Üchey rakigha giriptar bolghan ana aq qan késili bilen aghrighan oghli abduwelini qutquzuwélishni muraji'et qildi

Tengritagh tor bétide "abduwelige yardem qolimizni sunayli" namliq muraji'etname élan qilin'ghandin kéyin, aq qan késilige giriptar bolghan 8 yashliq abduweli we uning a'ilisining paji'elik qismiti, xewerni anglighan Uyghurlarning xeyrixahliqini qozghighan.
Muxbirimiz mihriban
2010-03-31
Share
Aq-qan-késili-bilen-aghrighan-osmur-abduweli-305.jpg Süret, aq qan késilige giriptar bolghan 8 yashliq abduwelining balilargha xas omaq külkisi gewdilengen doxturxanidiki süriti.
www.xjtsnews.com Din élindi.

Bügün üchey rakigha giriptar bolghan bolsimu, oghlini qutquzush üchün dawalinishni ret qilghan rozinisaxan xanim we uning uruq - tughqanliri, radi'omiz Uyghur bölümining ziyaritini qobul qilip, dunyaning her qaysi jayliridiki Uyghur qérindashliridin nareside abduwelining késilini dawalashqa saxawet qolini sunushni muraji'et qildi.

Tengritagh tor bétide élan qilin'ghan aq qan késilige giriptar bolghan 8 yashliq abduwelige a'it xewerdiki Chachliri chüshürüwétilip, ximiyilik dawalashni qobul qiliwatqan abduwelining, balilargha xas sebi omaq külkisi bilen, tikilip turghan resimini körgen kishiler bu a'ilining béshigha shu qeder éghir külpetlerning kelginini tesewwur qilalmisa kérek.

Tengritagh tor bétining muxbiri nijat niyaz teripidin yézilghan bu xewerde déyilishiche, hazir Uyghur aptonom rayonluq xelq doxturxanisi uniwérsal balnist bölümi yettinchi qewet balilar bölümi 37 - kariwitida, aq qan késilige giriptar bolghini üchün, ximiyilik dawalinishni qobul qiliwatqan 8 yashliq abduwelining dadisi 2008 - yili yürek késili bilen qaza qilghan, anisi ruzinisa xanimmu 2008 - yili 11 - ayda tüz üchey rakigha giriptar bolup, üchiyi opératsiye qilin'ghan. Iqtisadi nachar bolghan rozinisaxan uruq ‏ - tughqanlirining yardimide késilini dawalitiwatqan mezgilde, 2010 - yili 1 - ayda oghli abduwelining qan rakigha giriptar bolghanliqini bilgen. Éghir késel azabini tartiwatqan rozinisaxan oghli abduwelini qutquzush üchün öz késilini dawalitishtin waz kéchip, oghlini qutquzushqa iqtisad toplash üchün yurtigha ketken.

Biz tor bétide qaldurulghan adrés we téléfon nomurliri boyiche, abduweli dawaliniwatqan késelxana hem ruzinisa xanimning xotendiki a'ilisige téléfon qilish arqiliq, abduwelining késilini dawalitish üchün doxturxanida jiyenige qarawatqan, ruzinisa xanimning inisi toxti yüsüp, késelxanidiki bimarlar, xotende oghli üchün pul toplawatqan rozinisaxan hem uning singlisi qatarliqlar bilen söhbetlishish pursitige ige bolduq.

Abduweli dawaliniwatqan balnistning téléfonini urghinimizda, téléfonimizni del abduwelige qarawatqan toxti yüsüp özi aldi. Toxti yüsüp muxbirning téléfonni amérikidin erkin asiya radi'o istansisidin uruwatqanliqini bilginidin kéyin, ziyaritimizni qobul qilidighanliqini bildürüp, nöwette özlirining achisi hem uning oghli abduwelining késilini dawalitish üchün uruq ‏ - tughqanlarning yardimide pütün iqtisadini toplap doxturxanigha kelgenlikini sözlep berdi.

