Amérika mejlis ezaliri prézidént baydindin shi jinping bilen körüshkende siyasiy mehbuslarni sürüshtürüshni telep qilghan

Amérika dölet mejlis ezaliri prézidént baydinni xitay dölet re'isi shi jinping bilen körüshkende xitaydiki siyasiy mehbuslarni sürüshtürüshke chaqirghan.

9-Noyabir küni, amérika dölet mejlisi xitay ishliri ijra'iye komitéti (CECC) ning re'isliridin awam palata ezasi kristofér simis we kéngesh palata ezasi jéf mérkléy prézidént baydin'gha xitayda türmide yétiwatqan bir qisim siyasiy mehbuslar hemde qanunsiz tutup turuluwatqan amérika puqralirining tizimlikini ewetip bergen we bu tizimlikni xitay dölet re'isi shi jinpingge tapshurushni telep qilghan.

Kéler hepte amérikaning san firansisko shehiride “Asiya-tinch okyan iqtisadiy hemkarliq munbiri” (Asia-Pacific Economic Cooperation forum) échilidighan bolup, bu yighinda prézidént baydinning shi jinping bilen körüshidighanliqi xewer qilinmaqta.

Dölet mejlisi ezaliri prézidént baydin'gha ewetken tizimlikte 40 kishining simi bérilgen bolup, ular ichide gülshen abbas, ekber eset, qurban mamut, rahile dawut, ilham toxti, shundaqla lagérgha solinip késilgenliki radiyomiz teripidin delillen'gen xelchem pazil, meryem emet qatarliq mehbuslarmu orun alghan.

Xitay ishliri ijra'iye komitétining re'isliri prézidént baydin'gha yazghan ochuq xétide, xitay hökümitining amérikada yashawatqan Uyghurlarni yurtliridiki uruq-tughqanlirining awazi bolghanliqi üchün nazaret qiliwatqanliqi, qorqutush we tehdit sélish qilmishlirida bolghanliqini tilgha alghan we prézidént baydinning shi jinping bilen körüshkende amérikadiki “Chégra halqighan basturush” herikitini derhal ayaghlashturushni telep qilishi lazimliqini bildürgen.