Xitay saqchilirining ademsiz charilighuchi mashiniliri qaramayda ishqa kirishtürülgen

Muxbirimiz jewlan
2022.06.29
Share on WhatsApp
Share on WhatsApp

Xitayning hökümet torlirida ashkarilinishiche, qaramay sheherlik saqchi idarisi 29-iyun künidin bashlap, jungké tyenji shirkiti sinaq qilip ishlepchiqarghan 20 dane ademsiz charlash mashinisini resmiy ishqa kirishtürgen.

Qaramay sheherlik saqchi idarisining bashliqi jaw goshin bu mashinilarni maxtap: “Saqchi belgisi chüshürülgen bu mashinilar qaramay shehiridiki asasliq soda merkezliri, sayahet nuqtiliri we bezi mehellilerni sinaq teriqiside 24 sa'et charlaydu. Ular bu sheherdiki kaméralar toluq qapliyalmighan jaylarni közitish mesilisini hel qilipla qalmay, saqchilar, dron (ademsiz uchaq) we widiyoluq nazaret sistémisi bilen bille pütün sheherning bulung-pushqaqlirini teqip qilish, pütün ehwalni bilip turush we toghra signal bérish wezipisini ijra qilidu,” dégen.

Tonushturushlargha qarighanda, igizliki 1.6 Métir, uzunluqi 1.8 Métir, kengliki 1 métir kélidighan bu mashinilargha aptomatik heriketlinish téxnikisi bolghan lazir nurluq radar, qosh közlük sezgür kaméra, soqulushtin agahlandurush sénzori qatarliq 15 türlük téxnika seplen'gendin bashqa, chiray tonush, kimlik tonush, teswiri kod tonush, mashinilarning nomur taxtisini tonush, bir konupka bilen saqchigha melum qilish qatarliq iqtidarlar qoshulghan.

Amérikaliq muxbir we yazghuchi jéffiri kén “Mukemmel saqchi döliti” namliq kitabida Uyghur rayonidiki qorqunchluq teqip we nazaret sistémisini bayan qilghanidi. Uning bildürüshiche, xitay saqchi da'iriliri Uyghurlarning hemmisini zerbe bérish obyékti dep qarap, ularning bi'ologiyelik uchurlirini yighish bilen birge, yüz tonush, iz qoghlash téxnikisini “Bir gewdileshtürülgen bashqurush supisi” da ishletken. Qaramayda ishqa kirishtürlgen bu ademsiz charlash mashiniliri xitay hökümitining yillardin béri dawamlashturup kéliwatqan teqip-nazaret sistémisining téximu küchiyidighanliqi we bashqa jaylarghimu omumlishidighanliqini körsitidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet