23 Yashliq abduréqip raxmanning kambodzhadin xitaygha qayturup bérilgenliki ashkarilandi

“Washin'gton pochtisi géziti” 12-dékabir künidiki mexsus xewiride, kambodzha da'iriliri teripidin xitaygha qayturuwétilgenliki éniqlan'ghan 23 yashliq abduréqip raxman heqqidiki tepsilatlarni ashkarilidi.

Abduréqip raxman adem etkeschiliri arqiliq xitaydin qéchip chiqqan bolsimu, biraq adem etkeschilirining qolidiki kishiler bilen birlikte kambodzhada bir jinayet guruhining qoligha chüshüp qalghan we u yerde zorluq bilen tor jinayiti bilen shughullinishqa sélin'ghan. U bu jeryanda yoshurunche b d t xadimliri bilen alaqiliship özining xitaydin qéchip chiqqan bir Uyghurluqini dégen we ularning kapalitige érishken bolsimu, emma xitaygha qayturulushtek aqiwettin qutulalmighan.

“Washin'gton pochtisi géziti” de déyilishiche, kambodzha saqchiliri jinayi guruh teripidin mejburiy tutup turuluwatqan bu ademlerning ornini bayqap bu orunni tarmar qilghili kelgende abduréqip raxmanni tutqun qilghan we uni 1-yanwar küni paytext fnom péndiki köchmenlerni qayturush merkizige eketken. 13-Yanwar küni bolsa uni xitaygha qayturup bergen. 30-Yanwardin künidin étibaren uningdin xewer élinalmighan.

23 Yashliq abduréqip raxman eyni chaghda b d t xadimliri we Uyghur pa'aliyetchiler bilen alaqileshkende özining xitay hökümiti teripidin Uyghur élide qurulghan jaza lagérlirida ishligenlikini, xizmitidin ayrilghanda bolsa qolgha élin'ghanliqini éytip bergen. U xitaydin qéchip ketkendin kéyin, da'iriler uning ündidar hésabati we banka hésabatlirini taqiwetken iken.

Abduréqip raxmanning xitaygha qayturulushi xitay hökümitining yéqinqi yillardin buyan chet ellerge qéchip chiqqan bolupmu xitaygha qoshna hem tesiri chong bolghan döletlerdiki Uyghurlarning qayturulush mesilisining yene bir échinarliq misali bolup qaldi.

“Washin'gton pochtisi géziti” bu weqeni adem qutquzushni asasiy nishan qilidighan xelq'ara organlar jümlidin birleshken döletler teshkilatiningmu Uyghur mesilisige kelgende palech halgha chüshüp qélishi hemde xitayning öz tesirini qollinip turup Uyghurlarni qayturup kétishtiki kishini chöchütidighan qet'iylikining namayendisi, dep bahalighan. B d t ning musapirlar ishlirigha mes'ul orunliri bolsa gézitning so'allirigha jawab bérishni we hemde özige qaritilghan eyibleshlernimu ret qilghan.