Адриян зенз: “уйғур районида түрмидикиләрдин сирт, бир йерим милйон мусулман лагерда”

Мухбиримиз шөһрәт һошур
2019-03-13
Share

Уйғур вәзийити тәтқиқатидики йетәкчи шәхсләрдин германийәлик мутәхәссис адриян зенз бүгүн җәнвәдики б д т йиғинида қилған сөзидә уйғур районида түрмидикиләрни һесабқа алмиғанда йиғивелиш лагерлириниң өзидила 1 милйон 500 миңчә кишиниң қамақлиқ икәнликини оттуриға қойған.

Уйғур районидики чоңлар нопусидин (қорумиға йәткән кишиләрдин) һәр алтә кишидин бириниң нөвәттә лагерда икәнликини илгири сүргән адриян зенз, бу санни лагерлар һәққидики сүний һәмраһ сүрәтлиригә, хитай һөкүмәт хираҗәтлиригә вә гуваһчиларниң лагердики тиқма-тиқмичилиқ һәққидики вә ғайиб болған аилә-тавабиатлири һәққидики баянлириға асасән һесаблап чиққанлиқини оттуриға қойған.

Дәсләпки тәтқиқатларда уйғур районида 1 милйон кишиниң лагерда икәнликини оттуриға қойған бу адриян зенз мәзкур лагерларда системилиқ һалда етник вә диний кимликни йоқ қилишни мәқсәт қилған мәдәнийәт қирғинчилиқи елип бериливатқанлиқини баян қилған вә буниңға қарита тәдбир елиниши керәкликини тәвсийә қилған.

Бу йиғинға қатнашқан лагер гуваһчиси өмәр бәкәли лагерда қийин-қистақ барлиқи, ши җинпиңниң үзүндилириниң мәҗбурий ядлитилидиғанлиқи вә өзиниң 6 айғичә кичик бир өйгә 40 киши билән соланғанлиқини паш қилған.

Ройтерс агентлиқиниң бүгүнки бу һәқтики хәвиридә баян қилинишичә, мәзкур йиғинға қатнишиватқан американиң б д т дики баш әлчиси кәллй куррй ханим мухбирларниң соалиға җавабән американиң нөвәттә уйғур районидики мәзкур кишилик һоқуқ дәпсәндичиликидә җавабкарлиқи бар болған кишиләрни америкиға киргүзмәслик вә уларниң америкиниң иқтисадий системилиридин пайдилинишини чәкләш тоғрисида мумкинчилики бар болған барлиқ тәдбирләр үстидә ойлишиватқанлиқини баян қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт