Amérika bilen en'gliyediki ikki uniwérsitét Uyghur mejburiy emgikini iz qoghlash munbiri qurghan

Amérika bilen en'gliyediki ikki uniwérsitét yéqinda Uyghur mejburiy emgiki xewpining arqisidin iz qoghlash supisi teshkil qilghan.

“Éko-toqumichiliq” torining 18-aprél xewer qilishiche, mezkur iz qoghlash supisi éksport yollanmiliri, tamozhna sanliq melumatliri, import-éksport kötekliri, teminlesh zenjiri sanliq melumatlirini analiz qilish arqiliq Uyghur diyarida ishlepchiqirilghan mehsulatlarning mejburiy emgek xewpi üstidin iz qoghlash élip baridiken. Mezkur iz qoghlash supisining amérikaning boston shehiridiki sherqiy shimal uniwérsitéti bilen en'gliyening london shehiridiki shiféld hallam uniwérsitétining hemkarliqida qurulghanliqi qeyt qilinmaqta.

En'gliye shiféld hallam uniwérsitétining héléna kinnédi tetqiqat merkizi yéqinqi birqanche yildin béri, xitay we bezi xelq'ara shirketlirining Uyghur mejburiy emgiki bilen bolghan munasiwitige a'it nurghun nopuzluq doklatlarni élan qilip, xelq'araning diqqitini qozghighan,

“Éko-toqumichiliq” torining qeyt qilishiche, Uyghur mejburiy emgiki xewpini iz qoghlash supisi tekshürüsh nishanini nuqtiliq kiyim-kéchek sahesige qaritidiken. “Éko-toqumichiliq” ning xewiride, mezkur iz qoghlash supisining ammigha ashkara bolghan teminlesh zenjiri sanliq melumatlirining alaqisini kompyutérda analiz qilish, andin buni istixbarat uchurliri bilen birleshtürüsh arqiliq Uyghurlar mejburiy emgekke séliniwatqan Uyghur diyaridiki mejburiy emgek xewpliri üstidin iz qoghlash élip baridighanliqi bildürülgen. Buning aldida amérika dölet mejlisining ikki ezasi amérika tashqi ilar ministiri bilinkén'gha mektup yézip, amérikaning ittipaqdashlirigha Uyghur mejburiy emgikige chétishliq shirketlerning xelq'ara bazardin paydilinishigha yol qoyulmaydighanliqi heqqide bésim ishlitishini telep qilghan. Amérika awam palatasi “Xitay istratégiyelik riqabet alahide komitéti” ning re'isi mayk galigér bilen mes'ul ezasi raja krishnamurti yollighan mektupta, bilinkin xitayning dölet hamiyliqidiki mejburiy emgikige qarshi dunyawi diplomatik tirishchanliqni kücheytishke chaqirilghan.