Стефен мур: «америка хитай билән болған сода урушида һәргизму кәйнигә чекинмәслики керәк»

Мухбиримиз шөһрәт һошур
2018-04-11
Елхәт
Пикир
Share
Принт

Америкидики CNN телевизийәсиниң иқтисадий анализчиси стефен мур бүгүн CNN торида бир обзор елан қилип, америка һөкүмитини нөвәттики хитай билән болған «сода уруши» да һәргизму кәйнигә чекинмәсликкә дәвәт қилған.

У мақалисидә нөвәттики сода тоқунушиниң пай чеки базирини егиз-пәс қилидиған бир-икки һәптилик иш әмәс, бәлки узунға созулидиған вә америкиниң дөләт бихәтәрликидин тартип иқтисадий тәрәққиятиғичә тәсир көрситидиған зор бир иш икәнликини әскәрткән. Аптор мақалисидә «бейҗиң әқлий мүлүклиримизни оғрилаш вә алдамчилиқ қилиш билән америкиға йилиға нәччә йүз милярд доллар зиян селиватиду,» дәп язған.

У йәнә америкиниң иттипақдашлиридин японийә, австралийә вә тәйвән қатарлиқ дөләтләр бихәтәрликиниңму тәһдиткә учраватқанлиқини әскә салған.

Хитайниң өзигә тәвә болмиған җайларда қанунсиз һалда игилик һоқуқ тәләп қиливатқанлиқи, у җайларда һәрбий мәвҗудийитини күчләндүрүватқанлиқи, империалистик иштиһа билән кеңәймичилик қиливатқанлиқи әскәртилгән бу мақалида «хитайға аз мәбләғ селип, көп зәрбә беридиған җаза тәдбирлирини қоллиниш» вә бу арқилиқ «униңға һәддини билдүрүш һәмдә уни қануний йолға йетәкләш» лазимлиқи тәкитләнгән.

Стефен мур, хитай билән нөвәттики тоқунушниң дөләт мәнпәәти мәсилиси икәнликини әскәртип, америка сиясәтчилирини худди «11‏-сентәбир вәқәси» гә қарита болғинидәк сиясий өктичиликни бир тәрәпкә қайрип қоюп, бир мәйданда турушқа, доналд трампниң хитайға қарши җаза тәдбирлирини қоллашқа вә илһамландурушқа чақирған.

CNN Торида тонуштурулушичә, стефен мур «әркинлик иши» намидики бир консерватип мәслиһәтчиләр гурупписиниң әзаси вә доналд трампниң сайлам мәзгилидики сабиқ иқтисад ишлири мәслиһәтчиси икән.

Пикирләр (0)
Share
Толуқ бәт