Amérika xitayning térrorluqni bahane qilip, Uyghurlarni basturuwatqanliqi bildürdi

Amérika dölet ishlar ministirliqi jüme küni 2012‏-yilliq xelq'ara térrorluqqa qarshi turush doklati élan qildi. Doklatta, xitayning térrorluqqa qarshi turush herikiti nuqtiliq sherqi türkistan islam herikitige qaritilghanliqi eskertilip, biraq kishilik hoquq teshkilatlirining xitay térrorluqqa qarshi turushni kozir qilip, Uyghurlarni basturmaqta, dep qaraydighanliqini bildürgen.

Amérika bilen xitay 2001‏-yili “11‏-Séntebir weqesi” din kéyin, térrorluqqa qarshi hemkarlishidighanliqini élan qilghan. Biraq, amérika dölet ishlar ministirliqining doklatida körsitishiche, 2012‏-yili ikki terep térrorluqqa qarshi turush jehette asasen öz ara uchur almashturup baqmighan bolsimu, xitay özining etrapidiki döletler bilen bolghan hemkarliqni bolupmu, shangxey hemkarliq teshkilatidiki döletler bilen bolghan hemkarliqni dawamliq kéngeytken.

Doklatta yene, xitay hökümet emeldarlirining döletke asasliq xewp térrorluq, bölgünchilik, diniy radikalliqtin ibaret atalmish “3 Xil küchler” din kélidu, dep jakarlap, Uyghurlarning naraziliqini térrorluq, dep süretlep kelgenliki körsitilgen.

Amérika hökümiti 2002-yili sherqiy türkistan islam herikitini gumanliq térrorchi teshkilatlar tizimlikige kirgüzgen bolsimu, biraq, 2012‏-yili tizimliktin chiqiriwétilgen idi.