini hayajan'gha salghan. (Jüme)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet