Dunya Uyghur qurultiyi gu'angju qamaqxanisidiki 10 Uyghur oqughuchi heqqide amérika we b d t gha melumat yollidi

Gu'angju 75 ‏-ottura mekteptiki 10 Uyghur oqughuchining térrorluq gumani bilen tutqun qilin'ghanliqi we nöwette gu'angju 1 ‏-qamaqxanisida ikenliki tasadipiy axbaratqa ashkarilinip qalghandin kéyin, dunya Uyghur qurultiyi bu 10 Uyghur ösmürning teqdiri heqqide jiddiy heriketke ötti.

Qurultay bayanatchisi dilshat rishit aldinqi küni muxbirlargha bayanat bérip, 10 Uyghur oqughuchining mexpiy tutqun qilin'ghanliqini dunyagha ashkarilighan idi.

Tünügün qurultay re'isi rabiye qadir xanim amérika hökümiti we b d t gha mektup yollap bu 10 Uyghur oqughuchining teqdirige jiddiy köngül bölüshke dewet qilghan.

Melum bolushiche mektupta, balilarning aliy mektep imtihan mezgilide tutqun qilinishi, tutulghanliqining a'ilisi we Uyghur jem'iyitidin sir tutulushi, uning üstige gu'angjudiki bir qamaqxanida tutup turulushi qatarliq pakitlarning bu 10 oqughuchining nöwettiki ehwali we kélechiki heqqide qurultay rehberliride chong endishe peyda qilghanliqi bildürülgen we bu heqte tekshürüsh, éniqlash élip bérish telep qilin'ghan.

Mektupta yene, Uyghurlardin ene shundaq mexpiy tutulghanlarning yéqinqi yillardin béri ghayib yeni iz-déreksiz ikenliki eskertilgen.