Toxti yüsüp, abduwelining késilini dawalitish üchün her qétimliq ximiyilik dawalashqa 5000 yüendin hésablighanda, texminen 200 mingdin 300 ming yüen'giche xelq puli kétidighanliqini, hazir jem'iyettin i'ane qilin'ghan pulning 10 ming yüen xelq puligha yetkenlikini bayan qildi.

Ziyaritimizni qobul qilghan ruzinisa xanim özining 26 yashqa kirgenlikini, bu ikki yil ilgiri emdila 28 yashqa kirgen érining yürek klapani kéngiyip ketkenlik sewebidin, dawalash ünüm bermey ölüp ketkinini, arqidin özining tüz üchey rakigha giriptar bolup, tughqanlirining yardimide késel dawalitiwatqan mezgilde, oghlining bu késelge giriptar bolghinini bilginidin kéyin, hazir özining pul toplash uchun yurtigha kelgenlikini, hazirghiche 3600 yüen xelq puli yighilghanliqini bayan qildi.

Oghlini qutquzush üchün öz késilini dawalitishtin waz kechkenlikini bildürgen ruzinisa xanim, özining éri ölüp ketkendin kéyin, ikki oghli bilen hayatliq üchün tirmishiwatqanliqini, hazir özining peqet ashu nareside oghli abduwelini qutquzuwélish arzusiningla barliqini, shunga yaxshi niyetlik kishilerning yardem qulini sunushini ümid qilidighanliqini muraji'et qildi.

Ruzinisa xanimning singlisi ziyaritimizni qobul qilghinida, achisining we uning oghlining késilini dawalitish üchün bu a'ilining barliq iqtisadiy qudritidin ayrilghanliqini, nöwette peqet jem'iyettin kéliwatqan i'anigila tayinip qéliwatqanliqini bildürdi.

Ruzinisa xanimning singlisining bildürüshiche, hazir ulargha yardem qolini sun'ghuchilar yenila ashu awam Uyghur qérindashlar ikenlikini, nöwette özlirining nahiye tewesidiki munasiwetlik hökümet idarilirigha, achisi we uning oghlini qutquzuwélishqa iqtisadiy yardem telep qilip, xet yazghan bolsimu, lékin méyiplar idarisi qatarliq jaylardin peqet turmush mesilisini hel qilishqa yardem bergenlikini, bashqa jaylardin hélighiche xewer kelmigenlikini bayan qildi. Muxbir uningdin aptonom rayon derijilik idarilerdin yardem sorap xet yazghan yaki yazmighanliqini sorighinida, u hazirche téxi ulardin yardem sorap xet yazmighanliqini bildürdi.

Qedirlik oqurmen dostlar, töwendikisi abduwelining anisi ruzinisa xanimning adrési, munasiwetlik téléfon nomuri hem banka hésabat nomuri, yardem qilghuchilarning abduwelining tughqanliri bilen biwasite alaqilishishini ümid qilimiz.
 
Abduweli yatqan balnistning téléfon nomuri: 011 - 86 - 991 - 8521894
Abduweli yatqan balnistning adrési: ürümchi Uyghur aptonom rayonluq xelq doxturxanisi uniwérsal balnist bölümi 7 - qewet balilar bölümi 37 - kariwat ( toxti yüsüp arqiliq alaqilishing).

Abduwelining anisi ruzinisa xanimning xotendiki öyining téléfon nomuri : 011 - 86 - 903 - 2960702
Abduwelining anisi ruzinisa xanimning xotendiki öyining adrési: xoten nahiye séghizköl yéza miyangxoja kent toxti seypung a'ilisi.

Tengritagh Uyghur torining abduwelige wakaliten tesis qilghan pochta amanet bankisining karta nomuri: 6210988810000034808

Yuqiridiki awaz ulinishidin, bu heqtiki melumatimizning tepsilatini anglaysiler.
 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet