Amérika rusiyening ukra'ina urushigha yardem qilghan xitay shirketlirini jazalashni oylashmaqta

Amérika rusiyening ukra'ina urushigha yardem bermekte, dep qariliwatqan xitay shirketlirige qarita émbargo yürgüzüshni oylashmaqtiken. Eger amérika hökümiti bu xitay shirketlirige qarita jazalash élip barsa, bu, amérikaning ukra'ina urushi partlighan ikki yildin béri tunji qétim xitayni bu urushta biwasite jawabkarliqqa tartishi bolup qalidu. Amérika CNBC téléwiziye qanilining xewer qilishiche, amérika dölet mejlisi ezaliri rusiyening ukra'inagha qarshi urushigha yardem qilghan xitay shirketlirini jazalashni oylishiwatqanliqini éytqan. Amérika awam palata ezasi gérald konolli ( Gerald Connolly) yawropa ittipaqiningmu  ötken hepte bu xil pilanni otturigha qoyghanliqi, amérika awam palata ezaliriningmu bu xil pilanni oylashqanliqini éytqan.

Gérmaniyediki myunxén xewpsizlik  yighinigha qatnashqan gérald konolli 18-féwral küni CNBC gha qilghan sözide: “Xitay shuni bilishi kérek, oxshash émbargo xitayghimu yürgüzülidu. Bu jaza rusiyege heqiqiy ünümini körsitishke bashlidi. Bu, rusiyening ishlepchiqirish küchi, iqtisadiy ipadisi we turmush sapasigha tesir qilmaqta” dégen. Gérald konollining agahlandurushiche,  eger xitaygha émbargo yürgüzülse, “Uning tartidighan ziyini rusiyedin jiq köp bolidiken”.

Gérald konolli bu sözlerni yéqinda “Diplomat” zhurnilidiki bir doklatta, ottura asiya jumhuriyetlirining, bolupmu özbékistan bilen qirghizistanning rusiyege köplep mashinisazliq eswablirini éksport qiliwatqanliqi, bu mashinisazliq eswablirining Uyghur diyaridin import qiliniwatqanliqi otturigha qoyulghan bir waqitta éytqan. Amérikaning émbargosi iqtisadiy turghunluq we kirizistiki xitay iqtisadigha qattiq zerbe bolidighanliqi qeyt qilinmaqta. CNBC Ning xewiride déyilishiche, gérald konolli, émbargo sodida xitaygha tayinidighan amérikagha ziyan salsimu, lékin buning jazani tosup qalalmaydighanliqi we jazaning nahayiti téz arida yolgha qoyulushi mumkinlikini éytqan. Gérald konollining éytishiche, eger xitaygha émbargo yürgüzülse, uning, iqtisadi ajiz ehwaldiki xitaygha bolghan zerbisi qattiq bolidiken. Shunga, “Xitay rusiyening zorawanliqi we peskeshlikini qollashning aqiwitini etrapliq oylishishi kérek” iken.