"төт дөләт иттипақи" хитайни барғансери биарам қилмақта

Мухбиримиз әзиз
2021-09-21
Share

2017-Йилиниң ахири японийәниң шу чағдики баш вәзири шензо абениң тәклипи билән қурулған "төт дөләт иттипақи" америка, һиндистан, австралийә вә японийә һөкүмәтлириниң асия районидики һәмкарлиқини барғансери юқири пәллигә елип чиқишқа башлиғаниди. Хитай ташқи ишлар министири ваң йи әйни вақитта "бу бир очум кишиләрниң тәсәввурдики идийәииси. Бу идийә худди тинч окян яки һинди окянниң көпүклиридәк қандақ пәйда болған болса шундақ тез ғайиб болиду" дегәниди. Нөвәттә хитай һөкүмитиниң бу иттипақтин барғансери еғир вәһимигә чүшүватқанлиқи ашкара болмақта икән. Кевин руд имзасида "ташқи ишлар" журнилиға бесилған бу һәқтики мулаһизә мақалисидә бу әһвал тәпсилий муһакимә қилиниду.

Апторниң қаришичә, "төт дөләт иттипақи" ниң бирдәк "хитай биз үчүн истратегийәлик рәқиб" дегән ортақ тонушқа келишигә әгишип, улар оттурисидики һәмкарлиқ барғансери көпәймәктә икән. 2020-Йили хитай билән һиндистан оттурисидики чегра тоқунишидин кейин бу иттипақниң ички қисмидики һәмкарлиқ техиму күчәйгән. Әнә шу вақиттин башлап хитай һөкүмити түрлүк иқтисадий "пайда-мәнпәәт" вә "әдәбләш" ләр арқилиқ уларниң арисиға соғуқчилиқ селиш һәмдә шу арқилиқ уларни парчиливетишкә урунуп баққан болсиму, бу һал әксичә уларниң иттипақини техиму күчәйтивәткән. Нөвәттә хитай һөкүмити уларни парчилаштин үмид үзүп, бу иттипаққа қарши "сиясий һуҗум" ни башлиған.

Йеқинқи мәзгилләрдә хитайниң җәнубий хитай деңизидики земин даваси зомигәрлики вә тәйвән боғузидики иғвагәрчилик һәрикити түпәйлидин японийә дөләт мудапиә министири нобу киши очуқ қилип "хитайниң бу районлардики һәрбий кеңәймичилики вә иғвагәрчилики район бихәтәрликини еғир тәһдиткә йүзләндүрүватиду. Һәммәйлән үчүн зиянлиқ болған бу қилмиштин биз бәкму әндишидә қеливатимиз" дегән. У "муһапизәтчи" гезити билән болған мәхсус сөһбәттә бу сөзләрни қилған. Шуниң билән биргә явропа дөләтлирини һәмдә хәлқара җәмийәтни хитайниң муштумзорлуқ қилмишиға қарши турушқа чақирған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт