Barnéy sandérs: "Men prézidént bolup qalsam béyjing da'irilirige Uyghurlarni jazalashning bedilini töletküzimen"

Muxbirimiz erkin
2019-09-02
Élxet
Pikir
Share
Print

Amérika démokratlar partiyesining prézidént namzatlirining biri, kéngesh palata ezasi barnéy sandérs, ötken shenbe küni amérikadiki bir musulmanlar teshkilatining yighilishida nutuq sözlep, eger özi prézidnétliqqa saylinip qalsa, xitaygha Uyghurlarni jazalashning bedilini tölitidighanliqini bildürgen.

Barnéy sandérs "Uyghur kishilik hoquq qanun layihesi" ge imza qoyghan kéngesh palata ezasi, shundaqla 2020‏-yildiki amérika prézidént saylimining démokratlar partiyesi namzatliqini talishiwatqan küchlük kandidatlarning biridur. U yuqiriqi sözlerni 31‏-awghust küni téksas shtatining xyuston shehiride ötküzülgen shimali amérika islam jem'iyitining yilliq yighinida tekitligen.

Barnéy sandérs prézidént trampni tenqidlep, mundaq dégen: "Men shuni éniq éytay, men dunyadiki istibdat hakimiyetlerge hérismen hazirqi prézidénttin perqliq halda démokratiye we kishilik hoquqni amérikining eng aldinqi xizmet nishani qilip tallaymen. Biz sözlewatqan hazirning özide xitay shinjang ölkisidiki musulmanlargha qarita keng kölemlik qamash programmisini yolgha qoymaqta. Méning hökümitim bizning xelq'ara ittipaqdashlirimiz bilen hemkarliship, béyjinggha musulman puqralirini yaki bashqa herqandaq bir xelqler topini xorlisa, uning xelq'ara we iqtisadi ornigha ziyan yétidighanliqini tonutup qoyimiz. Biz uning bu qilmishigha yol qoymaymiz," dégen.

U yene radikal islamning tehditi heqqide toxtilip, radikal islamning zorawanliqining eng köp ziyankeshlikige uchrighan xelqlerning yenila musulmanlar ikenlikini tekitligen. U, "Heqiqet shuki, eger biz mentiqsiz zorawanliqqa qarshi muweppeqiyet qazinimiz deydikenmiz, biz öz ara birlishishimiz, bir-birimizni betbeshirileshtürmeslikimiz kérek" dégen.

Nöwette xitayning 2 milyondek Uyghurni yighiwétish lagérlirigha qamishi we amérika hökümitining buninggha qarshi qandaq tedbir qollinishi kérekliki prézidént namzatlirining munaziriliridiki nazuk bir téma bolup kelmekte.

Toluq bet