Пирезидент доналд трамп хитайға қойидиған таможна беҗини кечиктүрмәкчи болған

Америка пирезиденти доналд трамп сайлам мәзгилидә хитай маллиридин 60 пирсәнт баҗ алидиғанлиқини елан қилған болсиму, вәзипигә олтурғандин кейин бу баҗни елишни туюқсиз кечиктүридиған болуп қалған.

“руйтерс агентлиқи” ниң 21-январ бәргән хәвиридә қәйт қилинишичә, пирезидент доналд трамп ақсарайға қайта киргән биринчи күни хитайға таможна беҗи қоюшни тосаттин арқиға сүргән һәмдә хитайни бирдинбир тәһдит дегән гәпләрни қилмиған. Һалбуки, у вәзипигә олтуруш мурасимидин кейин қилған сөзидиму хитайни түзүк тилға алмиған. Бу һал америка йеңи һөкүмитиниң хитай билән тоқунушмай, бәлки униң билән сөһбәтлишиш йолини таллиғанлиқидин дерәк бериду дәп қаралмақта.

Хитай илгири американиң сода җеңидики рәқиби дәп қаралған болуп, пирезидент трамп илгири қилған сөзидә, таможна беҗи арқилиқ хитайни чәкләп, американи техиму бай қилидиғанлиқини тәкитләп кәлгән. Хитай болса, сода җеңидә һәр икки тәрәпниң зиян тартидиғанлиқини билдүрүп, техиму көп маллирини америкаға киргүзүшкә урунуп кәлгәниди. Нөвәттә пирезидент трампниң хитайға дәрһал таможна беҗи қоймаслиқи, униң хитай билән қайта сөһбәтлишиш еһтималини күчләндүрмәктә икән.

Хәвәрдә дейилишичә, пирезидент трамп йәнә хитайниң тик-ток әп деталини чәкләшниму кәйнигә сүргән болуп, америка ширкәтлиригә тик-токниң 50 пирсәнт пейини елиш, уни сақлап қелиш тәклипи бәргән һәмдә тик-токниң кәлгүсидә нәччә йүз милярд долларлиқ базар қиммити яритидиғанлиқини ейтқан.

Сиясий анализчиларниң билдүрүшичә, 2020-йилдики сода келишими вә илгири һәл қилинмиған мәсилиләр америка билән хитайниң нөвәттики мунасивити вә сөһбитигә хирис елип келидикән; шундақтиму трамп 2-нөвәтлик вәзипә өтәшни башлиған бу мәзгилдә, икки тәрәп өзлириниң нишани вә мәнпәәтигә пайдилиқ йеңи пилан, йеңи келишим түзүшкә еһтияҗлиқ болидикән.