Amérika we xitayning iqtisad we soda sahesidiki emeldarliri soda muqimliqi üstide sözleshmekchi
2024.12.12
Baydin hökümitining iqtisad we sodigha munasiwetlik emeldarliri yéqinda xitay terep bilen iqtisadiy mesililer üstide söhbet ötküzidiken.
“Nyu-york waqti géziti” ning 12-dékabirdiki xewiridin qarighanda, amérika maliye ministirliqining yuqiri derijilik emeldarliridin teshkillen'gen bir hey'et bu hepte axirida xitayning nenjing shehirige bérip, amérika-xitay otturisidiki pul-mu'amile xizmet guruppisining axirqi uchrishishini tamamlaydiken. Amérika maliye ministirliqining yene bir türküm emeldarliri bolsa xitay terep bilen jenubiy afriqida uchrishidiken we u yerde ikki tereplik iqtisadiy xizmet guruppisining yighinigha qatnishidiken.
Melum bolushiche bu xizmet guruppisi amérika bilen xitay otturisidiki jiddiylikning iqtisadiy urushqa aylinip kétishining aldini élishning bir yoli süpitide 2023-yili qurulghan. Mezkur uchrishish, baydin hökümiti kéler ayda wezipisini ötküzüp bérishtin awwal amérikaning xitay bilen bolghan iqtisadiy we soda munasiwetlerni tengshesh tirishchanliqining bir qismi hésablinidiken.
“Nyu-york waqti géziti” ning körsitishiche, amérika hey'itining bu qétimqi uchrishishta xitayning yéshil énérgiye téxnika sahesidiki heddidin ziyade ishlepchiqirish mesilisi üstide nuqtiliq toxtilidighanliqi, undin bashqa yene xitayning halqiliq minéral maddilarning éksportigha cheklime qoyushi we hemde xitay shirketlirining rusiyening tajawuzchiliq urushini qollishidek mesililer üstide söhbetlishidighanliqi mölcherlenmektiken.
Amérika maliye ministirliqi bu heqtiki bayanatida, ikki tereplik uchrishishning amérikini xitayning tashqi péréwot siyasiti we qerzni yéniklitish qatarliq sezgür mesililerge qandaq qaraydighanliqi heqqide téximu yaxshi chüshenchige ige qilidighanliqi, pul-mu'amile muqimliqini saqlashqa yardem béridighanliqini bildürgen.