“Pyuw” ray sinash netijisi: amérika küchlükmu xitaymu?
2023.11.08
Amérikadiki “Pyuw tetqiqat merkizi” ning ray sinash netijisidin melum bolushiche, dunyadiki köp qisim kishiler amérikani herbiy we iqtisadiy küch jehette xitayni meghlup qilalaydu, emma téxnika jehette xitaygha yételmeydu, dep qaraydiken.
Noyabirda san-fransésko shehiride ötküzülmekchi bolghan “Asiya-tinch okyan iqtisadiy hemkarliq teshkilati yighini” we amérika pirézidénti jow baydin bilen xitay re'isi shi jinpingning uchrishishi küntertipte turuwatqan bir peytte élip bérilghan bu ray sinashta, ikki chong iqtisadiy gewde bolghan amérika bilen xitayning iqtisadiy, herbiy we téxnikiliq küchige baha bérilgen.
“Pyuw tetqiqat merkizi” torida élan qilin'ghan ray sinash netijisige asaslan'ghanda, ray sinashqa qétilghan 24 dölet ichide yaponiye, koréye isra'iliye, polsha, hindistan qatarliq 16 dölet amérikani dunya iqtisadida yétekchi orunda turidu dep qarighan؛ italiye, girétsiye, awstraliye, ispaniye, gérmaniye, gollandiye qatarliq döletler xitayni yétekchi orunda turidu dep qarighan.
Herbiy jehette bolsa, héchqandaq dölet xitayni amérikadin küchlük dep qarimighan. Emma téxnika jehette, xitayni küchlük dep qaraydighan döletlerning sani köp bolghan؛ bular asasen yawropa, afriqa, latin amérikasi döletliri iken. Amérikani téxnikida küchlük dégenler peqet koréye, yaponiye, hindistan qatarliq asiya döletliri bolghan.
Ray sinashta yene, “Qaysi dölet dunyaning muqimliqi we tinchliqini saqlashqa bekrek töhpe qoshti? ” dégen so'algha bérilgen jawabta, amérika xitaydin üstün turghan.