Amérika mudapi'e ministiri, amérikaning xitaygha merkezlishidighanliqi, yawropaning öz bixeterlikige özi mes'ul bolushini tekitlidi

Amérika dölet mudapi'e ministiri pét xégsét ( Pete Hegseth) charshenbe küni yeni 12-féwral amérikaning NATO ittipaqdashlirini xitay tehditining “Ré'alliqi” heqqide agahlandurup, yawropa bixeterlikige yawropaliqlarning yétekchilik qilishi, amérikaning diqqitini xitaygha merkezleshtüridighanliqini bildürgen. Pét xégsétning bélgiyede ötküzülgen ukra'ina mudapi'e alaqe guruppisining yighinida qilghan sözide tekitlishiche, xitay “Ré'alliqi” we chégra tehditi amérikaning bu döletler üchün bixeterlik kapaletchisi bolushigha tosqunluq qilmaqtiken. Pét xégsét, yighinda yawropada turushluq amérika qisimlirining qisqartilishi mumkinlikini qeyt qilghan bolsimu, emma u kéyinrek amérikaning yawropada turushluq qisimlirini derhal qisqartish pilani yoqluqini éytqan. Shuningdek NATO ittipaqdashlirining herbiy sélinmini 5 pirsentke chiqirishini chaqirghan.

Pét xégsét bélgiyediki ukra'ina mudapi'e alaqe guruppisining yighinida mundaq dégen: ““Biz özimizning chégra bixeterlikige merkezlishiwatimiz, biz yene wetinimiz we bizning hindi-tinch okyandiki négizlik dölet menpe'etimizge tehdit sélish qabiliyiti we niyiti bolghan kommunistik xitaygha oxshash reqiplirimizge duch kelmektimiz.”

Pét xégsét yene mundaq dégen: “Amérika tinch okyanda xitay bilen urush partlashning aldini élishtiki heywe qilghuchi küchini aldinqi orun'gha qoymaqta. Ré'alliqtiki yétersizliklerni étirap qilish we sélinmini tengshep, heywe qilish küchining ongushsizliqqa uchrimasliqigha kapaletlik qilishtur. Heywe qilish küchining ongushsizliqqa uchrishigha bolmaydu.”

Bu, pét xégsétning amérika dölet mudapi'e ministiri wezipisige olturghandin béri, uning NATO bash ishtabi turushluq biryussélgha qilghan tunji ziyaritidur. Shuningdek bu bir amérika dölet mudapi'e ministirining tunji qétim yawropa bixeterliki we amérikaning küchini hindi-tinch okyan rayonida xitaygha merkezleshtüridighanliqi heqqide keskin ipadilerde bolushidur.

Pét xégsétning qeyt qilishiche, amérika NATO gha eza bolushini “Muzakire arqiliq érishken emeliyetchan bir netije” dep qarimaydiken. U yene ukra'inagha ewetilidighan yawropa tinchliq saqlash qismi NATO ning namidin bolmasliqi we bu NATO ning 5-maddisigha kirmeslikini bildürgen. Melum bolushiche, NATO ehdinamisining 5-maddisida uninggha eza döletke hujum qilish hemmige hujum qilghanliq, dep hésablinidiken.