Америка президенти җов байден “төт дөләт иттипақи” қурушни музакирә қилидикән

“франсийә агентлиқи” ниң 10-март хәвәр қилишичә, америка президенти җов байден 12-март күни тунҗи қетим австралийә, һиндистан вә японийә рәһбәрлири билән интернет арқилиқ көрүшүп, хитайға қарши “төт дөләт иттипақи” қурушни музакирә қилидикән. Бу җо байденниң тунҗи қетим дөләт башлиқлири йиғини өткүзүши һесаблинидикән.

Ақсарай ахбарат ишлири катипиниң билдүрүшичә, президент байденниң бу йиғинни өткүзүши американиң һинди-тинч окян райони һәмкарлиқини күчәйтишкә наһайити көңүл бөлидиғанлиқини чүшәндүридикән.

Мәзкур “төт дөләт сөһбити” америка билән хитайниң сода вә дөләт бихәтәрлики мунасивити җиддийлишип бериватқан вақитқа тоғра кәлгән.

Австралийә баш министири скот моррисон бу “төт дөләт иттипақи” ниң һинди-тинч окян районида хитайдин мустәқил болған бир сода вә бихәтәрлик бәлбеғи шәкилләндүридиғанлиқини билдүргән. Һиндистан билән японийә тәрәпму “төт дөләт иттипақи” ниң әркин вә ечиветилгән сода муһити бәрпа қилидиғанлиқини билдүргән.

Хәвәрдә ейтилишичә, хитай һөкүмити өзиниң арқа һойлисида шәкиллиниш алдида турған бу хәлқара иттипақтин биарам болуп, “төт дөләт чоқум тинчлиқ вә тәрәққият, ортақ һәмкарлиқ вә ортақ мәнпәәтлиниш йөнилишигә қарап меңиши керәк” дәп агаһландуруш бәргән.