Amérika kéngesh palata ezasi warén: amérika xitayning amérikini suyi'istémal qilishidin oyghandi

Muxbirimiz erkin
2018-04-02
Share

Amérika kéngesh palatasining nopuzluq ezasi élzabét warén, amérikining yillardin béri xitaygha qarita xata siyaset yürgüzüp kelgenlikini, biraq hazir amérikining xitayning amérikini suyi'istémal qilishidin oyghan'ghanliqini bildürgen.

Roytérs agéntliqining xewer qilishiche, élzabét xanim bu sözlerni shenbe küni xitayda muxbirlargha tekitligen. U, ötken jüme künidin bashlap xitayda ziyarette bolghan.

Élzabét warén 3 künlük ziyaritide xitayning mu'awin bash ministiri lyu xé, diplomatiye ishlirigha mes'ul dölet komissari yang jyéchi we dölet mudapi'e ministiri wéy féngxé qatarliq shexsler bilen uchriship, shimaliy koréiye mesilisi, ikki döletning soda ixtilapi qatarliq mesililerni muzakire qilghan.

Roytérsning xewer qilishiche, élizabét warén xitay emeldarlirigha yene: "Eger u kishilik hoquqqa hörmet qilmisa, amérika xelqining xitay bilen téximu keng iqtisadi hemkarliq élip bérishni qollimaydighanliqi" ni bildürgen.

U, uzun yillardin béri xitay bilen iqtisadi hemkarliq kücheyse, bu uning téximu keng échiwétilishige türtke bolidu, dégen xata tonush dewamlashturulup kélin'genliki, biraq hazir amérika hökümitining oyghan'ghanliqini tekitlep, "Pütün siyaset xata yolgha bashlandi. Biz pakitqa uyghun bolmighan hékayiler bilen özimizni xushal qilip kelduq" dégen.

Élzabét warén prézidént trampni eng qattiq tenqid qilip kéliwatqan kéngesh palata ezalirining biri. Lékin shenbe küni muxbirlargha tramp hökümitining xitay mehsulatlirigha baj qoyghanliqidin endishe qilmaydighanliqini bildürgen.

Élzabét warénning ziyariti prézidént tramp xitayning 60 milyard dollarliq éksport mehsulatigha baj qoyup, uning amérika eqliy mülük hoquqini sistémiliq suyi'istémal qiliwatqanliqini jazalighan mezgilde élip bérildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.